الصداقة هي الوجه الاخر غير البراق للحب , ولكنه الوجه الذي لا يصدأ

الاخوه والاخوات : Princess Jordan  / رنيم السعوديه  / دماء مبدع  / الحر الأسير

انتم يا من تغرسون الرغبة لدي للاستمرار في تلك السلسله !!

بلا شك ينتابني احيانا بعض من احباط لقلة متابعة هذا المسلسل والتي تاتي على قدر اقل من المجهود المبذول !! لست اهتم بحجم الردود بقدر ما اهتم بحجم المشاهدات !!

ولكن انتم يا احبتي سالفي الذكر نورتم لي الطريق بتواجدكم الدائم في كل الحلقات !! فشكرا جزيلا لكم على هذا الدعم المتواصل !! والذي يعني لي الكثير الكثير !! والشكر موصول ايضا لكل اخ تكرم ووضع ردا في احد الحلقات " ليس لمجرد الرد !! بل لانه بالفعل كلف نفسه وتابع هذه الكتابات ..

فشكرا جزيلا لكم

نعود لنستكمل ما وصلنا اليه من حلقات هذه السلسله : ونبدا بالمشهد الاخير والذي انتهت به الحلقه السابقه

ولكن قبل ذلك من يرغب بمتابعة ما مضى من حلقات ارجو منه الدخول هنا

الحلقات  السابقه

ما بين الصداقة والحب " الحلقه الثامنه "

المشهد الاول / اجتياح للذكريات

بعد  مرور اسبوع من الحزن الذي اجتاح وليد وروند كانت روند حزينه مستلقيه على فراشها وسط ضوء خافت في اول الليل !! وكانت تجوب بذاكرتها كل اركان صداقتها السابقه مع وليد !! وفي هذه الاثناء نامت روند !!

وبعد مضي ساعات استيقظت روند فزعه من نومها وقد اشار الوقت الى منتصف الليل !! كانت روند تلهث وكانها كانت تحلم بوليد فتذكرت كلمة قالها وليد لها

============================================================

وليد : طب اسمعيني !! انا لو يعملولي غسيل مخ كمان ما راح تركك !!

روند : يا الللللللللله !! لك شو هيدا !! عيوني دمعت من كلامك !!

وليد : بجد يا روند !! اوعك تفكري بيوم اني راح اتركك طالما عم اتنفس !! وبدي اياك تتاكدي من هالشي وتؤمني فيه ايمان كامل !! واتاكدي اذا حصل يوم وتركتك او قلتلك اني بدي اتركك فتاكدي انه في شي غلط بالموضوع ...  فتاكدي انه في شي غلط بالموضوع ...  فتاكدي انه في شي غلط بالموضوع ...

 فتاكدي انه في شي غلط بالموضوع ...   فتاكدي انه في شي غلط بالموضوع ...

===============================================================

وعادت روند من تلك الذكرى وتلك الكلمات فقالت : معقول؟؟؟ شو بدو يكون صاير يعني ؟؟

هل بالفعل وليد تركني ولا صرله شي واجبره ليعمل هيك ؟؟؟ بس شو هو يا ترى ؟؟

وبعد لحظات من الحيره قالت روند: بهالوقت هاد بالعاده بكون وليد موجود بالنت !! يا ترى راح يكون متصل ولا عملي بلوك وحذفني ؟؟بدي فوت واتاكد !!

المشهد الثاني / مواجع على الهاتف

كان الوقت يشير لمنتصف الليل وكان وليد يحدث صديقه عميد على الهاتف

وليد : حبيبي عميد !! بدي اسالك : انت فاتح نت صح؟؟

عميد : اه وفاتح الماسنجر كمان !!

وليد : روند موجوده ؟؟

عميد: لا مش وجوده !!ويتابع !! وليد ليش انت عملت هيك؟؟

وليد : شو اللي عملته انا؟؟

عميد : يعني انت ضحيت كثير ! رضخت لمطالب ابوها وحبيبها بكل سهوله !!

وليد : سبق وقلتلك مستعد اعمل اي شي كرمالها

عميد : وهل يا ترى انت عملت الصح؟؟ بالسهوله هاي توافق؟؟

وليد : يا عميد لو كنت مكاني شو راح تعمل !!

