السلام عليكم ورحمة الله وبركاته

قمة المتعه والسعاده ان تقوم بعمل يعجب الاخرين .. فاشكركم لان هذا العمل المتواضع قد حاز على اعجابكم .. ومعا نستمر ان شاء الله .

والان احبتي مع الحلقه الخامسه من الجزء الخامس لباب الحاره ..

ولمن لم يكن معنا في البدايه فاحب ان اوضح  له بعضا من الامور ..

ابتعدت عن لعي النسوان وكثير من المشاهد الممله التي تعودنا عليها في كل المسلسلات .. وكثير من المشاهد التي لا تعطي اضافه للحدث ..

لسببين الاول لانها لا تفيد في الاحداث والثاني لانني لست بارع في خلق اللعي :) 

كذلك تلاحظون ان هناك شخصيات لم اذكرها اطلاقا .. " ربما كاتب متخصص يعطيها مساحات واسعه من المشاهد ولكني احببت ان اسلط الضوء عل حدث ما وركزت على ابطال الحدث .. وانتم بامكانكم ملء المشاهد التي احسستم اانه ينقصها شخصيات  مثل ام زكي وام عصام وام ابراهيم وكثير من قهوة النسوان وشطف الديار وما الى ذلك J

ولمن فاته متابعة الحلقات السابقه فعليه الدخول هنا

الحلقه الاولى

 http://www.startimes2.com/f.aspx?t=19819763

الحلقه الثانيه

 http://www.startimes2.com/f.aspx?t=19839319

الحلقه الثالثه

 http://www.startimes2.com/f.aspx?t=19858101

الحلقة الرابعة

 http://www.startimes2.com/f.aspx?t=19873977

ونذكر الان بما انتهت عليه الحلقه السابقه ..

فد انتهت حينما وقع ابو عمر من على السلم مما شكل صدمه لابو غريب والذي صرخ باعلى صوته " عصااااااااااااااام " طالبا بعض العلاجات للاب العجوز " وهذا الامر شكل عودة الذاكره لابو عصام ..

الـــحـــلــقـــه الــخــامــســه

المشهد الاول .. ابو خاطر وخاطر في بيتهم لتناول طعام الغداء

ابو خاطر : اي ابني ، مين تركت بالمحل

خاطر : تركت معتز يا بي

ابو خاطر : الله يصلحك كان جبته يتغدى معنا !!!

خاطر : والله حكيتله يا بي بس ما رضي .. قال بدو يتغدى مع خيريه وام عصام

ابو خاطر : شو بدي قول يا بي .. انا شايفها مو حلوه بحقنا ولا بحق معتز انه يكون اجير عنا بعد ما صار عقيد الحاره .. والله حاسسها ثقيله

خاطر : اي والله يا بي فكرت بهالشي .. بس انت بتعرف معتز راسه يابس ..

ابو خاطر : معلش يا بي ما بساير لازم اليوم تحكيله  

خاطر : ان شاء الله يا بي

ابو خاطر : لك صحيح يا بي .. ما في اخبار عن اختك وجوزها رياض ؟؟

خاطر : والله ما وصلني شي .. صار الحكي انهم يراسلونا اول ما يستقروا بطرابلس

ابو خاطر : بس صرله مده غايب معقول ما استقر لهلا؟؟

خاطر : الغايب حجته معه يا بي

ابو خاطر : الله يجيب اللي فيه الخير

مشهد اخر .. ابو عصام ومعه عمر

عمر : اي عمي .. كيفو هلا ابي ؟؟

ابو عصام : لا اطمن ما عليه شر .. النزيف وقف .. ويومين ثلاث ان شاء الله بيرجع مثل اول واحسن ..

عمر : تسلم ايدك يا حكيم " وتبسم " .. ويتابع ..

هلا انت الحكيم ابو عصام ؟؟

ابو عصام : اي انا بشحمه ولحمه

عمر : والله صيتك بكل الشام .. احسن حكيم بالشام كلها ..

ابو عصام : من ايمتى وانا عندكم ؟؟؟

عمر : من شي سنتين

ابو عصام : يا لطييييف سنتين؟؟؟ . هلا بكونوا العيال انشغل بالهم علي واكيد ما بيعرفوا وين انا ولا بيعرفوا عني شي ..

