السلام عليكم ورحمة الله وبركاته

ومعكم يتجدد اللقاء احبتي ..

بالمناسبه احب ان اطمئنكم ان كل الاحداث والعقد التي ضلت مخفيه في الجزء الرابع من مسلسل باب الحاره ساعمل على حلها وانهائها بحبكه مقنعه ان شاء الله .. فلا تقلقوا لتغييب قضيه معينه لهذا الوقت .. كل اتي بوقته .. لكن المهم دعواتكم ان يوفقني الله في ايجاد حلول مقنعه لبعض القضايا المستعصيه التي وضعنا فيها " الكاتب كمال مره " :)

ولمن فاته مشاهدة الحلقات السابقه فعليه الدخول هنا :-

الحلقة الاولى

المسلسلات العربية

ملخص لاحداث الجزء الخامس لباب الحاره '' الحلقه الاولى ''

00:32 - 10/13 شمس الانتر

28

693

04:17 - يوم أمس makki

الحلقه الثانيه

المسلسلات العربية

الحلقه الثانيه '' باب الحاره ج5 ''   1  2

01:09 - 10/14 شمس الانتر

33

567

05:54 - 10/17 الراجح23

الحلقه الثالثه

المسلسلات العربية

الحلقه الثالثه '' باب الحاره ج5'' " شرخ يصيب حارة الضبع "   1  2

03:07 - 10/15 شمس الانتر

31

451

01:10 - 10/17 مجنونة قصي وسلاف

الحلقة الرابعه

المسلسلات العربية

الحلقه الرابعه '' باب الحاره ج5 '' '' ابو عصام يستعيد ذاكرته '' بقلمي   1  2

02:43 - 10/16 شمس الانتر

35

402

11:21 - 10/17 weeh7ate

الحلقة الخامسه

المسلسلات العربية

الحلقه الخامسه '' باب الحاره ج5 '' '' سرقة دكان ابو خاطر ورياض يعود ''

03:30 - 10/17 شمس الانتر

27

389

12:33 - يوم أمس shatara

الحلقة السادسه

المسلسلات العربية

الحلقه السادسه '' باب الحاره ج5'' '' ابو عصام يقرر عدم العوده للحاره ''

02:59 - يوم أمس شمس الانتر

23

283

01:24 - اليوم بالوخه

كنا قد وصلنا في الحلقه السابقه عند المشهد الذي تضمن عرض مامون بيك لابو ساطور بان ينتقل ليعيش في حارة الضبع ..

ونتابع الان

الـــحـــلـــقـــة الـــســـابــعــه

المشهد الاول ... مامون بيك في دكان النمس

مامون بيك : لك يا نمس

النمس : امرك مامون بيك

مامون بيك : بدي تشوفلي هيك محل يكون منيح ..

النمس : ولمين بلا صغره ؟؟

مامون بيك : شو دخلك انت لمين .. انت بس شفلي محل وخلص مع صحابو

النمس : سيدي في محل بس ما فيني خلص مع صحابو .. خلص معهم انت ..

مامون بيك : محل.. وين ولمين ..

النمس : محل ابو ابراهيم " الله يرحمه " بياع القماش

مامون بيك : امممممم بري عليك .. خلص انا بشوف صحابو

يلا بخاطرك .. ويتوقف .. على فكره .. بدي تشوفلي بيعه لبيت ابو ساطور بحارة ابو النار ..

النمس : شووووووو .. ابو ساطووور .. ؟ وليش بدو يبيع البيت ؟؟؟

مامن بيك : هذا مو  شغلك .. ويذهب في طريقه

النمس : العمى / ليش ابو ساطور بدو يبيع البيت؟؟ معقول بدو يطفش من هالبلد كمان مره ؟؟

شيييييييييييييييه

المشهد الثاني ... ابو جاسم وصبحي في الحمام ..

ابو جاسم : اي ابو صبيح .. ما في اخبار عن اختك وجوزها ابو ذراع؟؟

صبحي : لا والله يا عمي .. رحت سالت عنهم محل ما كانوا ساكنين ما لقيتهم رجعوا .. تقول فص ملح وذابو

ابو جاسم : بالاول حكوا انه ابو ذراع قتل اختك   " بعيد الشر عنها " بعدين قالوا انه الجثه اللي بيته لرجال " وبالاخير قالوا انها لابو شهاب ...

