|
تذكر ان هناك الكثيرين يتمنون لو كان عندهم صديق مثل صديك
قبل البدء بالحلقه الثانيه !!
كلمة شكر من اعماق القلب وجب توجيهها الى الاخ MuRRaY FoR EvEr
والذي لم يتوانى عن تلبية النداء للتعاون في اخراج هذا المسلسل
فقد كان هذا الاخ من طليعة من تعاون معي في وضع التصميمات الخاصه بحلقات باب الحاره / وها هو الان يرفض الا ان يكون في الموعد فتحياتي لك يا اخي العزيز
وايضا كلمة شكر اوجهها للاخوه الذين حرصوا على متابعة الحلقه الاولى وبالاخص من كلف نفسه بالرد والتشجيع .. واعدكم ان لم ولن تندموا على المتابعه . فسيحمل المسلسل باذن الله كل التشويق والروعه
واريد ان انوه هنا الى اننا سنعمل من الان فصاعدا على ادخال ممثلين حقيقين لتقمص شخصيات العمل !! وسنعرف كل شخصيه ومن الممثل الذي تقمص شخصيتها عندما ياتي دورها في الحوار !!
الى من فاته متابعة الحلقه الاولى
احبتي !! كنا قد تكلمنا في الحلقه السابقه عن وليد وبعض من خصائص شخصيته والتي سنتوسع فيها اكثر مع تتالي الحلقات !! وكيف اتجه لعالم كرة القدم من حيث المتابعه والاهتمام !! وتكلمنا ايضا عن صديقه غسان وقصة حبه ..
والان نكمل ما وصلنا اليه ..
" ما بين الصداقة والحب " " الحلقه الثانيه "
المشهد الاول / حزن والم
 
وليد" وقام بدوره الفنان ميلاد يوسف": شو مالك يا غسان !! ليش وجهك شاحب ؟؟
غسان "وقام بدوره الفنان باسل خياط "يصمت .. وينظر الى وليد وكله حزن والم !! ويقول : ما في شي
وليد : غسان !! مالك ؟؟ ما تعودت تخبي عني شي !! !!! صاير شي بينك وبين نور؟؟؟
تعتصر عينا غسان بالدموع ويرتمي باحضان صديقه ويقول : نور بدها تنهي العلاقه !!!
وليد يتنهد ويقول : مثل ما توقعت !! بس ليش بدها تنهيها شو اللي قلبها هيك؟؟
غسان : ما بعرف !! رفضت تحكي !! كل اللي قالتلي اياه لازم نترك بعض .. احنا مش لبعض !! خلينا نفترق ويضل اللي كان بينا مجرد ذكرى حلوه .
وليد : لا حول ولا قوة الا بالله !! طب ما حكت الاسباب
غسان : بقلك ما رضيت تحكي !!
وليد : طيب رووق .. رووق !! الا ما يبين السبب !
انا حكيتلك يا غسان من قبل !! الا ما يجي يوم تفترقوا !! لانه الحب هيك " نهايته فراق "
غسان : ولك اللي مجنني انه ما في سبب واضح !! بطلع على حالي !! غلطت بشي عملت شي زعلها ؟؟ بس ما لقيت جواب
وليد : نصيبك يا غسان !! شو بدك تعمل يعني !!
غسان : شو شو بدي اعمل !! فكرك راح اسكت؟؟ انا بكره بدي اوح على الجامعه وافهم منها ليش بدها تتركني !!
وليد يضع كفيه على وجنتي غسان ويقول له : اهدا يا غسان اهدا !! وحده ما بدها اياك بدك تجبرها ترتبط فيك ؟؟
غسان : يا زلمه ما بدي اجبرها انا بس بدي افهم !!
المشهد الثاني / صحبة في الجامعه
مع مضي ايام الجامعه تكونت لدى وليد صداقات جديده كان لها حيز كبير في قلبه !! وعلى مقعد في احد زوايا الجامعه يلتقي فيه وليد مع رفاقه دائما كان هذا الحوار
عميد" وقام بدوره الفنان قيس الشيخ نجيب "" صديق مقرب " : صباح الخير وليد !!
