تذكر ان هناك الكثيرين يتمنون لو كان عندهم صديق مثل صديقك

معكم احبتي يتجدد اللقاء / وكللي يقين بان البعض بدا يشعر بالملل لاننا لم ندخل للحكايه / ولكن ما قدمناه في السابق كان ضرورة للتهيئه للقصه وكذلك سيرتبط ما قدمناه بالبدايه باحداث مستقبليه جوهريه في هذه القصه ..

قبل ان نبدا اود الترحيب هنا بالاخ الجديد النجمة بطل لبنان والذي انضم لطاقم عمل المسلسل كمدقق للهجه اللبنانيه !! كل التحيات له

تلاحظون احبتي اننا نهمل او سنهمل شخصيات كثيره وكذلك سنبتعد عن حشو الكلام والمشاهد الغير ضروريه بالاحداث " هذا هو طبعي وطابعي " ليس لشيء ولكن لاننا نقدم عمل مكتوب وليس مرئي فما يشد المتابع هو تطور الاحداث .. ولو كنا سنعرض هذا العمل بالتلفاز لكنا ركزنا على عائلة وليد وكذلك عائلة غسان ولاقحمنا نور بكثير من المشاهد .. ولكن كما قلت سنركز فقط على الاحداث الجوهريه وبعض من المشاهد " غير المهمه " كي تكون فواصل بين حدث واخر

الى من فاته متابعة الحلقات السابقه

" ما بين الصداقة والحب " " الحلقة الثالثه" 

المشهد الاول/ وانقلبت الصفات

منذ ان افترق كل من نور وغسان عن بعضهم اصبحت اللقاءات بين وليد وغسان قليله !! فاتجه وليد لبيت غسان ليلا وطرق بابه

غسان : مين؟؟

وليد : سيدك وتاج راسك ولا !! افتح الباب !!

يفتح غسان الباب وقد كان يضع منشفة على رقبته !! ويقول : ميين !! وليد ؟؟؟ حلت البركه يا اهلين وسهلين

وبعد التسليم المتبادل يدعو غسان وليد للدخول والجلوس !!

وليد : شو يا ابو الشباب !! كنك هلا صاحي من النوم؟؟؟

غسان : اه والله !! من 5 دقايق بس !!

وليد : مال غسان؟؟ ولك ساعتين زمن وبنام !! وانت هلا صاحي؟؟

غسان : شو بدي اعمل !! لا شغله ولا مشغله !! سهر بالليل ونوم بالنهار !!

وليد : انت تغيرت كثير يا غسان !! مش غسان اللي بعرفه !!

غسان : اذا على شعري بكره بحلقه !!" ويضحك "

وليد : غسان سيبنا من المسخره تبعتك وخلينا جديين شوي !! ليش بطلت تبين مثل اول ؟؟ بعدين سمعت انت ملتم على شلة زعران !! وصاير مشكلجي !!

غسان : شوف يا وليد !! لازم تعرف شغله !!

وليد : شو هي ؟؟

غسان : بالاول !! كنا صغار !! وهلا كبرنا !! والكبر عندي بعنيلي التياسه !! ولما تيست وتمسحت ادركت انه ما بصير واحد تيس يمشاي بني ادم !! فقررت اخفف من جياتي عندك بلاش اشبهك !!

وليد يصدم لسماع هذه الكلمات وكأن من امامه ليس غسان الذي يعرفه !! ويقول : غسان !! لهلا؟؟ لسه مش قادر تنساها؟؟ بعد كل هالسنين؟؟؟

غسان : يا زلمه شو انساها وما انساها !! هدول 4 سنين بيحكوا !! بيحكوا يا وليد !! انا ما بلومك لانك ما جربت !! بس لو جربت طعم الحب بتشوف قديش الدنيا مره بلا حب !!

وليد : ولايمتى يا غسان لايمتى ؟؟

غسان : لما الله ياخذ امانته !!

وليد ينظر لغسان بحسرة لما وصل اليه حاله !!