صبحي : لا لا لا .. ما بظن لابو شهاب .. حتى ما بظن انه ابو ذراع يكون قاتل حد ..

ابو جاسم : لكان؟ والجثه اللي نقلها ابو ساطور ..؟

صبحي : لا عمي .. ابو ساطور بيكذب .. لانه ابو ذراع تغير كثير بالفتره الماضيه .. يعني ما بظن يعملها

ابو جاسم : لاحول ولا قوة الا بالله

مشهد اخر .. معتز في قهوة ابو حاتم ويجلس مع مامون بيك ..

مامون بيك : شو بدي قول عقيد .

معتز : قول يا بيك ...

مامون بيك : محل ابو ابراهيم .. الله يرحمه " .

معتز : الله يرحمه .. شبو المحل ؟

مامون بيك : يعني عم قول اختك وام ابراهيم الهم مصلحه بالمحل؟؟

معتز : والله ما بظن بس . ليش

مامون بيك : ابدا والله بس بدي استاجره لرياض . خطي .. الرجال التعب عليه ملعوب  ولازم نوقف معه .. فكنت عم قول بستاجرله شي محل يشتغل فيه .. يعني .. لحد ما يوقف على رجليه مره ثانيه ... ونصحوني بمحل ابو ابراهيم ..

معتز : الله محيي اصلك مامون بيك .. انا ان شاء الله اليوم بروح لعند اختي وبفتح الموضوع معها ..

ويتابع . وهلا بخاطرك عمي .. بدي طل على عصام شوي ..ويذهب معتز لمحل عصام ..

وفي هذه اللحظه يدخل ابو جودت ومعه عناصر الكاراكون ..وفي نيتهم اعتقال معتز .. فيقفون امامه .. وبتبادل لنظرات مليئه بالغضب بينهم يامر ابو جودت بكل بروده اعصاب  عناصره ويقول لهم " اشحطوه للكاركاون "

فتثور ثائرة معتز ويصرخ : قسما بالله اللي بيمد ايده علي بحسب الله ما خلقه ..

فتحدث شوشرة في الحاره وجذب ورد بين معتز وعناصر الكاركون .. فيصرخ مامون بيك من بعيد

استنى انت واياه .. فيصمت الجميع ويقترب مامون بيك منهم .. ويقول :

شو يا ابو جودت .. هي الحاره فلتانه لتدخل عليها هيك وتعمل اللي بدك اياه انت وعناصرك ؟

ابو جودت : العفو مامون بيك .. احنا بس بدنا معتز لنحقق معه

مامون بيك : ابو جودت .. الكلام هذا حطه حلقه باذنك .. عقيد حارة الضبع ما بينشحط للكاركون بالطريقه هاي .. وما بيتحقق معه .. واذا بدك شي مستعجل منه تعال شرفنا على المضافه واسال اللي بدك اياه ..

او بتستنى لبكره بنيجيك انا والعقيد وبنشرب عندك فنجان قهوه وبنشووف وقتها شو بدك .. وطبعا بدون الحاجه لعناصرك هدول ... الله معك .

فيصرخ جميع الحاضرين .. الله يخليك يا مامون بيك يا كبير الحاره .. والله انك ابن اصل وووو...   و كثير من كلمات الثناء والمديح

مشهد اخر ..تتناقل حارة الضبع هذه الاخبار بين رجالها ونسائها وكلهم يبدون اعجابهم الشديد بمامون بيك ..

وفي جلسة بين اكابرية الحاره بدون مامون بيك .. يقول الشيخ عبد العليم

يا جماعه اللي عمله مامون بيك اليوم شي كبيير كبييير كثيير .. ولازم نعمل شي تجاه اللي عمله

ابو مرزوق : هو بس اليوم .. ومبارح واللي قبله . لك يا جماعه وقف مع ابو خاطر ورياض وحتى النمس وكمان خرج ابو ديبو من الحبس .. وغير وقفته اليوم بوش ابو جودت .. والله انه كبييييييييير

ابو بشير : وقفته بوش ابو جودت والكلام اللي حكالوا اياه كانه نسر .. اي والله نسر يا جماعه

ابو حاتم : والله عمله اليوم فاجاني . بس شيخي شو قصدك نردله اياها ما فهمت عليك

الشيخ عبد العليم : يا جماعه الحاره بدون رجال كبير فيها ويمشي امورها ما بيمشي حالها

مزبوط معتز عقيدها وفيه البركه بس لساه باول الطريق ولازم حد يسانده ..