وليد : الله يسعد هالصباح من الله !! شو عامل !!
عميد : شاي وقهوه الله كيلك !! شو اخبارك انت ؟؟
وليد : زباله !! بعيد عنك
عميد : اوف اوف !! مالك ؟؟
وليد : بتعرف صاحبي غسان؟؟
عميد : اه هذا الجهم " اللي مطقع لكل الدنيا "
وليد : هو بعينه !! مبارح حبيبته تركته !!
ويقطع عليهم الحديث شاب يدعى " عمار الدلع " وقام بدوره الفنان محمد قنوع " من نفس بلدة وليد .
عمار : صباح الخير !!
عميد: يا صباح الخيرات !!
عمار : شو يا وليد .. السلام لله !! ليش ما بترد
وليد : لما تطرح السلام بنرد عليك بعدين هي عميد رد عليك شو هو كسب يعني !!!
عميد : له له له !! لا يكون زعلان علشان مبارح طبلناكم بالدوري !!
عل كل انا رايح .. عندي موعد .. تشااااااااو
وليد : اوووووووف !! نكد !!
يا زلمه هالولد ما بطيقه بالمره !! الله حط فيه كل الصفات اللي بكرهها !! مايع وغلس !! وعشان تكمل بشجع اسي ميلان !! لا وشو اسم على مسمى " عمار الدلع "
عميد : دشرك منه !! هذا واحد ما بيسوى بصله !! بس معه حق !! لا يكون نتيجة مبارح ماثره عليك !!
وليد : اكيد متضايق من النتيجه بس غياب رونالدو بسبب الاصابه مؤثر كثير على نتائج الانتر !!
بتعرف !! لو محلك ببطل اشجع الميلان !! لانه واحد زي عمار بيشجعه !!
عميد يلمح غسان من بعيد : وليد !! صح هداك اللي هناك صاحبك غسان ؟؟ شكله بيدور عليك !
وليد : اه هو بالاذن عميد !!
المشهد الثالث / ما قبل المواجهه
غسان : شفت نور ؟؟
وليد : هلا بكون عليها محاضره !! نص ساعه وبتخرج !!
غسان ياخذ نفسا عميقا من السيجاره التي بيده ويقول : ماااشي !!
وليد : اسمع !! اياك تتهور !! اوعك تلح عليها ان رفضت تحكي او تنرفز او تصير تترجى فيها !! بمسح فيك الارض
غسان : على شووو !! لا تخاف علي !! انا هادي لابعد الحدود !!
وليد : غسان !! اياك تنكسر او تفرجيها دموعك !! مهما كانت النتيجه !!بدي اياك مثل ما بعرفك قوي
غسان : بتخاف علي يا وليد !!
وليد : له يا غسان !! كرامتك هي كرامتي !! " ويبتسم "واذا انمسحت كرامتك انا بنمسح معك !!
المشهد الرابع / صراع الفراق
بعد ان خرجت نور من المحاضره كان غسان بانتظارها "وقد خرجت مع احدى صديقاتها " !! تفاجات نور من وجود غسان وقد استاذنت من صديقتها بعد ان المح لها غسان بضرورة بالتكلم معها
غسان : مرحبا نور !!
نور " وقامت بدورها الفنانه روعه السعدي " : اهلين غسان !! كيف حالك ؟؟
غسان : شو بتتوقعي حالي يكون بعد اللي سمعته منك ؟؟
نور : اسمع يا غسان !! انا اتخذت قراري !! وما راح اتراجع عنه !! انا فكرت كثير ووجدت انه احنا مش لبعض !!
" ويجري هذا الحوار وقد كان وليد يراقبهم بمسافه ليست بعيده عنهم "
غسان : حب اربع سنوات مليان بالمشاعر تنهيه هيك بكل سهوله؟؟؟
نور : افهمني يا غسان !! ما بدي تزعل وتضايق من هالشي !! كل انسان باخذ نصيبه بهالدنيا !! واحنا قضينا فتره حلوه مع بعض !! خلينا ننهيها نهايه حلوه
غسان : وهاي هي النهايه الحلوه؟؟ فكرك انا راح اقدر اعيش بدونك؟؟
نور : غسان !! سافر !! يمكن تقدر تنساني!!