غسان : اسمعني يا وليد !! بدي تحط الحكي اللي بدي احكيلك اياه حلقه في اذنك !! احنا صحاب وراح نضل صحاب !! ومهما غيرت الدنيا فينا او غيرتنا اوعك تفكر بيوم اني راح اتغير من ناحيتك !!صحيح ما عدنا نقعد مع بعض مثل اول !! ولا انا حتى مثل اول !! لكن تذكر انك اعز انسان على قلبي ولا شي بالدنيا راح يغيرني تجاهك  حتى لو ما شفنا بعض من السنه للسنه !!

وراح اقلك شي يمكن ما تصدقه .. لكن صدقه !!لو خيروني بين نور وبينك راح اختارك انت وبس

وينتهي المشهد بالعناق بين الاثنين

المشهد الثاني / انتظار محفوف بالشوق

وليد ينتظر عبد الله ليشبك له خط الانترنت / فعبد الله متخص في عالم الكومبيوتر والانترنت .. ينتظر وينتظر وكانه ينتظر مولودا !! يحمل هاتفه النقال ويتصل على عبد الله ..

وليد : يا زلمه وينك لهلا؟؟

عبد الله : اسف كثير عبد الله دقيقتين وبكون عندك !!

وليد : من ساعه قلتلي خمس دقايق !!

عبد الله : يا زلمه طول بالك هي الدنيا طايره .. خلاص والله دقيقتين وبكون عندك

لحظات وياتي عبد الله

وليد : يخرب بيت مواعيدك !! زباله زيك !!

عبد الله : انا زباله ولا ؟؟ بدي اشوف مين بدو يركبلك انترنت !! يلا سلااااام

وليد : استنى استنى !!! تعال حقك علي !! انا زباله بس يلا خلصني !!

عبد الله : لالالا !! ما جبت اشي جديد انت زباله طول عمرك !! اعتذر ولا ما تحلم اركبلك انترنت !!

وليد : يا عمي هي بوسه على راسك بس دخيلك !!

عبد الله : اها هلا بنشتغل !! بس للهدرجه محروق على الانترنت !! مالك بالعاده !!

وليد : شو اعمل !! مجدي حرق دمي من كثر ما خبرني عنه !! بعدين منتدى الرياضه هلا بكون مشعلل بدي اشوف شو اخر الاخبار !!

عبد الله : ولك على عيني !! بس بالاول اعملك كاسة شاي خليني امخخ على سيجاره علشان ازبطلك الوضع !!

المشهد الثالث / في بلاد الارز

في مكان بعيد هناك في بلاد الارز " لبنان " كانت هناك فتاه تدعى روند  وقامت بدورها الفنانه اللبنانيه " دارين حمزه "!! شانها شان وليد تعشق الانتر !! لكنها تقضي معظم اوقاتها مع اصدقائها !! ومع حبيبها وكان يدعى " فادي " وقام بدوره  الممثل اللبناني  مازم معضّم "

في احد المنتزهات اجتمعت روند مع ثلاث من رفاقها !! " نيرمين "  " رولا "  " ميشيل "   / وكان هذا الحوار

روند : يا جماعه ليش توني ما اجى

ميشيل : قال منو فاضي / عندو موعد بالانترنت

روند : يخرب بيته !! مجنون هيدا !! حد بيضيع طلعة مثل هاي !! وبقعد على النت

نيرمين : هيك الله خالقه !! بيحب النت !!

روند : يالله ! شو بيحببهم بالنت !! اكثر شي بكرهه هو التشات على النت !!يعني ما بطيق احكي مع حد بالنت الا للضروره .. ويمكن بس لما يكون فادي بسفريه بدخل احكي معه !! غير هيك ما بطيق اعمل تشات !! ولولا اني بشجع فريق الانتر ولا كان ما دخلته بالاصل الا بالصدف

نيرمين : هدول تبعون النت مجانين !! عايشين بعالم كله وهم !! مني عارفه شو محببهم فيه

روند : يصطفلو !! شو بدنا فيهم !! خلينا بحالنا احسن !!