ابو حاتم : قصدك ....... زعيم للحاره.؟

عبد العليم : اي يا ابو حاتم :

ويقف ابو حاتم فجاه ويعبر عن عدم رضاه .. يعني بدكم تحطوه زعيم  مكان ابو صالح؟؟؟ لااااااااااااااااا الا هاي

ابو بشير : روق ابو حاتم : والله الرجال بيستاهل ، بعدين هو من ريحة ابو صالح ومن حقه يستلم مطرحه..

ابو حاتم : حسبي الله ونعم الوكيل .... انا ما بدي اكرر الشي اللي صار يوم وقفت بوش العقيد .. بس بحب قلكم اني مو رضيان عن هالشي ... بخاطركم

ابو خاطر : لا حول ولا قوة الا بالله ..

ابو بشير : يا جماعه بكره الا ما يرضى ابو حاتم .. ما دام الجميع مو معارض ليش ما ننصبه زعيم علينا اليوم قبل بكره

الشيخ عبد العليم : احسنت يا ابو بشير هذا هو الكلام المزبوط ..

مشهد اخر .. الحاره تتلقى خبر تعيين مامون بيك زعيما للحاره

ويبدون اعجابهم بهذا القرار والذي يظنون انه من مصلحة الحاره

بشير : والله ما بظن حد يوقف بوشنا من بعد اليوم لا ابو جودت ولا غيره ...

خاطر : لك رجال والله رجال .. صدقوني يا جماعه بعملته اليوم حسيت انه اللي قدامي ابو صالح الله يرحمه

عصام : يعني فكركم حيكون مثل عمي الزعيم ابو صالح

عبدو: ليش لا .. الرجال ما شفنا منه الا كل خير .. وكل يوم عم يثبت انه بحب اهل الحاره وبدو مصلحتهم ..

ويظهر مامون بيك ..

الكل يناديه اهلين بالزعيم .. اهلين بزعيم الحاره ..اهلين بكبير الحاره

مامون بيك يقف وقفة المنتصر ويتبسم ويبدي تعففه وعدم تعاليه .. ويتجه لاكابرية الحاره ليستوضح الامر ..

مشهد اخر .. ابو جودت في الكاركون ..

ويحدث نفسه العمى .. عقييد؟؟ عقيد مره وحده .. لك شو هاد .. ما صدقنا وخلصنا من ابو شهاب يطلعلنا ميين.؟؟ معتز .. لك اااااخ .. اااااااااخ . ايمتى راح اخلص منكم يا حارة الضبع ؟؟

ويدخل عليه نوري ...

ابو جودت : شو بدك ولا بغل؟؟ هيك الواحد بفوت؟؟؟

نوري  : سيدي بعتذر منك بس جاي خبرك خبريه ..

ابو جودت : احكي خلصنا ..

نوري : حارة الضبع

ابو جودت : شبها حارة الزفت ؟

نوري : عينوا مامون بيك بدل الزعيم ابو صالح ..

ابو جودت : شووووووووو ؟؟ زعيم على الحاره؟؟

العمى . ويكلم نفسه " يخرب بيتك يا مامون بيك .. اتاريك عم تخطط لهالشي " والله ما انت قليل "

اي شو عليه " ويتبسم " والله صارت حاارة الضبع لعبه بايدينا ..

مشهد اخر .. ابو احمد في حارة الضبع ويتجه لقهوة ابو حاتم :

ابو احمد : السلام عليكم

ابو حاتم : يتفاجا من وجوده وينهض من على كرسيه : اهلين ابو احمد .. خير ان شاء الله  .. الشباب بخير ؟؟ 

ابو احمد : كل شي تمام يا ابو حاتم .. بس الجماعه بدهم مصاري وسلاح فشوفوا شو بتقدروا تعملوا ..