عمر : مشتاق لحارتك عمي ابو عصام

ابو عصام : " بنبرة فيها حنين وشوق " : اي والله .. اي والله مشتاقلها خيرات الله ..

مشتاق لولادي بناتي .. ام عصام .. مشتاق للحاره .. مشتاق لكل حجر بحارة الضبع ..

عمر : عمي ابو عصام.. شو اخر شي بتتذكروا صار معك ؟

ابو عصام : اللي بتذكروا انه خرجت انا وكل رجال حارتي لنخلص عقيد حارتنا من الاسر وبعد ما رجعنا اخذت غراضي ورجعت لعالج الجرحى اللي اتصاوبوا بالمعركه .. ولما وصلت منطقة البساتين بناحية الغوطه .. صار الضرب عن جنب وطرف .. ما عرفت من وين بتيجيني الطلقات .. وقعت على الارض وصرت ازحف .. وبعدها ما وعيت على حالي

عمر   : اي الف الحمد لله على السلامه عمي

ابو عصام : الله يسلمك ويخليك يا ابني عمر

عمر : عمي ابو عصام .. احكيلي عنك وعن حارتك واهلك وناسك

مشهد اخر : خاطر يتكلم مع معتز

خاطر : عقيد شو بدي قول .

معتز : له يا ابو الخواطر .. ما بحيتها منك .. ناديني ابو العز وبس

خاطر : لا ما بدي ناديك ابو العز / لاني بدي حاكيك بنفس الموضوع

معتز : ما فهمت عليك احكي شو في؟

خاطر : يعني بقول .. مو حلوه .. انت هلا صرت عقيد الحاره وعم تشتغل اجير عنا .. يعني ان انت رضيتها لحالك احنا ما بنرضاها الك ..

معتز : " بحالة من الصدمه وعدم الرضا " .. له له له له يا خاطر .. اخر شي توقعته منك .. شو عقيد وما عقيد .. شو بدك اياني اعمل يعني ؟؟ ادور بين الحارات؟؟

خالي العقيد ابو شهاب / كان عقيد الحاره ويشتغل في البوايكيه وكان ياكل من كده وعرق جبينه .. وانا ما بدي كون الا مثله شغيل سبري بسبر اصغر شغيل بحارة الضبع ..

خاطر : بس يا ابو العز ..

معتز : لا بس ولا شي ... ويصمت .... ومن ثم يتابع .. الا اذا كان ما بدكم اياني بالشغل ..

خاطر : له له يا ابو العز .. اعوذ باللله .. المحل كله بما فيه الك .. واحنا بنترك المحل ولا بنخليك تتركه ..

معتز : اصبح ما بقى تفتحلي هالسيره الله يرضى عليك

مشهد اخر : الليل يغطي حارة الضبع

ابو الفوارس حارس الحاره يتمشى في الحاره ويتفقد ازقتها ..

في هذه الاثناء يستغل احدهم عدم وجود ابو الفوارس على باب الحاره ويتسلل للحاره " وقد كان ملثما ..

ويعود ابو الفوارس لمجلسه بعد ان نجح الملثم بالتسلل للحاره ..

مشهد اخر.. ابو عصام يجلس مع عمر بجانب الاب العجوز وقد كان نائما

عمر : يعني هلأ قررت ترجع لحارتك ؟؟

ابو عصام : معلوم يا ابني لازم ارجع للحاره .. متمني اكون فيها هلا قبل بكره

عمر : ايمت راح ترجع ..

ابو عصام : كان بودي ارجع على بكرية الصبح .. بس ما فيني اترككم الا لما اطمن على حال الوالد ويشفى جرحه

عمر : مع انا رايحين نخسرك ونفتقدك كثير .. بس الحمد لله .. انا مبسوطلك كثير لانك راح ترجع لحضن اهلك وحارتك ..

مشهد اخر : الصباح في حارة الضبع ..

وكالعاده يشرق الصباح مع دخول ابو مرزوق بالطنبر ومعه خضار وفواكه لدكانه ..

ويفتح دكانه وما هي الا فتره قليله وتبدا الحركه شيئا فشيئا ..

خاطر يهرول مسرعا من امام دكان ابو مرزق ..

