ذا الشاعر من عادتو يمتـــــع باشعـار // فحــل الصحرا ياك شـايع شنفـــــــرى

ولا بن شداد هـــــــــاذاك العــــــزبــار // سيفو يزرش قا اللقيــــة ذعــــــــــارة

ولا مهلهل مهلـــك طالـــــب ثــــــــــار // يرثي يامـــن راه عالعيـــــــن تــوارى

ياسر من هاذون مـــــن ليهم عيبــــار //و لاني صبت شبيه فحـــــــل الشعــارة

وين مثيلك ويـــــن من سابق لـــدهـار // مثلـــــــك ماراتوش عيــني بلمـــــارة

الشعـــــر مقفيــــــه تعجبنــي لسطـــار // بلذمــــــة مخدوم فايـــــــق بنــــظارة

الحرف لي نقراه يرفــد لـــي لوتـــــار // حتى عيني بيــــــه  تمســـــى ذرذارة

ونحس وسط الجوف قلبي في تعصـار // من ضيقة لمحان سايـــــل بمـــــرارة

بعدن يؤلــــم ماســــح علـــــيه التكدار // مطر الرحمة صاب عـــنو بـــغــزارة

درتو  طبي ناح عني هـــــدة اضــرار // وجميع لي كانت لحالـــــــي قيـــــثارة

يجبر كل عظيم يبــــرا مــــن لكـــسار // زين كلامك في حروفـــــــك جبـــــارة

وهبك ربي عدت شاعر ليك عبــــــار // بصحاري وتلـــــــول تارك تــــــذكارة

شــــباب وشـــياب عادتلك لشـــعــــار // حتـــــــى تغني فيـــه موشر تجـــارى

بـــــن السايح يا الشايع فـــــي لقطـار // وسمـــــــاك الخثير زين التعـبــــــارة

فالــــــشدة خصال فارس يا قهقــــــار// ناهل ســـــيفك عالسيوف الـــــبتـــارة

درتك خـــــير نديد ليا يــــوم قـــــحار // ودرتك خير حليف ضـــــــد المكـــارة

درتك نا  فالشور مولا راي خيـــــــار // ودرتك عين الميز تعجب عيـــــــــارة

درتك للتقمان لا حامــــت لحــــــــيار // درتك خير نصيح قبــــــــــل التشوارة

درتك زين الفال ذا من شاو نــــــهار // جرة تاعت خير ماهيــــــش خســـارة

انتايا  بن بيــــــت مـــن طينة لـحرار // صيل المقرح ذاك صـــيل  الطهــــارة

يانمر الخصلات ليـــــنا عـدت افخــار // راني زايخ بيـــــك درتـــك نـــــــوارة

زين الخصلة فيك ماتـــعرف تكـــــبار // وماكش مثل خلاط كبــــــرو حقـــارة

وماكش مثل اخرين طمعــو فالتشهار// وماكش مثل نجوع نـزرة كعرارة

وماكش مثل اخرين لــزو للتـــصوار // عــــــادو مثل عروس تصبح صـدارة

كل مـرة موديل عـل يمنــى ويســــار // يبــــــدل في لجناب عاطـي اشـــــارة

ساعة عين قفــــــاه ساعة ذا خنـزار // ساعـــــة فالعرنين حــط النظـــــارة

غير البارح ذا يعبلك فــــي لشعـــــار // قــــــــراوه لوزان صبــــــح عنتـــرة

وامسى ذا القوال عاطيها تمــعــــــار // ويبشمر  فالناس ســـــاب السجــارة

زادت رفدة فيــــه صفقات التوهــــار // فرفــــــر على بيه طبــــل وزومــارة

قالو شعرك راه مــــن خيرة لشعـــار // لاحـد يضاهيك مـن ذي الشعارة

اركب عود القول قــــــدم للمشــــوار // وذعر لـــــي خيـال قاصــد يتبــــارى

يا  ذالشعر بقيت فــيد لــــــي مـــكار // لعبت بيك نجوع خلاتـك طـــــــــــارة

راب القلب خباث حتــى الفـــم امرار // وعلـــــم طبيبي قال راهـا مــــــرارة

نظرت عيني ليه ذاك الوجه اصفــار // فـــــي وقت الحمان نــزلت قـــمــارة

وسألني مابيك احكــي مــــاذا صــار // ويـــــذا  نجحد ذا علومـو جـهــــارة

عارف راه رذيل جالب لــــي لضرار // ومـــــقوحر بسباب خنشش مـــكارة

اكـــلام الخثـــير نا درتــــو عــــقــار // نحاح خبالات عتـــــــي  كشفــــــارة

في نسجك ياشيخ ماهر مـن الشطار // قليعة خيط حرير مـــــاهــو حـــرارة

وكلامي نا قايلو ماهــــو تقــجـــــار  //  كلمــة صـــــح نقولـــها فالعبــــارة

قدرك ساوي ليـــك تحيــــة اكبــــار // يا ناعرني يـــــوم جــــارت حقــــارة

فوق الراس عمامتي درتك عنقـــار //و بـيك نفاخر ويــــن مـــانا قصــــارة

فمك مسك الطيب ما كسبو عطـــار // يا فـــــال التنـــزيه للبـــــر عمـــــارة

داعي ربي ليك عن طولـــة لعمــار // وسجاوة لولاد جــــملـــة  وثـــــمارة

الله لايوريك فالــــــدنيا تعفــــــــــار // والله لاتخـــبال وايـــــــــام عســــارة

هذا قولي فيك كاتب لـك لسطـــــار // باقي ضركة ليك ديــــــــرو تفكــــارة

                            بقلمي:زفزافي /ح