حطيت الاكل وتفكرت وليدي
نفسي نسدت وفقدت شهيتي
فقدت المكان ورحت لفراشو
شميت رحتو وتغطيت بشاشو
هاتفت وليدي وسالتو عن حالو
صمت ماجوبني وعرفتو من سكاتو
قتلو يا كبيدي راك فالمنام تهتف
صورتك ما تفارقني وكل ليلة واقف
شتى بيك يا عمري وانا ميمتك
ماتخبي عليا لي ضرك ضرني قبلك
قلب الام حساس مانرقد مايحيني نعاس
نبات تخمم وركبني الوسواس
راه غريب وسط البراري
ياربي تحميه وانت الرب العالي
مغطي ولا عريان شبعان ولا جعان
ياكل ولا يشرب ولا راه عيان
كبروك فيا ماشفوك للبرد كي تقاسي
غبنتي وصلتك بعدما شاب راسي
ولد القليل ساهر ما ينام الليل
يبات عساس والجهد قليل
بحروف وحشك نبكي ونار تقدي
ما يحس به غير اللي مالوحش مقدي
العيد قرب نبغي وليدي يعايدني
صباح العيد يقبل جبيني
نقلك ياوليدي راك فالقلب مدسوس
والله ما ننساك وديما فالعين محروص
يا اللي قريت كلامي وصفلي حالتو
صبرني بكلمة وانا واليد توحشتو
بقلم فاطمة شلف