ابو مرزق ينادي عليه : شو يا خاطر .. ما في صباح الخير .. ولكنه لا يرد عليه

ابو مرزوق : العمى شبو خاطر .. .. يا ريان احمر يا ريان

مشهد اخر :  خاطر يطرق الباب على بيت معتز بقوه

معتز : مين .. لك مين بيخبط هيك على بكرية الصبح ؟؟ ويقتح الباب .. خاطر .. شو في شرشتني ..

خاطر : مصيبه يا ابو العز مصيبه ..

معتز : لك شو في شغلتني احكي

خاطر : الصبح رحت افتح المحل كالعاده .. لقيته .. لقيته

معتز : لك احكي خاطر !!!!!!!!!!!!

 خاطر : لقيته مفتوح ومنظف بالكامل .. ما في ولا قطعة نحاس ..

معتز : شووووووووووووووو .. مسروق؟؟؟؟؟؟؟؟؟

خاطر : اي والله يا ابو العز .. مصيبه وحلت علينا .. والله ما يدرى ابي الا يرتمي ويروح فيها

معتز : بعيد الشر عنه .. الحقني لاشوف ..

مشهد اخر .. معتز وخاطر يتجهون ناحية المحل بخطوات سريعه

ابو مرزوق : لك شو بكم اليوم .. ما حد يقول صباح الخير ..

شيييييييييه .. شو صاير .. لالحقهم واشوف شو في ..

ياتي ابو مرزوق على خاطر ومعتز ويرى بعينه حال المحل ..

ابو مرزوق : يا لطيف .. لك خاطر شو صاير .. وين العده وين البضاعه ..

خاطر ومعتز ينظرون لبعضهم .. بينما يرجع ابو مرزوق صارخا وناشرا للخبر

يجتمع اهل الحاره .. على صوت ابو مرزوق وتبدا الكلمات تخرج من هنا وهناك ..

وياتي الشيخ عبد العليم ومامون بيك وكبار حارة الضبع ..

مامون بيك : شو صاير

ابو مرزوق : محل ابو خاطر منضف على الاخر

الشيخ عبد العليم : لا حول ولا قوة الا بالله .. مين اللي عمل هالعمله السوده هاي .

مامون بيك يهمس في اذن معتز : عقيد خلي الجميع يتيسر على شغله

معتز : يلا يا رجال تيسروا .. كل واحد على شغله .. الحرامي راح يبان وراح ينال جزاه

مامون بيك : عقيد الحقني انت وكبارية الحاره ومعك خاطر على المضافه

مشهد اخر : الجميع مجتمعون في المضافه

يبدا المشهد بالحديث المتطاير هنا وهناك ..

مامون بيك : روقوا يا جماعه .. الشي اللي صار في الحاره اليوم مو هين وما لازم يمر هيك ..

الشيخ عبد العليم : والله يا مامون بيك من شي 17 سنه ما حصل شي سرقه من هالنوع بالحاره ..

ابو حاتم : يا جماعه اللي سرق الحاره من برات الحاره .. لانه ما في عنا حراميه بحارة الضبع ..

ابو بشير : طب ابو الفوارس وين كاين؟؟ ما كان بمحرسه ؟؟

ابو مرزوق : انا الصبح لما خرجت من الحاره لاتبضع كان موجود وقاعد ولما رجعت كمان كان قاعد

مامون بيك : عقيد .. جيب ابو فارس هون ..

معتز : ماشي

خاطر : خليك معتز .. انا بندهه

وكالعاده الامر لا يعجب ابو حاتم ويلحظ معتز هذا الشيء

مشهد اخر : النمس ينثر دسائسه هنا وهنا " وبامر من مامون بيك "

النمس في القهوه : يا جماعه اللي عمل هالعمله / كان اله مصلحه من وراء هالشي

ابو ديبو : مصلحة شو " غير السرقه "

النمس : اللي عمل هالعمله .. بدو يبين ان الحاره فلتانه وما عاد فيها امان

عصام يصرخ من امام دكانه : اضبضب ولا نمس

النمس : بنعتذر منكم : مهو اللي بيحكي الحق هون ما حد بيرد عليه : لكان ليش ما صار سرقات الا بهذا الوقت ؟؟