غسان : اسافر؟؟ اذا اللي هون ظلموني بدك الاغراب ما يظلموني !!
نور : اسمع يا غسان !! بدي احكيلك شي !! احنا كنا صغار !! وهلا كبرنا !! والكبر بيعنيلي الوعي !! ولما صرت واعيه ادركت انه اللي كان بينا ما بيتجاوز قصص الحب الطفولي .. مشان هيك فكرت بالنسيان وقررت انساك !!
وهنا يبدا صوت غسان بالارتفاع .. مع ملاحظة وليد لذلك
غسان : هلا كل اللي كان بينا بتسميه حب طفولي؟؟ وبيوم ليله كبرتي؟؟ اذا كنا صغار ليش تدخلي لعبه انتي مش قدها !!
وبدا على نور الارتباك والقلق مع ارتفاع صوت غسان الامر الذي لاحظه من حوله !!
وليد ينتبه لهذا الامر ويذهب الى غسان فورا لتهدئته وسحبه ..
لكن غسان مستمر بنرفزته وصراخه بلا وعي منه ولم تجدي محاولة وليد لتهدئته اي نفع
وليد " يمسك بغسان بقوه لمحاولة ابعاده عن منطقة نور ويقول بصوت مرتفع : خلاص يا غسان اهدا .. سيبك منها " وكأن وليد غير موجود "
فما كان من وليد الا ان صفعه على وجهه حتى هدا غسان وهدا الجدل حولهم !! وكأن غسان كان في غيبوبه !! فينهار غسان ويبكي ويسحبه وليد الى خارج الجامعه وسط ذهول وتساؤل من الطلاب الذي كانوا حولهم !!
المشهد الخامس / وانتهى كل شيء
اخذ وليد غسان لخارج الجامعه وركبا بسيارة كانت مع وليد " ليست ملكه انما لاخاه وحيد " وانطلقا
وليد بعصبيه : شو اللي عملته يا غسان ؟؟ ليش هيك ليش!!
غسان بحزن شديد : يا زلمه بتقلي كنا صغار .. كنا صغار !! ولوو ليش هيك يا الله !!
وليد : وحد الله غسان !! الدنيا ما خربت !! بس انت اللي عملته كان كله غلط بغلط !! هيك خليت حالك فرجه للي بيسوى واللي ما بيسوى
غسان : يا زلمه طز في الجميع !! هو انا سائل بحدا !! خلي كل الدنيا تخرب بعد اللي صار !!
وليد يوقف السياره فجاه : لك مجنون انت !! هو انت اول واحد ولا اخر واحد بتتركه حبيبته؟؟؟ هلا انساك من نور واهتم بحالك ومستقبلك !!
غسان : اي مستقبل يا زلمه : ولك انا كل حالي وحياتي ومستقبلي كنت مسخره الها وعلشانها !!
وليد : غسان !! بتعرف ليش تركتك نور؟؟
غسان : لانا كنا صغار " ويقولها بسخريه "
وليد : لا يا غسان !! بلا شك كنتوا صغار وبالعقل احسبها !! لما انت صرلك 4 سنين بتحبها يعني وانت عمرك 15 او 16 سنه !! يعني بالمشرمح مراهقين كنتوا !! وبالفعل حب طفولي " ينظر غسان لوليد بنظرة عدم اعجاب " ويكمل وليد " لا تزعل مني بس هي الواقع !! اللي عندهم وعي وعقل وبيحبوا وهم بالغين وبسن الكبر بيتركوا بعض لتيجي انت ونور وبدكم تستمروا؟؟ اي الله ما بيقولها هاي !!
غسان : بس هلا احنا كبار يا ولييد !!