عميد : اولا انا مش مكانك ولا راح اكون مكانك !! لكن لو لا سمح الله كنت مكانك بحكي لروند كل شي

وليد : اعوذ بالله بدك اياني اكون سبب في تدمير علاقتها مع ابوها وفي تدمير حبها؟؟

عميد : احسن ما تكون انت السبب في تدمير صداقتك هاي

وليد : انا مش اناني يا عميد !! عن نفسي طز فيي !! المهم هي وبس

عميد : مشكلتك يا وليد انك حساس لدرجه كبيييييييييره وعلى نياتك !! عمرك ما عرفت بنات الا هالبنت !! مشان هيك تعلقك فيها واستعدادك لعمل اي شي لاجلها بتغلب عليه العاطفه !!1 العاطفه وبس بدون ما يكون في عقل يفكر !

وليد : اللي بياكل العصي مش مثل اللي بيعدهم يا عميد !!

عميد : انا حاسس فيك يا وليد !! وشاعر معك !! بس انت كثير كثير بتضحي !!

على كل روح نام هلا وارتاح !! وبكره النا حكي ثالني

وليد : تصبح على خير !!

المشهد الثالث / دخول بالخفاء

دخ لت روند للماسنجر  وكان غرضها ان ترى ان كان وليد موجود ام لا !!

فلم تجده ولكنها وجدت صديقه عميد متصل !! فبادرته السؤال

روند : سوري عميد على الازعاج !! بليز ما تخبي عني !! وليد موجود شي ؟؟

عميد : لا والله مش موجود !!

روند : شفت شي متغير على وليد حكيلك شي؟؟

عميد يكتفي بكلمة : لا !!

روند : اوكي سوري على الازعاج ومن ثم تخرج !!

روند تخاطب نفسها : معقول يكون وليد بجد حذفني او عملي شي بلوك ؟؟

ومن ثم تقول !! لك صحييييييييييييييييييح كيف غابت عنك هالفكره يا روند؟؟؟ باسويرد ايميل وليد معي !! بدي شوف واتاكد

وبالفعل تدخل روند المسنجر مره اخرى ولكن بواسطة اميل وليد !!

وبمجرد ان دخلت خاطبها عميد !!

عميد : ولييييد !! الله سترك روند قبل شوي كانت هون !!

روند : عنجد ؟؟ شو حكت

عميد : سالت عنك !! وقلتلها انك مش موجود !!

روند : اها

عميد : يا زلمه والله في لحظه كنت بدي اقولها كل شي

روند يزداد اهتمامها بمحادثة عميد وتستمر بتقمص شخصية وليد ..

روند : شو كنت بدك تقلها؟؟؟

عميد : الحقيقه !! السبب الحقيقي  لابتعادك عنها !!

روند لا شعوريا : وشو هو السبب الحقيقي برايك ؟؟

عميد : مال وليد ؟؟ علينا ؟؟ بعدين شو دخلك انت الماسنجر ؟؟

روند : وليش مستغرب ما الي بالعاده يعني ؟؟

عميد : على الحساب !! وعدت فادي حبيب روند انك ما تدخل !!

وهنا تصعق روند لسماع ذلك ولكن لم تفهم لماذا وكيف ومتى فقالت لعميد : لحظه !!

روند تخاطب نفسها : شو صاير بين وليد وفادي !! وشو هو الشي اللي طلبه فادي من وليد !!

الا ما القى شي بالبريد الالكتروني !! وتذهب لصندوق البريد الخاص بوليد فتجد عدة رسائل سابقه من حبيبها فادي لوليد !!وتقرا تلك الرسائل فتعرف ان هناك امرا دبره فادي ولكنها لم تستطع ان تتبين حقيقة الامر بدقة ..

عادت روند لمتابعة كلامها مع عميد وطبعا بشخصية وليد

روند : بااااك !!

عميد : اهلين وليد !! اه سيدي !! ما قلتلي شو خلاك ترجع للماسنجر مع انك وعدت فادي انك ما تدخل ؟؟

روند : وفكرك ليش هو طلب مني ما ادخل؟

عميد : اكيد علشان ما تشوف روند ولا تشوفك !!

روند : وليش ما بدو ايانا نشوف بعض ؟؟

عميد : مال وليد ؟؟ شو قصتك اليوم؟؟ كنك شارب شي ؟

روند : سوري عميد !! انا مني وليد !! انا روند !!!

عميد : شووووووووووووووووووووووو !!! كيف يعني ؟؟

روند : سوري بس انا روند وداخله بايميل وليد !! وهو ما بيعرف هالشي !!

عميد يصعق ولا يعرف ما يقول !!