ابو حاتم : وصلت .. بس اصبروا علينا شوي .. الحاره وضعها مكركب هاليومين .. مر علي بعد يومين ثلاث وبنحكي في الموضوع

ابو احمد : ماشي ابو حاتم .. يلا بخاطرك .. على فكره الشباب بيسلموا عليكم والك سلام خاص من ابو حسن

ابو حاتم : الله يسلمكم .. سلم عمي وان شاء الله خير

ابو حاتم يجلس على الطاوله ويشرب ارغيله بعمق ويفكر ...

مشهد اخر .. معتز في بيت ابو ابراهيم ..

معتز : اي اختي دلال شو اخبارك اليوم .. ان شاء الله كل شي تمام

دلال : الحمد لله اخي .. شو اخبارها امي وجميله وبوران ..

معتز : كلهم بخير وبيدعولك ..اي خالتي ام ابراهيم ..

بخصوص محل القماش .. يعني هلا هو مسكر وواقف حاله

وفي واحد ناوي يستاجره .. فشو قلتي

دلال : اي والله مرت عمي : بدل ما هو مسكر بيجينا قرشين منه

ام ابراهيم : والله يا ابني ما الي كلمه بعدكم .. شوفوا المناسب واعملوه

معتز : اذا توكلنا على الله

مشهد اخر .. ماومن بيك في المضافه ومعه رجال الحاره ..

مامون بيك : يا جماعه في موضوع حاب احاكيكم فيه بتمنى توافقوني عليه

الجميع : تفضل يا زعيم ..

مامون بيك : الله يخليكم . بتعرفوا انه ابو ساطور بيشتغل معي وهو هلا بحارة ابو النار .. ويعني بشوفها صعبه كل ما بدي منو شي اروح لحارة ابو النار ..

فانا مفكر اجيبه للحاره هون .. فشو قلتوا يا جماعه ..

ابو حاتم : بس ابو ساطور مشراني وتبع مشاكل .. شلون بدنا نرضى بواحد مثله يعيش بيناتنا .. شلون بدنا نامن عل حالنا ؟

مامون بيك : يا جماعه : ابو ساطور من وقت رجعته ما عمل مشاكل وبعدين راح يضل تحت عيني .. وانا بكفله .. وبالعكس ايده راح تكون مع الحاره مو ضدها ..

رجال الحاره بتردد . والله يا زعيم اللي بتشوفوا مناسب اعملوا .. ما النا قول من بعدك ..

مامون بيك : وهي عهدي فيكم .. وانا بعرف انكم مترددين بخصوص هالشي .. بس تاكدوا انه ما راح تشوفوا اي شينه من ابو ساطور .. ومثل ما قلتلكم ابو ساطور تغير عن اول ...

وعلشان نبعده عن المشاكل لازم نكسبه بصفنا وبنكون هيك عملنا خير لوجه الله تعالى

ابو مرزوق : بس وين بده يسكن ؟؟

مامون بيك : راح اعطيه بيت الادعشري .. وابو هلال ترك البيت لاني بعثته لبيروت وراح يضل هناك ..

ينتهي الاجتماع وفي الخارج يقف ابو حاتم مع ابو بشير

ابو حاتم : يا حبيبي : هي الي كان ناقصنا .. المشرانيه والزعران يسكنوا حارتنا

ابو بشير : وكل الله ابو حاتم .. الزعيم بيعرف شو بيعمل .. ولولا انه شايف هيك صح كان ما عمل هالشي

ابو حاتم : وهذا للي مخوفني كثيير .. انه بيعرف شو بيعمل ..

مشهد اخر .. النمس ببيت ابو ساطور ..

النمس : ابو ساطور .. ليش بدك تبيع البيت؟؟ مع اني بخيته منيح وما في ولا ناموسه .

ابو ساطور : هيك مليت منه وشغلة الجثه اللي كانت هون مو مريحتني

النمس : ابو ساطور .. ايدي على راسك والنبي كباسك .. مامون طلب منك هيك ؟؟

ابو ساطور يرتبك " هااا وشو عرفك انت

النمس : لانه بدو يسكنك بيت الادعشري بحارة الضبع ..

