نــص الألـف .. خمسمية
لنــادي الاعمــال الاجتمــاعية كنا امتداد .. ماحدا خطرلو يستمر كل هالقد والأعداد تضل عم تزداد
مئوية ورا مئوية كمل .. هالمكان ما مات وضل معمر
ومن ال2011 لليوم بيكون مرق عالتأسيس عشر سنين .. فيهم المر اللي الله لا يعيدو والحلو اللي حياخدنا الو الحنين
اليوم بعين الشيطان عم نحتفل بخامس مئوية .. مع أنو العدد بحياتو ماكان بالنسبة النا هدف الو أهمية
وانا ماببطل عادتي بكل مناسبة لازم بفقرة عالقافية أفلقكم.. بس غايتي جد بتتجلى انو من مود الكآبة طلعكم
ومع أنو متل ماقلت العدد مالو أولوية .. بس أكيد رح قول عقبال الألفية
لأنو أعداد كتير لقدام .. هي ضمان يجمعنا سنين وسنين سوا فالوضع يكون تمام
هالملتقى مكان بيجمع ناس بتحب الدراما السورية زيادة عن اللزوم .. وبتركز عالتفاصيل حتى لو كانت القصة بلقطة شقفة زوم
اذا مو مصدقني اقرا كلام اللي اسسو هالمكان عن تخت شرقي .. اي من أيام عرضو كان يفصفصوه فصفصة ويعملو من كل شغلة فيه موضوع طويل سردي
مع العلم عنا كتير عالم هون ما بيحبوه .. وهاد بيفند اشاعات انو نحنا جماعة اجتمعو عرأي واحد وصدروه
يمكن ذوقنا الخاص والمميز بكتير اوقات.. خلانا نبين كلنا مامنحب حركات متل اثبااات
اللي خلانا نستمر كان اكتر بكتير من الحكي الدرامي .. اوقات احاديث بلا طعمة واوقات احاديث هدفها سامي
طبعا مابيخلى الأمر من كتير لت وعجن.. وتقطيع وقت باللعي والفتن
وعبودي لازم يجي ينط ويعترض .. سنجق عرض يوقفلنا ماعم أتبلى عليه بفترض
وبتلاقي ساعتها الملتقى من كتير مشاركات تنضف واتزبط .. وبتلاقينا صرنا متل الصف اللي بحضور المدير انضبط واتربط
هاد الشي خلى الجو رغم البرود الدرامي يضل دافي .. مزح وتقفيل وفشة خلق وكلام عالجرح شافي
وعن نفسي اذا ماعملت طلة لهون كل يوم .. بحس نهاري ناقص ومن البسط انا محروم
السنة الأخيرة كانت صعبة عالأكيد .. بالكورونا والحجر والركود الدرامي وفوقها خسارة العميد
عراب الدراما التاريخية وكتير اعمال اجتماعية .. يمكن الحديث عنها معبي من صفحات ملتقانا أكتر من سبعين بالمية
ولسا الأصعب اكتر بكتير .. لما توالت علينا بعد هالخبر اخبار خسارة أحباءنا بالملتقى محمد وبشير
اكيد هلأ عم تقولو موت وكورونا وهموم وحجر وجايي تقلنا احتفال بمئوية.. بقلكم ياجماعة طولو بالكم الحياة بتكمل ونص الألف خمسمية
وبدال مايكون الحزن هو اللي مخيم حوالينا.. خلي الدعاء للي راحو وذكرياتنا الحلوة معهم يخففو علينا