رولا: اي يا جماعه !! من بعد هلا وين بدنا نروح ؟؟

ميشيل : شو رايكم نروح على البحر !!

روند : انا بدكم تعذروني !! مواعده فادي بعد شي ساعتين ولازم كون معه !!

المشهد الرابع / العالم في بيت وليد

عبد الله : شوف يا سيدي !! هيك بكون كل شي تمام !! هلا بتقدرتدخل على النت وقت ما بدك !! بدك اعلمك كيف تفتحه ؟؟

وليد : فشرت عينك ولا !! بعلم عشره زيك !!

عبد الله : يا حبيبي !! تفضل يا بيل غيتس !! ورجيني شطارتك !! اشوف !! افتحلي موقع الياهو وضيفه على المفضله !! بلاش افتح موقع الجزيره !! او اقلك افتحلي موقع مكتوب وضيفه على المفضله !!

وليد يرتبك ويقول : هاااااااا !! شو بدي في المواقع هاي !! انا بس بدي موقع الرياضه !! بعدين شو هاي المفضله !!

عبد الله : صعبه المفضله ؟؟؟ طب والماسنجر بتعرف عنه شي؟؟

وليد : ولك عبد الله لا تخوتني !! حبه حبه علي !! من وين بتجيب هالمصطلحات هاي؟؟

عبد الله : اسع ولا لوح !! بدي منك تركز معي مليح !! علشان تتعلم اساسيات استخدام الانترنت !! ماشي ؟؟

وليد : وهو كذلك !! هات لاشوف

المشهد الخامس / لقاء بين حبيبين

تلتقي روند مع حبيبها فادي في احد المنتزهات ويجتمعان على طاوله وسط حديقة من الورود والاشجار

روند : بس انا ما فيي عيش برات لبنان يا فادي !!ما فيي ابعد عن امي وعن خيي !! حتى صحابي ما فيي فارقهن

فادي : يا حبيبتي شو بدنا نعمل يعني؟؟ احنا مضطرين لهالشي !! يعني بتكوني مبسوطه وانت ببلد وبيك وحبيبك ببلد ثانيه؟؟

روند : يعني ضروريه هالسفريه هاي؟؟

فادي : يا حياتي يا عمري !! انتي بتعرفي انه كل شغل بيك ببريطانيا وانا من جديد صرت اشتغل معو !! يعني بترضي تعيشي انت ببلد وانا ببلد؟؟ فما في حل قدامنا الا هالحل !!

روند : يا ربي !! الله يلعن بي المصاري ياللي بدها تخليني ابعد عن بيروت وعن رفقاتي !!

ومن ثم تتابع !! وايمت بدو يكون السفر ؟

فادي : من بعد ما تخلصي الفحوصات !! بجي بيك لبيروت وبنسافر سوا

وينتهي المشهد برضوخ روند للامر الواقع مع حالة حزن شديده

المشهد السادس / وبدات الرحله في العالم الجديد

دخل وليد منتدى الرياضه وخط اولى حروفه به ومضى قدما في عالم قد ارتاح له كثيرا وفرح به !! وبدات انامله تسطر مرحله جديده من مراحل حياته والتي ستشكل انعطافا هاما في سلوكياته ونظرته للدنيا بشكل عام

ولم يجد صعوبه في التعايش مع المنتدى الرياضي وكذلك التعايش مع الاصدقاء الجدود وكيفية مجارتهم بالمواضيع والردود !!

المشهد السابع / في الجامعه من جديد

اتى غسان للجامعه لزيارة وليد هناك وكذلك للاطمئنان على حبيب الامس !!وكانا يتمشيان في اروقة الجامعه

وليد : ويا ترى كم يوم بدك تصمد في الشغل الجديد ؟؟

غسان : يعني !! لحد ما ازهق من المعلم الجديد بتكون مرحلة الطفر عدت !! اما بطرد حالي او بخليه يطردني

وليد : وكيف بدك تخليه يطردك ؟؟؟

غسان : ولاااااااااااااااااي !! ولا اسهل منها !! طوشه صغيره وسلامتك وتعيش

يضحك وليد ويقول : الله يجازيك !! ايمتى بدك تعقل يا زلمه !!

