السلام عليكم ورحمة الله وبركاته

يا بلدى كل حاجة فيكى بتتغير

الا حال الفقير تمللى متأخر

رغم انه له فيكى النسبة الأكبر

لكن خيرك لغيرك والباقى متبعتر

تشيله الريح وفى الهوا يتفجر

وازاى بفقره عالدنيا راح يقدر

كابوس وعايشه وشايفه متفسر

وازاى يكمل ويتحمل وبايه يتصبر

وريقه ناشف بطعم حامض وممرر

لا نور يوضح طريقه المكسر

ولا ميه تروى جوفه اللى متحجر

ولا لقمة طرية ولا هدمه بتستر

غاوى الحلال ولا غيره يوم فكر

ولا انتى رأيك ايه فى المنظر

يعيش كريم ولا يبقى شيخ منصر

ولا يعيش نمله وياكل السُكر

دانتى ملك لربنا واحنا هنا نعمر

ما تقربينا لبعضنا لا نقسم ولا نسطر

ولا نفرق ولا نشتت عشان نكبر

وحبك يزيد ونعشقك اكتر واكتر

خللى العدل عنوانك مالذل نتحرر

هنبقى كلنا ايد واحدة بتبنى وتعمر

                                                                                            بقلمى ومُسجلة باثبات ملكية