ابو ساطور : هيك هو قال

النمس : اي .. والحاره وافقت ..

ابو ساطور : اي وشو يعني .. ما انا اللي طلبت منه يعطيني بيت الادعشري ..

النمس  : على اساس مو مرتاح من الجثه اللي كانت هون مع انه كل بيت الادعشري مليان جثث .. وناموس كمان

ابو ساطور : لك من الاحياء ما بخاف بدك يعني خاف من الاموات ..

النمس : ليش مامون بيك عمل معك هيك ؟؟   شو عملتله ليسكنك بحارة الضبع ؟؟

ابو ساطور : شو قصدك ولا ..

النمس : ما قصدي شي .. بس مامون بيك .. ما بيعمل شي لله تعالى ..

مشهد اخر .. عمر يدخل حارة الضبع

في صباح مشرق ومليء بصوت البائعين والحركه الدؤوبه بحارة الضبع .. يدخل عمر الحاره لتقصي اخبارها   لاجل عيون ابو عصام .. وكاي غريب ياتي للحاره يتجه للقهوة الحاره ويجلس على احد الطاولات ..

ابو حاتم يراه ويوميء الى ابو ديبو ليكلمه ..

ابو ديبو : اهلين ابضاي .. شو بتحب تشرب .

عمر : كاسة شاي على كيف كيفك ..

لحظات وياتي الشاي ..

ابو ديبو : اول مره بشوفك بالحاره انت غريب عنها

عمر : اي والله .. اول مره بجي حارة الضبع ..

ابو ديبو : فيي اخدمك بشي ..

عمر : والله من بعد امرك بدي تدلني على دكان الحكيم ابو عصام ..

ابو ديبو : هناك بالناحيه الثانيه .. انت بتعرفه للحكيم من قبل ؟

عمر : اي والله .. وصرلي زمان ما شفته وجاي اطمن عليه ..

ابو ديبو يرفع راسه فجاه ويقول له : تتطمن على مين

عمر : على الحكيم ابو عصام

وهنا ينهض ابو حاتم وقد كان يسمع الحوار ويقترب ..

ويقول : اهلين بالابضاي : ما تعرفنا عليك يا ابضاي :

عمر : محسوبك عمر .. عمر الشوال

ابو حاتم : شرفت اخ عمر .. ومن وين حضرتك بلا صغره ؟؟

عمر : من حاره بعيده كثيير .. كثيير

ابو حاتم : اخي .. انت امتى اخر مره شفت فيها ابو عصام ؟؟

عمر : يعني من اكثر من سنتين ..

ابو حاتم : عمي .. ابو عصام اعطاك عمره من شي سنتين ...

عمر: شوووووووووو لا حول ولا قوة الا بالله .. له له له .. رحمة الله عليك يا ابو عصام ..

والله ما هي خبريه .. دخلك عمي .. ومين هلا ماسك الدكان تبعه

ابو حاتم  : ابنه عصام

ويلتفت عمر للدكان وينظر لحظات ثم يقول :

ماشي عمي .. عذبتكم معي .. بخاطرك

ابو حاتم : اهلين .. شرفت ........ لا حول ولا قوة الا بالله

مشهد اخر ... عمر يدخل دكان عصام ويجد مامون بيك على كرسي الحلاقه

عمر : السلام عليكم

عصام : وعليكم السلام تفضل عمي ..  تامرنا بشي ابضاي ؟

عمر : من بعد امرك بدي تقشلي ذقني ..

عصام : اي .. تكرم ..ارتاح عمي .. ارتاح ..وتابع عصام الحديث مع مامون بيك ..

عمي : يعني هلا كان ضروري تجيب ابو ساطور ليسكن بالحاره :

مامون بيك : اي والله يا عصام .. ابو ساطور كانت اله مشاكل مع الحاره وهلا فتح صفحه جديده .. ولازم نضمه النا علشان ما يرجع يعمل مشاكل

عصام : بس هالرجال ما عليه امان ومن طبعه مشراني

مامون بيك : لا تخاف .. انا بكفله

عصام : نعيما عمي

مامون بيك : الله ينعم عليك .. شو امرتني ..