وليد : صح ومشان هيك تركتك نور !! لسبب بسيط !! نور بتعرفك واحد بايع الدنيا براس مالها !! وهي عندها احساس ومتاكده انك ما راح تجتاز الثانويه العامه " التوجيهي " فحسبتها بالعقل " انا صرت بالجامعه وبكره بصير معي شهاده لكن زوجي او حبيبي ما بيحمل شهادات وحيكون مجرد عامل او اجير عند الناس !!
حست بالفرق الثقافي المستقبلي بينك وبينها !! مشان هيك اتخذت الخطوه هاي واللي بتظن انها المناسبه
غسان : بس يا وليد الحب بيكسر كل الحواجز ومش معقول يكون هذا هو السبب
وليد : معقول ونص !! البنت لما تدخل الجامعه بينقلب تفكيرها مليون درجه !! مشان هيك اللي بدي اياه منك انك تشد حالك بدراستك وتدخل الجامعه وتثبتلها انك افضل منها !!
غسان يصمت ولا يتكلم باي حرف !!
وليد : على فكره انا بعتذر منك لاني ضربتك قدام الجميع !!
غسان " يبتسم ويقول " : ولا يهمك !! ضرب الحبيب زبيب !!! بس قلي كيف طالع بسيارة اخوك وانت ما معك رخصه !!
وليد : يا شييخ !! هو في قانون عنا ؟؟ ولك مين اللي معه رخصه بكل اللي حواليك !! بلاش !! مين اللي معه سياره رسميه حتى !! خليها على الله
المشهد السادس / وبعد زمن
 
مجدي " وقام بدوره الفنان ادهم مرشد" " صديق مقرب لوليد " من صحبة الجامعه " صاحب نكته وطله مفرحه !! ياتي للجماعه صباحا فيجد كل من وليد وعميد وكذلك عبد الله " وقام بدوره الفنان نضال سيجري " " صديق اخر " يجدهم في مكان دائما يجلسون فيه
مجدي " ياتي عليهم وكله فرح " : هالوووووووو !! يا صباح المغاليب !! يا صباح العسل والتعليم على بعض الناس !! ويبدا بالسلام عليهم واحدا واحدا !!
وليد يفهم مقصد مجدي " لان فريقه الانتر خسر من الفريق المحبب لمجدي " الميلان " فيقول : ولك الله يخزيك على صباحك العكر !! ولك هو في خير بالدنيا طالما اشباهك موجودين !!
فيضحك الجميع واكثرهم مجدي !! اما وليد فيحمر وجهه بهزيمة الامس
عبد الله : هو وليد بيشجع فريق وبتقوم له قيامه ؟؟؟ والله ما ضيع الانتر الا انت !!
وليد : يا زلمه هو لولا البعبع " رونالدو " مصاب ولا بتحلموا تفوزوا علينا ؟؟؟
مجدي : يا شباب الشاي والقهوه اليوم على حسابي ويبدا باغاظة وليد
وليد يمسك مجدي ويبدا بضربه من باب المزاح وسط ضحك بقية الاصحاب !!
عميد : سمعت انهم بدهم يغيروا مدربكم يا وليد !!
وليد : انا عارف من وين بتجيبوا هالاخبار هاي؟؟
مجدي : ولو من النت !!في موقع خاص بالدوري الايطالي بتلاقي فيه كل الاخبار !! وفيه كمان منتدى !! بتلاقي فيه قسم للميلان وقسم للانتر وقسم لليوفي !!
وليد : ومن وين بدي اجيبه هذا؟؟ لا عندي كومبيوتر ولا ما يحزنون !! بس ومع ذلك اعطيني اسم الموقع !! بروح على احد المقاهي وبتعرف عليه !!
ويعطيه مجدي اسم الموقع " والذي سيكون بدايتنا مع القصه "
وهنا ياتي " عمار الدلع " بثقالة دمه ومياعته : صباح الخير شبااااااااااااااااااااب
وليد : شباب انا بستاذن عندي محاضره مستعجله !! " وذهب لانه لا يطيق الجلوس مع المدعو عمار الدلع "
المشهد السابع / حاجز بينه وبينهن
وليد في الجامعه ويجلس مع عميد في مكانهم المعتاد !! وقد كانت امامهم فتاه جميله !!
