هلأ بخصوص مسلسل ابتسم أيها الجنرال
أكيد معايير تقييمه لازم تكون مختلفة عن باقي المسلسلات
لأنه هو مختلف عن كل شي تم إنتاجه من قبل
أول نقطة إنه عدد محدود من الممثلين ممكن يرضوا يشاركوا فيه، لأنه باقي الممثلين رح يخافوا حتى إنه يتابعوه أو يمدحوه بكلمة (متل ما شفنا بمقابلة باسم ياخور)
وحتى الممثلين القلال اللي شاركوا كل واحد عايش ببلد فتجميعهم ما رح يكون سهل
النقطة التانية مكان التصوير
فحسب ما سمعت إنه بتركيا كل كم متر بتحتاج تطالع رخصة للتصوير، وهاد الشي مو سهل
وبدك تعتمد على حالك بتأمين كل احتياجات المشهد، ما في وزارات تدعمك وتأمنلك دبابات وسيارات على سبيل المثال
وبعتقد هاد واحد من الأسباب إنه ما شفنا بالمسلسل مواجهات مسلحة واشتباكات كبيرة
بالإضافة إنه بدك جهد إضافي لتحاول تزبط البيئة اللي عم تصور فيها لتصير تشبه المكان الافتراضي اللي ببال المؤلف والمخرج
النقطة الثالثة قنوات العرض كانت محدودة ومعروفة من وقت تصوير المسلسل
أكيد لا ال MBC ولا أبو ظبي عندهم استعداد يعرضوا هيك نوعية من المسلسلات
والنقطة الأخيرة إنه المسلسل تحارب وتهاجم من قبل ما يبدأ عرضه .. ولأسباب معروفة
وكتير من اللي كانوا عم يعارضوه حضروا (من باب رفع العتب) 3 حلقات ووقفوا متابعته من باب إنه العمل فاشل
رغم إنه كل اللي حضروه متفقين إنه العمل تحسن وارتفع مستواه بعد هيك
قياساً لهالنقاط فالأرقام والمتابعات اللي حققها المسلسل تعتبر ممتازة
وبتمنى نشوف تجارب مشابهة بالمستقبل
مع تفادى السلبيات اللي وقع فيها المسلسل
