بسم الله الرحمن الرحيم

يا سلااام 00 اليوم الدوري رح يبدا , والله اشتأنا

من الصبح بكير وأنا عم حضر حالي للمباراة , المباراة إفتتاحية وإلها حساباتها وما في أحلى من الدوري والملعب

وجنون الجماهير العاشقة 0

صرت جاهزة للخروج 00 حملت رايتي ( الحمرا والخضرا ) وبعض الأكلات للتسلية وقنينة ماء وحطيتن بالكيس

 ومع وجهي عالملعب 0

وصلت الملعب 00 الجماهير العاشقة للنادي تصنع الاهازيج خارج الملعب والكل حول بائع التذاكر , قطعت تذكرة وصفيت بالدور , إجى دوري وكالمعتاد التفتيش0

-         شو هاد ؟ 00 هيدي راية 0

مممممم 00 أعطيني العصاية , ( لي ؟ ) بلكي صارت طوشة ؟ 00 هاي عصاية مو شلمونة 000 ( أوك 00 خدها )

-         شو هاي ؟ 00 هادا علم النادي 0

ممممم 00 اعطيني ياه 000 ( لي ؟ )  بيجوز بالطوشة تخنئوا بعض 00 هادا قماش مو محارم ورقية

 ( أوك 00 خدو )

-         وشو هاد بالكيس ؟ 000 سندويشات 0

مممممم 00 هاتيهن 00 ( لي ؟ ) بيجوز بالطوشة يقع منك الكيس وهاي نعمة وحرام العالم تدوس عالنعمة 0 ( أفحمتني 00 خدن )

-         وشو هاي كمان ؟ 00 هاي قنينة مي 0

ياهما لالي ياهما لالي 00 هاي إذا معباية مي بتنزل عالراس متل الحجر

هاتيها 000 ( أوك 00 خدها ) 0

معك قداحة ؟ ( لاء ) 00 باكيت ؟ ( لاء ) 00 سكين ؟ ( أعوذ بالله )

تفضلي 00

دخلنا شوي وإذ واحد تاني جالس ورا طاولة ومعو أوراق

تفضلي لعندي 00 اعطيني صوتك

( يالطيف 00 شو بدك بصوتي ؟ ) 00 لا تناقشيني 0

عطيتو صوتي وعطاني ورقة , بس خلصت المباراة بعطيه الورقة وبيرجعلي صوتي 00 اتطلعت عالورقة

( صوت رقم 13 ) 00رقم الشؤم 00 كملت

طلعت المدرج 00 أخدت مقعدي 00 الملعب مليان بس الكل ساكت

دخل فريقنا 00 هب الجمهور كللو وبلش بالتشجيع :

( بع بع بع 00 هع هع هع 00 نه نه نه )

أيواااا 00 نسيت 00 الأصوات كلها برات الملعب 0

بلشت المباراة والكل صار يشجع ( نه نه نه 00 به به به ) وجمهور الفريق التاني ماقصر كمان بالتشجيع

( به به 3 صفقات , نه نه 3 صفقات )

المهم 00 خلصت المباراة ورحت لأرجع صوتي 00

عطيتو الورقة وراح للصندوق , وبعد شوي إجا وقال لي :

صوتك راح بالغلط لواحد تاني

عصبت وقلتلو : ( بع هع نه م ز ن ت ا )

بلا علاك وصياح 00 صوتك راح 00 شو بدي اعملك ؟

رحت عالبيت , كيف بدي عيش بلا صوتي ؟ يالله دخيلك شو عملتلك أنا ؟

كل هالشي لأن رحت شجع فريقي المفضل ؟

كتبت لأهلي شو صار معي

اتصل بابا على ال 555 ووقفلي صوتي 00 يعني بتعرفوا الأوضاع هلأ

بيجوز حدن يستخدمو لأغراض شخصية 0

حطينا إعلان بالصحف والمجلات 00 على واجهات الدكاكين

بالحارات 00 بالكراجات 00 على أبواب الدوائر

( ضاع صوتي إذا حدن شافو يتصل على .... وله الأجر والثواب )

ولساتني لهلأ عم أستنى حدن يرجعلي صوتي

ساعدوني 00 ضاع صوتي يا سامعين الصوت

اللهم ارحم شهداء الوطن وأسكنهم فسيح جنانك

NouR