مشهد اخر ... اجتماع رجال الحاره

مامون بيك : شو يا ابو الفوارس وين كنت مبارح ؟؟ شلون يصير هيك.. مو انت حارس الحاره ؟؟؟

ابو الفوارس : ينظر للعقيد " يا عقيد احكيلهم .. باب الحاره ما فيني سكروا وكمان مثل كل ليله بعمل جوله بالحاره والظاهر انه الحرامي استغل غيابي عن الباب ودخل لما كنت اعمل بالجوله . وعلمكم محل ابو خاطر بعيد عن المدخل .. يعني ما راح حس عليه لو حد فتحه  

ابو مرزوق : وليش ما تسكر الباب ..

ابو حاتم : يا جماعه الباب لازم يتسكر كل يوم بعد صلاة العشاء مثل اول

مامون بيك : بس يا جماعه انتوا نسيانين   شي ..   انه الفرنساوي منع الحارات تتسكر في الليل وبالاخص حارة الضبع من بعد الشي الاخير اللي صار

ابو الفوارس : تسمحولي قول شي

معتز : تفضل احكي ..

ابو الفوارس: ما بظن انه الحرامي من برات الحاره وان كان من براها فما بظن انه خرج منها ..

مامون بيك بنظره غريبه : شو قصدك ؟؟

ابو الفوارس : لاني لما عملت الجوله ما كان في شي مو طبيعي بالحاره   .. وحتى مريت جنب محل ابو خاطر ما كان في شي .. وبعدين ما طولت ورجعت للباب وضليت بمحرسي لوش الصبح

يعني الحرامي لو بدو يسرق كل هالعده والبضاعه بدو وقت طويل لينظف المحل وكمان راح شوفه لو طلع من الحاره ..

الجميع ينظرون لبعضهم باستغراب شديد . وجميعهم اثنوا على كلام ابو الفوارس واكدوا مصداقيته ..

معتز : اللي عمل هالعمله قاصدني انا

ابو حاتم : شو قصدك معتز !!!!!!!!!!!!!!!!!!!

معتز : اللي عمل هالعمله قصده يصغرني .. ويثبت انه الحاره فلتانه بوجودي عقيد

ابو حاتم : لاااااااا احكي صراحة .. مهو قصدك بااااااااااين .. .. اسع هيييييييييك .. ويذهب ابو حاتم تجاه الباب تاركا المجلس .. ولكنه يتوقف عند الباب ويقول :

الله يرحم بيك يا معتز .. لو كان عايش شو بدو يقول ؟؟

كلمات ابو حاتم الاخيره تنزل كالسيف على راس معتز .. وكانه كان في سكرة واستيقظ منها

مامون بيك : يا جماعه ما بدنا نكبر القصه .. الفاعل الا ما يظهر .. لكن احنا هلا بمشكلة ابو خاطر .. الضربه هاي راح تكسره ..   لذلك يا جماعه انا متكفل باني ارجع محل ابو خاطر مثل اول واحسن وعلى حسابي

الشيخ عبد العليم : بارك الله فيك .. والله موقفك بيذكرنا بالزعيم ابو صالح الله يرحمه ..   الله يديمك للحاره واهلها

ابو بشير : الله يبارك فيك يا مامون بيك .. فعلا انك اصيل ..

وكذلك جميع الجالسين يثنون على مامون بيك

مشهد اخر : رجال الحاره يتناقلون المبادره التي قام بها مامون بيك .. بينهم وكلهم يثنون على فعلته ويمدحون به

وفجأه تدخل عربه لحارة الضبع . ينزل منها رجل وحرمته .. " لقد كان هذا الرجل رياض " وتبدو حالته غير جيده "

ابو مرزوق : اهلييييييييين .. رياض   الحمد لله على السلامه ومن ثم يتبعه ابو ديبو وبعض الرجال بالتهنئه بالسلامه

مشهد اخر : ابو ساطور في منزل مامون بيك

مامون بيك : بري عليك يا ابو ساطور .. عجبتني والله ويعطيه المال

مامون بيك : بس قللي وين حطيت الاغراض والبضاعه ..؟؟

ابو ساطور : مثل ما امرت .. حطيتهم ببيته للادعشري وضليت متخبي هناك لحد ما طلع النهار

مامون بيك : وكيف عرفت تخرج ..

