بسم الله الرحمن الرحيم
عايزين نسأل اسألة مهمة في موضوع حديث الساعة!!
يعني لو جينا بصينا علي انتقال اهم لاعب في التاريخ من واحد من اهم واكبر الاندية العالمية زي ميسي وبرشلونة الي يعتبر ابن النادي واهم لاعب في تاريخ الفريق حرفيا
مسمعناش كل الضجة دي اه هو ما اتنقلش للغريم التقليدي الريال لكن لو حتي راح للريال مكناش هنلاقي الضجة الغريبة دي الي حصلت من شهووور علي موضوع الساعة
يمكن حتي اشهر انتقال عرفناه وعاصرناه وهو انتقال فيجو من البرسا للريال تم وقتها
ومخدش نص الاهتمام الرهيب الاعلامي سواء مرئي او مسموع بالشكل ده رغم طبعا الفواااارق الرهيبة بينا وبينهم في كل شئ ..
يمكن هنا الي شعلل الموضوع اكتر الحدة الصعبة اوي حاليا ومن فترة طويلة بين الجماهير وجو الشحن والضغط
الي بيحصل بينا من سنيييين كتير للاسفوللاسف هيفضل مطول معاانا كتييير .
فا هتلاقي مثلا معظم الاهلاوية عارفين كويس انهم مش هيستفادو من زيزو فنيا ومش هيديهم الي هما بيحلمو بيه
وعارفين انه لاعب زي بن شرقي وترزجيه كا اجنحة قلب اهم منه كا جناح خط زي زيزو .
لكن تمسك الاهلاوية ودفاعهم المستميت عن الصفقة والي كان من كم شهر بس تحت طايلة انتقادهم العنيف والعنيف جدا واتقال فيه كلام كتير للاسف
ووصفوه بالمتخاذل والمنفوخ والبلونة والجو ده عشان كدة بقول انه تمسك الاهلاوية بالصفقة جماهيريا فقط
وجو مشاحنات وانهم خطفو نجمنا واهم لاعب عندنا واهم لاعب في مصر عموما اخر خمس سنين ودي بالنسبلهم انتصار
ومش هنكر ولا اقدر انكر ده وحقهم انهم يتباهو بيه خصوصا بعد الكم تعثر الاداري الاخير ..
علي الجانب التاني هنلاقي اننا كا زملكاوية زعلنا علي الشواهد مش علي تأثير زيزو فنيا معانا
لانه احنا علي مدار عصور كتير ما وقفناش علي حد الحمد لله واحنا دايما الي بنصنع النجوم وزي ما صنعنا زيزو
اللاعب الي كان جي مغمور محدش يعرفه قادرين نصنع غيره وغيره وقادرين نصنع غيره وغيره ان شاء الله .
لكن بس المشكلة زي ما بقول في الشواهد انه لاعب يبيعنا كدة ويضحي ينا مع اعترافنا طبعا بالتقصير الاداري من الفشلة في مجلسنا وعلي راسهم لبيب
لكن زيزو ما سابش حاجة لينا نتعاطف بيها معاه خصوصا الي حصل امبارح وبيناه الي اعترف فيه انه ما مضاش لحد وهدد انه الي معاه امضته يوريهاني وهو اصلا ماضي وكان جي من السفارة
الكدب ده ضيع رصيد كبير له في قلوبنا لكن انا مش بحب اهاجم للاسف لاعيب كان معانا فا ربنا يسهله .
الجانب التاني هو جانب فني واننا حرفيا بعد ضياع صفقة زيزو في اننا نبيعه الموسم الي فات فا زيزو حرفيا ما جاش وبيقدم واحد من اسوء مواسمه معانا
واكيد موضوع العقد وحوار والده الهراي الي كان من ضمن اسباب مشيانه له دور كبير في سوء مستواه .
ومعتقدش بردو انه زيزو كان هيقدر يدينا تاني حاجة خصوصا للاعب داخل علي ال 30 سنة صحيح هو مهتم بلياقته ورشاقته ودينامكية حركته الي هي راس ماله اصلا
لكن كل ده مع التقدم بالعمر هيقل تلقائي .
موضوع الجانب الفني حابب اكلم فيه باستفاضة لكن الموضوع طول اوي مني ومضطر المه شوية واعمل موضوع تاني علي الجانب الفني اكتر واكتر
في النهاية اكيد كا زملكاوي كنت اتمني زيزو يكمل معايا عشان ابان اني نادي كبير بيعرف يحافظ علي لاعيبته ونجومه لكن للاسف رئيس نادينا ربنا يسامحه بقي هو واعضائه ومجلسه كان ليهم راي تاني
واتمني انه زيزو ما يخدش اتجاه كيد النسا الي اخده كهربا وامام ويعرف انه نهايته هتبقي وحشه في حقه هو قبل اي حد وانه كفاية عداوة معانا ويحترم فترته معانا ويحترمنا احنا كا جمهور حبه ونجمه وخلاه اهم لاعب في مصر
📣