غسان : انسى !! العقل ما بيلزم !! بدي اكتب عليه غير مستعمل !! هلا قللي انت شو ناوي تعمل او شو عامل  بالاحرى ؟؟

وليد : يا سيدي محسبوك شبك انترنت واتوسع في مجال الرياضه هناك !! وعامل شغل مرتب هناك !! ووو!! ويقطع غسان عليه الحديث ويقول له : بلا نت بلا هوا شوف شوف مين هناك !!

ينظر وليد للجهه التي اشار اليها غسان فيرى نور !!

وليد : ما انا كل يوم بشوفها شو في شي جديد

غسان  : الجديد اني انا هون اليوم ..

وليد : ولك لسه ما نسيتها !! لسه بتفكر فيها !!

غسان يتامل في نور جيدا !! ويقول : تعرف شو اللي مطير ضمانات عقلي؟ انها بتضحك وبتحكي مع اللي معها وبتضحك عاااااااادي جدا ولا كاني موجود  ولا كانه كان بينا اي شيء !! ولك ااااااااااااااااااه على هالزمن !!

بعد  هذه الكلمات لا يطيق غسان البقاء في الجامعه ويرحل فورا !!

المشهد الثامن / الصحب من جديد

جلس عميد ومجدي وعبد الله في مكانهم المعتاد وبداوا يتحدثون عن وليد والتغيرات الجديده في حياته ولكن كان معهم ضيف اخر وهو عمار الدلع "

عبد الله : والله يا جماعه انا سمعت من بعد ما شبكناله النت بطل يطلع من البيت !!! والمشكله بيضل ملزق في الموقع تبع الرياضه اللي اعطاه اياه مجدي

مجدي : بشرفك؟؟ هو سجل ؟؟

عبد الله : اه والله !! انا سجلتله !! صرله اسبوع بشتغل عليه

مجدي : شو الاسم اللي دخل فيه ؟

عبد الله : ريكوبا فلسطين !!

وهنا يتدخل عمار وبحالة استغراب شديده  : هلا ريكوبا فلسطين هو نفسه وليد؟؟

عميد : ليش انت بتدخل الموقع هذا ؟؟

عمار : انا صرلي سنه مداوم عليه ومسجل فيه كمان !!

مجدي : باي اسم ؟؟

عمار : باسم " الدلع "

وهنا يقول عميد ساخرا : يا فرحتك يا وليد !!

عبد الله : وكيف شفته لوليد في المنتدى !!

عمار : يا زلمه هذا مصيبه !! بلوه مصبره !!

عميد : ولو ليش ؟؟

عمار : يا زلمه مواضيعه غريبه وكتاباته ملفته للانتباه !! ومع انه اله اسبوع بس الا انه كل الاعضاء حبوه وبيتبعوا على مشاركاته !!

عبد الله : والله حد علمي الرياضه هي رياضه يعني ما بدها فلسفه ليتميز فيها واحد عن الثاني !!

عمار :  مين قلك !! يا زلمه هذا لما يكتب عن الانتر بالتحديد  ما بتحسه بيكتب عن نادي !! وانما عن رووح !! عن شيء عايش وبيحس !! بقلك عامل شغل بيهبل هناك !!

مجدي : غريبه هو ما اجى لهلا !!

عميد  يغمز مجدي ويشير الى عمار " ويقصد ان وليد لا يطيق الجلوس مع عمار !!

المشهد الثامن / وسقطت نظراتها على حروفه

روند تجلس في غرفتها مع شقيقتها حنان  والتي قامت بدورها الممثله اللبنانيه " نور " !! وكانت حنان تقرا في احدى المجلات بينما كانت روند منشغله بتصفح الانترنت وموقع الرياضه والذي دخله وليد منذ اسبوع

بينما كانت روند تقرا في المواضيع المطروحه والردود واذا بها تقول : حنان !! حنان تعي تعي شوفي هيدا شو كاتب عن الانتر !!

