الأصـــــل
بسم الله أبديت بالي ساحت في لفكار *** لا تلوم على هــاوي ملحون ساكن دأبي
كل مغبون داس ملمحان رم ملعسار *** في صـــــراخ لقلب الساكت يعلم ربي
الدنيا مكتوب كل مخلوق هوى في مسار*** لنفاس ماهي دايمة لابد للقبر أدربـــي
وين لسلاف لي مضاو فيهم السادة لخيار *** سكنوا اللحود و الباقي في هذ دنيا ربي
لاتلوم حالي لا تقول عليا شارب عقار *** مازرت أدواخلي ماحوست سباب كربي
اللآزمة في الحساب الدقة ترقص لوتار*** في لوعات الصبابة زيدي للقلب صُبــي
زيد ردف تستاهل يا رهيف من هذ النار*** منها أهديتني ما يزيد غُلب على غُلبــي
مارويت ياحسيس بنيران زايدة لظرار *** ما كفيت ياحسيس ببكاك زايد في ذَنبي
باقي غير خيالك داسه في متحف لفكار*** خطرات نزوره للثمالة نشرب أعذابي
مانهرب أعييت في دربك نبدل لمسار*** حشمان من ناسك كابر فلأصل مربي
داس كُربي عارف فالدنيا أسعد أخيار*** في صمت نجاهد نتبسم للي هي صعبي
قانع بالكاينة و لي عطاني رب الجبار *** لازم حدي نفرق مابين لحبيب و صحبي
وصيتك و نوصيك طيع فيما حكمت لقدار*** راهي العلة بانت من ناس هم صلبــي
شوف بعينيك أللي تبان أبني بيه الدار *** الدارق ميت لازم يندفن بلا أعزا ياقلبي
عبد العزيز طايع للناس من هما أحرار*** على كل أسياد أنسلم نبدل حُبهم بحبــي
شرفوح أنا أوحيد نرسم في هاذ الأثار *** تخبيلة تخمام و لعقل فالكتب أمربــــي
إنتهت بإذن القدر ليلة 02/06/2018
بقلم :/ عبد العزيز شرفوح