وليد : يا الله !! سبحان اللي خلقها !! شوف شوف هالبنت !! اهدا من هيك عيني ما شافت !! صدق لو تمر من جنبها بتحس حالك اطرش !!
عميد : اذا عاجبتك روح احكي معها !! اتعرف عليها !! ترى هاي البنت معي بتاخذ محاضرات !! وما سبق وشفتها مع اي شب !!
وليد : لا يا عميد !! انا معجب فيها مزبوط بس من بعيد لبعيد !!
عميد : طب ليش هيك !! لك اطلع على كل اللي حواليك !! كل واحد مصاحب بنت !! الا انت !!
وليد : شايف كل هدول البنات؟؟ كل وحده الها مصلحه مع شب !! اما بكون شاطر وبدها يغششها !! او يحضر محاضرات عنها !! او معه سياره ومصاري !! يعني الاغلب مصلحه
عميد : بس فيه حبيبه هون !!1 ناس كثير بيحبوا بعض !!
وليد : ااااااااااااه !! حب !! بيكفي اللي شفته من تجارب غيري !! كلهم سقطوا مثل حبات المطر !! واخرهم كان غسان ومش راح يكون اخر واحد !!
عميد : اه صحيح شو اخباره غسان ؟؟
وليد : غسان؟؟ ولك بعد تجربة غسان كرهت البنات وكرهت اللي بيحبوا !!
عميد : ولو ليش شو صار؟؟
وليد : غسان مستقبله تدمر !! بعد ما كان متحمس ليعيد التوجيهي ويدخل الجامعه !! فقد حماسه لما فقد نور !! واعطى ظهره لكل الدنيا وبطل يسال بشي !!
وهيو كل يوم والثاني بيشتغل شغله وبيتركها !! ولسه بتقلي حب؟؟؟
عميد : بس هذا مش سبب يخليك تمتنع انك تحكي مع بنت عجبتك !!
وليد يتنهد " ااااااااااااه " : بتعرف يا عميد !! راح قلك شي بصراحه !! ولاول مره بحكيه لحد !! حتى لغسان ما حكيته !!ولما احكيلك اياه يعني لازم تعرف انه مرتبتك عندي مش قليله " ويتبسم "
عميد : هاي ثقه بعتز فيها !! شو هو هالشي اللي بدك تحكيه !!
وليد : مزبوط انا بخاف من نتيجة الحب !! ومزبوط انا حاب احكي مع هاي البنت الهاديه واتعرف عليها !! لكن بصراحه ما عندي جراه !!
عميد : بتخاف؟؟؟
وليد : هيك شي !! ما عندي الشجاعه الكامله اني اوقف بنت واقلها ممكن نتعرف او مرحبا او هيك شي !! يعني ما تحلم انه تكون المبادره مني !!
عميد : ولك هي بدها تطخ عليك او توكلك !!
وليد : بكون اهون صدقني !! يا ابن الحلال من فتره احد الاصحاب راح يتعرف على بنت من هون بالجامعه !! قالته ما بحكي مع شباب !! بس اصيراحكي بوصيلك !! تقول هو مرتبان لين وبدها توصي عليه !!
عميد ينفجر من الضحك !! ويتابع وليد : بدك موقف بخزي اكثر من هيك؟؟ وللعلم البنت هاي ما مخليه شب بالجامعه الا وحكت معه !!
عميد : تزعلش مني يا وليد !! بس هذا انا بعتبره ضعف شخصيه منك !!
وليد : بيني وبينك فكرت بهالموضوع وقلت يمكن يكون ضعف شخصيه مني اني اخاف احكي مع بنت !! بس برجع وبقول !! هيك اريحلي !! واريح لراسي !!