وتاتي حنان !! وبعد ان تقرا !! تقول : شي حلو !! لك هيدا كانه بيكتب لحبيبته مو للانتر !!

روند : اسلوبه بجنن !! بدي شوف ملفه الشخصي !!

 وبعد وقت !! وبعد ان عادت حنان لمكانها

حنان : شو طلع معك ؟؟

روند : هيدا من فلسطين !! وما صرله اكثرمن اسبوع مسجل !! بس الواضح انه كل مواضيعه حلوه !! حتى الردود تبعونه بختارها بعنايه !!وتصمت !!

ومن ثم تقول : بتعرفي ؟ بدي اضيفه عندي على الماسنجر !! بدي اتعرف عليه !!

حنان : شوفوا مين اللي بيحكي !! لك هو اصلا انتي بتدخلي الماسنجر الا بالمناسبات !! وبعدين دخلك انتي كلك على بعضك مو مقتنعه بالتعارف والمعرفه من خلال الانترنت !!

روند : مو مشكله !! هو فضول بحد ذاته !! بدي اتعرف عليه وبس !! ما بدي احكي معه كثير !! بس بدي جرب !!

المشهد التاسع : مواجهه

بينما كان وليد ينوي الخروج من الجامعه ومن غير انتباه منه اوقفته نور !!

نور : لو سمحت !! ممكن كلمه !!

وليد اصابه الارتباك وبدا يلتفت حوله ومن ثم قال : انا !!

نور : اه انت ممكن ؟؟

وليد على مضض : تفضلي !!

نور : انا بعرف انك صاحب غسان وبعرف انه بيحكيلك كل شي !! يعني يا ريت تكون واضح معي مثل ما انا واضحه معك

وليد : بقدر اخدمك بشي ؟؟

نور : بتمنى تخبر صاحبك غسان انه يبطل عن ملاحقتي ومضايقتي !!

وليد : عفوا عن شو بتحكي انت؟؟

نور : بتوقع انك بتعرف عن شو بحكي !!

وليد : اللي بينك وبين غسان انا ما الي فيه !! يا ريت هذا الشي تفهميه

نور : ما دام ما دخلك فيه ليش بتبعثله اخباري وحتى علاماتي بالدراسه وكل خطوه بخطيها ؟؟

وليد : انا ؟؟ لا مستحيل !! انا بالاصل .. وقبل ان يكمل تقاطعه نور وتقول : اسمعني !! بتفهم صاحبك انه عيب اللي بيعمله ويا ريت ما يضل يتصل علي وعلى تلفون البيت

وليد : انتي اسمعيني !! اذا كان في شي بدك تحكيه لغسان فروحي احكيله بنفسك !! انا ما تعودت ولا بدي اتعود اكون واسطه بين اثنين وبالذات بين بنت وشب !! او بالاخص بين !! ويصمت قليلا .. ومن ثم يتابع .. بين حبيبين !! ويذهب

المشهد العاشر / عتاب

وليد في غرفته ببيته يجلس امام جهاز الكومبيوتر وينتظر غسان !! لحظات وياتي غسان !!

يذهب وليد ليفتح الباب وياتي غسان !!

غسان : السلام عليكم

وليد : وعليكم السلام !! اهلين غسان تفضل ارتاح

غسان : خير شو في اتصلت علي وبدك اياني ضروري !!

وليد : تفضل هلا بنحكي بس اخلص اللي في ايدي

غسان : شو بتعمل ؟؟

وليد : عم احكي مع واحد من الامارات .. عرفته عن طريق موقع الرياضه

غسان : اها !! وكيف اتعرفت عليه !!

وليد : مثله مثل غيره طلب يتعرف علي وضافني عنده بالماسنجر !! ولسه في كذا واحد وكلهم من منتدى الرياضه !!

غسان : حكيت معهم كلهم؟؟

وليد : لا لسه !! لكن واضح انهم عن طريق منتدى الرايضه بيبين من النيك نيم تبعهم !!