روند : بليز عميد انا عرفت الموضوع وبدي منك تحكيلي كل شي بتعرفه !!

المشهد الرابع /ارتباط

جلس السيد فراس مع فادي يتحادثون بخصوص مستقبل روند وفادي

السيد فراس : ليك يا فادي !! انت بتعرف اني بكره مسافر !! ما بدي وصيك على روند !!

فادي : ولو يا عمو !! بدون ما توصي راح حطها بعيوني !!

السيد فراس : وهي عشمي فيك !!

اسمعني !! بالمره الجايه لما ارجع خلاص بدي زوجكم !! حلكم كل هالوقت !! بدنا نفرح فيكم !!

فادي : يا ريت يا عمو !!انا بنتظر اللحظه هاي من زمان !!

السيد فراس : اوكي حبيبي فادي !! لما ارجع اكيد بتكون روند نسيت الشي اللي صار معها بخصوص وليد !! وبنزوجكم لبعض !

المشهد الخامس / وليد مستلقي على فراشه

كان وليد مستلقي على فراشه ويفكر بروند وحالة الحزن تخيم عليه !! رن هاتفه النقال في هذه الساعه المتاخره من الليل !!!

وليد : الو !!

عميد : وليد !! فوت عل النت !!

وليد : وعليكم السلام !! هيك الواحد بيحكي مع الواحد؟؟ ما في مرحبا ولا شي؟؟

عميد : وليد عنجد فوت على النت !!

وليد : اعوذ بالله شو بدو يفوتني !! بعدين ليش بدي افوت شو القصه؟؟

عميد : روند بدها اياك عم تستنى فيك !!

وليد يستند واقفا بعد ان كان يتكلم وهو متمدد على السرير  : شوووووو ؟؟ شو بتستنى فيي؟؟ شو رجعها ؟؟

عميد : وليد !! روند عرفت كل شي !! عرفت كل شي يا وليد

وليد : ومين حكالها ؟؟

عميد : انا

وليد : يا الله عليك يا عميد ليش تحكيلها !! هيك اللي بامنك على سر

عميد : افهمني يا وليد !! روند دخلت المناسنجر من ايميلك ولما حكيت معها فكرتها انت !!وصرت اناقشك في الموضوع لكنها طلعت روند !!

وليد: شووووووو ؟؟

عميد : اه يا سيدي انت طالع معطيها الباسويرد ودخلت منه !! وهلا هي بتعرف كل شي وبدها تشوفك !! فخلصني فوت ما عاد في لزوم انك تضل بعيد !!

المشهد الخامس / عتاب

دخل وليد للماسنجر وقد كان يشعر بالخجل الشديد من روند الا انه كان مشتاقا لها للغايه !!

روند : مرحبا وليد !! شو !! ما بدك تحكي معي؟؟

وليد : ما بعرف باي عين احكي معك وباي وجه احاكيك !! انا خجلان منك !!

روند : ولو يا وليد !! هيك تعودنا؟؟ نخجل نحكي مع بعض !!!

وليد : اسف كثير يا روند !! اسف !!

روند : ما تعتذر !!! انا عرفت كل شي صار !! وانت كبرت بعيني كثير كثير بالشي اللي عملته !!

وليد : انا كنت قاسي كثير معك ! بس ما كان بايدي اي حيله !!

روند : لك شبك ولا دب !! ما حكينا خلاص !! بس انا بلومك على شي واحد !!

وليد : شو هو ؟؟

روند : مو احنا تواعدنا انه ما يفرق بينا اي شي؟؟ كيف بترد عليهن؟؟

وليد : روند !! يا اعز شي عندي بالدنيا !! لليوم وبكره بقلك انه ما راح يفرق بينا اي شي !! لكن مش على حساب سعادتك وصحتك !!

روند : ولا اجدب !! انت بتعرفني صريحه كثير معك !! يعني لو ان سهري معك بيعزبني او بيضايقني او راح يخرب علاقتي ببابا كان حكيتلك !!

بيي وفادي تفكيرهم بعلاقتنا غلط مشان هيك هم عملوا هالشي !! بس انا راح فرجيهم !!

وليد : لالا !! اذا كان الي عندك خاطر ما تتمشكلي معهم !! واللي صار صار !! وانا ما بيهون علي تتمشكلي معهم بسببي !!

روند : خلاص اطمن !! كرمالك بس !! بس اكيد راح راجعهم بالموضوع واتاكد اني ما راح اتمشكل معهم !! على فكره !