مشان هيك بتلاقيني مقبل على كرة القدم بنهم شديد وبجمع صور ومجلات وصحف وكلللللل شي بيتعلق بكرة القدم مشان تلهيني عن هذا الجانب !!
ولسه .. بدي ادخل عالم الانترنت واتعرف على الانتر وكرة القدم اكثر واكثر .. وقد ما فيي ابعد عن هموم البنات والحب واللي بيحبو ..راح ابعد .
المشهد الثامن / اللا مكان واللا زمان
في المساء توجه وليد لاحدى مقاهي الانترنت حاملا معه اسم الموقع الخاص بالدوري الايطالي والذي اعطاه اياه صديقه مجدي !!
جلس وليد في المقهى وبدا بتصفح الموقع !!
اخذ وليد وقتا طويلا يتصفح فيه الموقع ومن ثم دخل الى المنتدى الخاص بهذا الموقع !! فاعجب كثيرا بالمنتدى والمواضيع المطروحه فيه ..
اخذ وليد جهازه النقال واتصل على صديقه مجدي
وليد : الوو !! مرحبا مجدي
مجدي : اهلين وليد كيف الحال !!
وليد : تمام التمام !! اسمعني !! انا هلا بمقهى انترنت ودلخت على الموقع اللي عطيتني اياه !! ودخلت المنتدى !!
سؤالي !! انا شايف اسماء غريبه " انتراوي " والانتر للابد " وعاشق ريكوبا " واسماء كثيره !! وكل واحد فيهم كاتب شغله وتحت منه كذا اسم بيرد على اللي كتبه !! هل هدول ناس عاديين مثلي ومثلك ولا هم اصحاب الموقع ؟؟
مجدي يضحك : ههههه لا يا حمار !! هدول اسمهم اعضاء ! يعني ناس من كذا دوله بيشاركوا في المنتدى وكل واحد بيكتب اللي بدو اياه !! بس ضمن قوانين محدده !!
وليد : يعني بقدر انا اكتب كمان ؟؟
مجدي : اه اكيد بتقدر بس لازم تسجل في المنتدى بالاول
وليد : وكيف بدي اسجل !!
مجدي : بالاول لازم يكون عندك ايميل !!
وليد : لا ما عندي !! من وين بدي اجيبه هذا ؟؟
مجدي : خلاص اسمع !! بكره انا بعملك واحد !!
وليد : ماشي يا كبييير !!! شكرا الك وبكره بشوفك !!
وبعد هذه المكالمه استمر وليد بتصفح المنتدى بنهم شديد وامضى ثلاث ساعات في هذا الامر
وليد ينظر الى الساعه ويحدث نفسه: اووووف صارت الساعه 10 !! يا الله / صرلي اكثر من ثلاث ساعات / والله هالمنتدى بحر !! خليني اروح وبكره النا حكي ثاني !!
المشهد التاسع / مره اخرى في الجامعه
في صبيحة اليوم التالي كان اللقاء المعتاد بين الاصدقاء في الجامعه !! وكان في اللقاء كل من عميد وعبد الله
عميد : ما شفت مجدي ووليد!! بالعاده بكونوا هون بهالوقت
عبد الله : يا سيدي وليد اخذ مبارح حقنة انترنت / وشكله بدو يغوص بهالعالم هذا !! كان هو ومجدي مع بعض لما سالتهم قالوا بدنا نروح نعمل ايميل !
عميد : ايميل لوليد؟؟ ليش ما بيعرف يعمل !!!
عبد الله : شو بدو يعرفه / بجوز هاي ثاني مره بستخدم فيها الانترنت
لحظات وياتي مجدي ووليد !! : يا صباح الخيرات !!
يرد كل من عبد الله وعميد : الله يسعد هالصباح !! ويتابع عبد الله : شو !! ان شاء الله زبطته لوليد ؟؟
وليد : والله زبطني على الاخر !! وعملي ايميل اخر موديل !!
عميد : وليش بدك الايميل يا وليد ؟؟ لا عندك كومبيتور ولا نت !! ولا علشان اي وحده تسالك شو ايميلك تعطيها اياه !!