غسان : شو هذا النيك نيم ؟

وليد : الاسم المستعار اللي بيحطوه بالايميل !! لحظه شوي !!

دقائق معدوده وينهي وليد محادثته !!

وليد : شو يا سيدي !! عارف ليش اتصلت عليك؟؟

غسان : هلا بتحكيلي !!

وليد : اليوم نور وقفتني وحكت معي !!

غسان : شوووووووووو !! حكت معك؟؟ شو بدها !!

وليد : اشتكت عليك !!

غسان : من شو اشتكت !!

وليد : من عمايلك !! وبعدين معك انت؟؟ ما بدك تترك البنت بحالها؟؟

غسان : لا تطلعها معي يا وليد !! شو عامل انا ؟؟

وليد : ليش بتتصل عليها وبتضل تلاحقها !! يا زلمه افهم !! افهم البنت ما بدها اياك !! والله اللي بتعمله حرام بحقك وبحقها

غسان : اسمع اذا مش عاجبها تفصل التلفون !! او تبلط البحر

وليد : له يا غسان !! ولك على الاقل كرمال الحب اللي كان بينكم !! خليه ذكرى حلوه ولا تلوثها !!

غسان : هي خلت شي حلو !!

وليد : اذا هي ما خلت انت لازم تخلي !! لانه انت اللي بتحب !! مش هي !! او بالاخص انت بتحب اكثر !!

مشان هيك الله يرضى عليك كرمالي سيبك من البنت هاي وانساها كليا

المشهد الحادي عشر / روند تشتكي

 روند تتمشى مع حبيبها فادي في احدى الطرقات وكان هذا الحوار

روند : بتعرف يا فادي !!المصاري هي اساس البلا كله !!

فادي : ليش بتحكي هيك يا روند ؟؟

روند : بسبب المصاري امي وبيي انفصلو عن بعض !! وبسببها بحس انه كثير من الناس عم تصاحبني لمصلحه مش لذاتي وفوق منه بسبب المصاري كمان بدي اتشتت واترك لبنان وكل رفقاتي اللي بعرفهم !!

فادي : حبيبتي !! هي هيك الحياه !! لازم نضحي باشياء كثيره مشان نعيش !!

روند : نضحي !! ومشان شو ؟؟ مشان مصاري؟؟ لك انا مستعده ضحي بالمصاري كلياتها مشان ضل هون بلبنان ومشان ضل مع رفقاتي وجنب خيي وامي !!

فادي : وخيتك حنان !! شو منا بالحسبه ؟؟

روند : لكان !! بس انت بتعرف انه حنان بدها تسافر لدبي مع خطيبها !!

فادي : بس انا ياللي بعرفه انه العلاقه بينك وبين امك منا منيحه !!

روند " وبتعبيرمحزن " : اي بعرف !! وهيدا الشي ياللي معذبني !! بس انا والله بحبها بس هي ما بتبادلني هالمحبه !! يمكن لانها انفصلت عن بابا وبتحس اني اقرب لبابا منها !!

بتعرف؟؟؟ والله بتمنى انه البابا والماما يرجعو  لبعض

فادي يقول في نفسه " : اي الله لا يرجعهم لبعض !! شوو .. احنا ما صدقنا !! قال يرجعو قال

المشهد الثاني عشر / اللقاء الاول

بينما كان وليد يتجول بموقع الرياضه كان بالجانب الاخر يتحدث مع الاصدقاء الجدد عبر الماسنجر والذين عرفهم عن طريق منتدى الرياضه !!

واثناء حديثه دخل صديق جديد لقائمة المتصلين لديه !!وما هي الا لحظات حتى بادله هذا الوافد الجديد بالكلام .

الطرف الاخر : hiii

وليد : اهلين حياك الله اخي !! مين معي؟؟

الطرف الاخر : i am girl

وليد : عفوا !!!!

الطرف الاخر : انا بنت !! واسمي روند

وهنا تنتهي هذه الحلقه

فكيف سيتعامل وليد مع اول فتاه يتكلم معها ؟؟ تابعونا بالحلقه القادمه