ابو ساطور : ولو يا مامون بيك بعجبك .. استغليت الفزعه اللي عملها ابو مرزوق الصبح ودخلت بين الناس مثلي مثلهم

مامون بيك : حلو كثير .. بس حسك عينك ترجع للبيت او تخرج اي قطعه منه .. فهمان؟؟

ابو ساطور : لا ولوووووو .. انا ما بتصرف اي تصرف الا من بعد امرك .

مشهد اخر : رياض وزوجته وعائلة ابو خاطر

رياض : والله يا عمي هي اللي صار معي من وقت طلوعي من الحاره لحد ما رجعت

وهيني شوفة عينك .. ايد وراء   وايد قدام ..

خاطر : لك مين هذا الواطي اللي عمل فيك هيك ..

رياض : والله ما بعرفه . وما بعرف ليش عمل معي هيك

ابو خاطر : على كل الف الحمد لله على السلامه .. المهم رجعتك بالسلامه واللي راح بيتعوض

رياض : ايييه .. الحمد لله .. وانتوا عمي شو اخباركم .. واخبار خيريه ومعتز .. وكيف الشغل والحاره من بعد غيابي

خاطر : ينظر اليه ولا يعرف ما يقول ...

مشهد اخر ... ابو عصام يطمئن على حال الاب العجوز

ابو عصام : لا ااااااااا وين كنا وين صرنا .. الحمد لله زال الباس وما عاد في لزوم تلف هالقماشه على راسك

الاب العجوز : كثر خيرك يا حكيم ..

ابو عصام : خير الله عمي .. ولو .. انا ما عملت غير واجبي .. بعدين اللي عملتوه معي راح يضل دين برقبتي حتى الممات . شو عملت انا قدام اللي عملتوه انتو

عمر : اي عمي .. يعني هلا نويت تتركنا بكره ..

ابو عصام : خلاص ابني ما عاد فيي استنى اكثر من هيك / هي الوالد اسم الله حوله وحواليه .. وابقى انا كل فتره وفتره اشقشق عليكم

وبكره من جهجهة الضو لازم احمل حالي وارجع لاهلي وحارتي ..

المشهد الاخير : رياض ببيت ابو خاطر

رياض : يا لطيف .. ومين اللي عمل هالعمله ؟؟

خاطر : والله ما عرفنا هو من برات الحاره والا من جواتها .. الشغله مشلبكه

رياض : العمى على هالقصه العمى .. يعني هلأ الدكان فاضي ؟؟

ابو خاطر : مامون بيك الله يخليلنا اياه عوضنا عن كل شي

هذا مامون اصيل . قلبه على الحاره واهلها  والحاره بدها واحد مثله

خاطر : اي والله اللي عمله اليوم كبير كثير .. بس ابي ما رضي وقلله اللي عملته راح نعتبره دين وراح نسددلك اياه اول ما تفرج وعلى دوز باره

ابو خاطر : هلا انت بس ترتاح شي يومين بتحمل حالك وبتنزل مع خاطر على الشغل

رياض : لا عمي .. انا مزبوط خسرت اللي خسرته من المشوار هذا .. بس بقيان معي شوية مصاري .. بيكفوا لاستاجر   المحل وابدا من جديد .. ولو بجيب نص العده بالبدايه

خاطر : وين ناوي تستاجر ؟؟

رياض : بالحاره هون اكيد .. محل ابو سمير الحمصاني ..

بكره بروح عند الشيخ عبد العليم و.. " ويقطع خاطر عليه الحديث "ويقول : 

بس المحل طار يا   رياض ... طار لغيرك

رياض   : شووووووووووو .. طار ؟؟؟؟ لوين طار؟؟

خاطر : استاجره مامون بيك للنمس .

رياض : النمس !!!!!!!!!!!!!!!!!!!!!!!!!!!    وتنتهي الحلقه

والى لقاء غدا باذن الله مع حلقه جديده .. واعدكم باحداث اكثر تشويقا واحداث ايضا غير متوقعه ولا تخطر ببالكم

تابعونا غدا ان شاء الله

مع تحيات اخوكم

شمس الانتر