عبد الله : ولك هو ينفع بس !! خليه يتعرف على وحده وانا بعطيه الف ايميل !! بس هو يحرك حاله !!
وليد : لا يا عمي !! لا بنات ولا ما يحزنون !! شو بدي بوجعة الراس هاي !! انا بس عملت الايميل علشان اشترك بمنتدى الرياضه !! بصراحه مخخت عليه !!
عبد الله : انا عارف عنك !! ضلك وراء الرياضه لاشوف شو بدو يجيك منها !!
وليد : سيدي !! شو ما يجي منها بضل احسن من البلاوي اللي بتيجي من وراء البنات !!
مجدي : والله يا حزين اللي خايف منه راح يطلعلك !! والنت عالم مليان بالبنات !! وبكره بتبطل تعرفنا !! عيارك دخلت النت راح تشوف اللي عمرك ما شفته
وليد : شوف اقلك .. انا مزبوط عملت الايمل لاجل الرياضه بس ما بدي اسجل بالموقع هلا !!بعد اسبوع جايني جهاز كومبيوتر وبعد ما اشبك انترنت عليه وقتها بسجل !! لانه بدك الصراحه اللي شفته بالموقع بده متابعه يوم بيوم !! وبيني وبينك شي بيحرق الدم !! يا زلمه والله في اعضاء بالمنتدى هذا بكون الي خاطر ادخل الكومبيتور نفسه واضربهم ،، وفي اعضاء ثانيين سكر !!1 كلامهم كله عسل
مجدي : معلوم !! اي واحد بيمدح الانتر بكون حبيبك !!
وليد : ومع ذلك برضو حاسس حالي ضايع !! بلا ما يصير عندي بالبيت انترنت ما راح اخذ راحتي !!
ويتدخل هنا عميد مقاطعا بعدما لمح الفتاه " الهادئه " والتي اعجب بها وليد ويقول : وليد وليد !! شووف شوف مين هناك !!
وليد : ولكم الله يخزيكم !! مين هذا الشب اللي ماشيه معه ؟؟ على الحساب ما بتحكي مع شباب !!
يضحك مجدي بشده ويقول : بس هذا مش اي شب يا لوح !! هذا خطيبها !!
وليد بعد صمت : شفت يا عميد؟؟ وبدك اياني احكي معها ؟؟ كان شحبرتني .. مشان هيك كل يوم بزداد قناعه اني ما احكي مع اي بنت !!
ايام معدوده مضت !! واصبح لدى وليد " جهاز كومبيوتر " ولكن تزامن ذلك مع انطلاق انتفاضة الاقصى !! حيث غطت احداثها على كل الاحداث !! وصارت الرياضه بالنسبه لوليد شيئا ثانويا !! ليس برغبة منه انما وقع الحدث كان هو المؤثر على كل نواحي الحياه هناك !!
وارتقى الشهداء وانقلب الهدوء الى حالة من الارباك والقلق وكذلك الحزن تلو الاخر !!
وجاء موعد الاقتحام !! موعد اعيد فيه احتلال الضفه الغربيه مرة اخرى !! عاش فيه وليد واهل الضفه اياما صعبه / منع للتجوال ، انقطاع للكهرباء قرابة ال20 يوما / في تلك الفتره كان محرم على احد فتح نافذة بيته خوفا من التعرض لاطلاق نار قناصة الاحتلال الموزيعين على معظم الاسطحة والمنازل !! كل الشوارع والازقه خاليه .. لا تجد الا القطط وبعض الكلاب الضاله بالاضافه لمجنزرات ودوريات الاحتلال والتي كانت تمشي على انغام الرصاص الامبرر / وانما لالقاء الذعر في قلوب الاهالي ..
المشهد العاشر والاخير / وتستمر الحياه
بعد هذه الاحداث باشهر قليله عادت الحياه شيئا فشيئا الى المدينه !! ولكن ظل وقع تلك الايام السوداء ماثلا اما الجميع !! ايام يصعب نسيانها او تداركها !!