عصام : استغفر الله   يا زعيم .. انا اخذ منك .. اعوذ بالله شو الحكي

مامن بيك : ما بصير عمي .. هذا رزقك ..

عصام : امرك زعيم .. فرنكين ..

مع السلامه زعيم .. شرفت المحل والله

عصام : تفضل ابضاي .. شرف هون ..

مشهد اخر .. ابو بدر مع فوزيه

فوزيه : لك ابو بدر .. هلا مامون بيك صار الزعيم

ابو بدر : اي اي فوزيه .. لك انتي لسه ما بتعرفيه لمامون بيك " قصدي الزعيم "

رجال رجال كبيير ..

فوزيه   : وانت يا ابو بدر .. ليش ما صرت زعيم

ابو بدر : شلووون .. اي انا ما رضيت مع انهم عرضوا علي هالشي

فوزيه : لك اسم الله حولك وحواليك .. تقبرني ان شاء الله ... لك هو انت رجال ؟؟؟

لتصير رجال بالاول ..

ابو بدر : شبك فوزيه : " ويقف " بالله عليك مو انا  رجال ؟؟؟؟؟؟؟؟؟؟؟؟

فوزيه : باااااين باين .. لك ولي علىحظي ..

وتتابع فوزيه .. ايييه يا نيالك يا فريال خانوم .. كان الزعيم عمك .. وهلا صار جوزك

ابو بدر: شلوووووون .. كيف بده يكون عمها وجوزها بنفس الوقت ... ما بصير يا فوزيه استغفري الله

فوزيه : تنظر اليه باستحقار .. لك رووح روح ضربك العمى

مشهد اخر .. عمر على كرسي الحلاقه ويحدث عصام

عمر : هلا اللي كان هون هو زعيم الحاره ..

عصام : اي والله هو الزعيم وما صرله يومين زعيم .

عمر : وشو اسمه بلا صغره ؟

عصام : مامون بيك .. ابن اخوه لزعيم الحاره السابق " ابو صالح الله يرحمه "

دخلك انت من وين وشو اسمك .. اول مره بشوفك بالحاره

عمر  : اسمي عمر من حاره بعيده بالشام .. انا كنت رفيقه للمرحوم ابوك .. وكنت جاي اسلم عليه بس حكولي انه توفى ..

عصام  :  شلوون . يعني كنت تعرف ابي ..

عمر : اي والله .. كنت بعرفه منيح .. وحكالي كثير عنك وعن اخوانك ..

دخلك اخوك معتز شو اخباره اليوم ..

عصام : والله يا ابضاي اخي معتز تزوج وهلا صار عقيد الحاره ...

عمر :  ليش هو ما كان عقيد ؟؟

عصام : العقيد الفعلي هو خالي ابو شهاب .. بس خالي اختفى من بعد الحصار وما بنعرف عنه شي .. وهلا اخي معتز صار عقيد الحاره لبين ما يرجع خالي ابو شهاب ..

عمر : وانت تزوجت ولا بعدك ..

عصام : والله انا متزوج ثنتين عقبال عندك وعندي بنت اسمها سعاد .. وبستنى بشوكت من الثانيه ..

عمر : وامك الله يخليلك اياها عايشه معك ..

عصام : لا والله .. امي عايشه مع اخي معتز ببيت العيله .. وخواتي كل وحده ببيت جوزها ..

عمر  :  بدي اسالك .. شلون توفى عمي ابو عصام الله يرحمه ؟؟

وينتهي المشهد

المشهد الاخير.. الليل يغطي حارة ابو النار ..

ياتي احدهم لبيت ابو النار ويبدا بطرق الباب بشده

فيصرخ ابو النار : مين . مين جاينا بهالوقت ؟؟

فيفتح ابو النار الباب .. فينظر للشخص الذي يطرق الباب بدهشه كبيره ويقول : معقووووووووووووووووووووووول   ؟؟؟

وتنتهي الحلقه

والى لقاء غدا في حلقه جديده ان شاء الله

مع تحيات اخوكم

شمس الانتر