وعادت الحياه الفعليه الى الجامعه بعد اشهر من الدوام المتقطع / والذي مضت فصوله بصعوبه
وليد يشرب فنجان من القهوه في مقعد لطالما حلم ان يعود اليه بنفس المشاعر والاحاسيس السابقه !! وجاء الاصدقاء
مجدي / عميد / عبد الله : صباح الورد يا ولييد
وليد : اهلين بالشباب !! " وبعد ان اخذ كل منهم موقعه !! بدا الحوار
عميد : بالكم راح يمر علينا اسوء من الايام اللي مضت
مجدي : هي الانتفاضه بعدها شغاله !! بس اكيد ما راح يضل فيها مظاهرات !! لانه اليهود صاروا يدخلوا البلد باي وقت ودون مشاكل
عبد الله : ومع ذلك بضل الوضع احسن من اول !!
عميد : فكركم يا شباب ضل النا مستقبل؟؟ مستقبلنا راح واتدمر !! والله ما ظنيت هالبلد تقولمها قايمه بعد اللي صار
وليد : اي مستقبل يا زلمه !! هو في مستقبل بالاصل ليضيع .. بعدين احنا عايشين على الروتين !! كم شهر وبنتخرج واما بنترمي بالبيوت او كل واحد فينا بروح على احدى الورش لحد ما يلاقي وظيفه !!
مجدي : ولك اي وظيفه واي شغل !! هو ضل اشي بهالبلد؟
عبد الله : بالنسبه الي ما بدي وظيفه ولا بدي شغل !! طالما في دخان وانترنت فالدنيا بالنسبه الي بخير !!
يضحك الجميع ويقطع ضحكاتهم وليد : يااااااه !! الله يجازيك يا عبد الله !! ذكرتنا بالانترنت وبالرياضه !! والله لازم نرجع الحيااه زي اول !!
واذا كانت الحياه هون صعبه فلازم نتاقلم معها ونتعايش معها ونعيش حياتنا زي كل العالم بدون ما نتباكى او نشكي من الظروف !!
عميد : صحييييييح !! ولك ما حليتنا يا وليد !! البرازيل اخذت كاس العالم من شي شهر وصاحبك رونالدو جاب الهداف ! شو بدك تمرقها بدون حلوان ؟؟
وليد : شوف لاقلك !! احلا ما في الموضوع انه رونالدو رجع من الاصابه ورجع لمستواه !! بس الفرحه الاكبر يوم يفوز بالدوري مع الانتر
مجدي : هاي تحلمش فيها !!! لسببين !! الاول انه الميلان سيدكم وتاج راسكم ما راح يسمحلكم !! والثاني انه رونالدو بدو يترك الانتر !!
وليد : الله يسم بدنك على هالخبريه !! من وين جبتها !!
مجدي : من الانترنت !!
وليد :خلاص ما ضل فيها بدي جيب انترنت انا !! بس والله كارثه انه رونالدو يترك الانتر
مجدي : شو ناوي تعمل !! بدك تلحقه وين ما بيروح؟؟
وليد : مزبوط رونالدو هو سبب محبتي لكرة القدم وهو اللي خلاني احب الانتر !! لكن الانتر كفريق بيخليك تحبه غصب عنك !! بيكفيانه فريق مظلوم ومضطهد على مدى سنين عمره !! مشان هيك ما راح احب اي فيق غير الانتر !! لكن اكيد رونالدو راح اضل اشجعه وين ما يروح
وتنتهي هذه الحلقه !!
في الحلقه القادمه ستبدا حكايتنا الفعليه !! وسنعرف ما الذي سيحدث لوليد حينما يغوص في عالم الرياضه عبر الانترنت وكيف سيكون لذلك تاثيرا واضحا في حياته وسلوكياته !! فهل سيستطيع ان يتجنب النساء؟؟ ام سيلاقيهن بانتظاره في عالم الانترنت؟؟
تابعونا في الحقه القادمه مع احداث جديده ومؤثره !! مع قصتنا والتي للتو بدات
| 