بتعرف اني اشتقتلك كثير ؟؟

المشهد السادس / فادي ! هديل !! مالذي حدث

جاء فادي الى روند ووجد عندها صديقتها هديل !! وكانت اول مره يراها فيها !!

فادي : مرحبا !! سوري !! ما بعرف انه في عندك حد

روند : مو مشكله فادي !! فوت هيدي رفيقتي هديل !!

فادي : مرحبا هديل " وينظر اليها بنظرات اعجاب "

هديل : تشرفت سيد فادي" وكذلك تبادله نظرات الاعجاب " من غير ان تحس عليهم روند "

روند : بتعرف مين هاي ؟؟

فادي : بيحصلي  الشرف اذا عرفت !!

روند : هيدي رفيقتي بالجامعه !! وهي المرسال اللي بيني وبين ليد!!

فادي : وليد ؟؟؟؟ شبنا روند ؟؟ ما خلصنا من هالقصه؟؟

روند : اي لكان خلصنا !! وميرسي على الشي اللي عملتو انت والبابا !!

فادي : شو قصدك

روند : انت بتعرف !! على كل بنحكي بعدين !!

هديل: يالله روند انا ابغي اروح!! اخليكم براحتكم!! يالله سلام

روند : لوين رايحه !! بكير هديل !!

هديل : معليه روند اعذريني لازم اروح الحين!! سلام روند!! سلام سيد فادي

المشهد السابع/ واجتمع الاصدقاء بطعم الفرح

اجتمع كل من وليد وعميد وعبد الله !! وكان وليد فرحا للغايه واحتفوا جميعا بمناسبة عودة الصداقه بينه وبين روند

عبد الله : يا زلمه لو بعرف انا بدنا نوكل هالحلوان برجعتكم لبعض كان انا بايدي رجعتكم !!

وليد : ايوا كل يا حبيبي كل !! ما هو ببلاش

عبد الله : اللي ببلاش كثر منه

عميد :  بتعرف يا وليد والله انا خايف عليك كثير

وليد : من شو خايف ؟

عميد : بالمشكله الاخيره اللي صارت معك بين قديش انت متعلق فيها وبين لاي درجه بتتاثر بغيابها عنك !!

عبد الله : اه والله !! انا عمري ما شفتك بهيك حاله بحياتي كلها

وليد : شو اعمل يعني !! والله بعزها كثير

عبد الله : قول والله بحبها كثير !!

وليد : اكيد بحبها بس سبق وتناقشنا بمعنى الحب اللي بحبها اياه !!

عميد : خوفي يا وليد بكره تفقد حالك وما تلاقيها جنبك !! ويكون الانقطاع بينكم للابد !!

وليد كان ياكل بالحلويات اثناء حديث عميد !! وبسماعه كلام عميد وقفت اللقمه في فمه واصابه السعال !!

شرب وليد كاس من الماء وقال : الله يخزيك على هيك سيره !!1 يا زلمه كلامك وقف في حلقي ووقف معه الاكل !!

عميد : انا بقلك خايف !! بخاف يجي هذا اليوم

وليد : ان شاء الله اذا بيجي هذا اليوم بكون ميت !!

عبد الله : انت انسان حساس كثييير يا وليد !! واذا حبيت بتحب بقوه مش طبيعيه ونفس الشي اذا حزنت بتحزن بدرجه مش طبيعيه !! فالله يسترنا من الايام الجايه

عميد : لازم توازن يا وليد بين عواطفك وبين عقلك !! حرام عليك تنجر وراء عواطفك بهذا الشكل

وليد : خلاص يا شباب لا تنكدوا علينا !! خلينا مبسوطين !!

عميد : راح اسكر الموضوع بس بدي اقول شي بالاخير !! اللي بصير معك يا وليد سببه انك كنت عايش بدون بنات !!1 ولما التقيت باول بنت طلعت المتقدم والمتاخر !! وصدقني لو كان الك تجارب سابقه مع بنات كان ما صار فيك هيك !!

المشهد الثامن /وعد باللقاء

التقت روند بوليد مساء

وليد : ان شاء الله ما تكوني تمشكلتي مع فادي؟؟

روند : لا تخاف حاولت اني ما اصعد الموضوع !! وهو ما عرف يرد علي بشي

وليد : وشو قلتيله ؟؟

روند : جبتله اياها من الاخر !! وحكيتله انه ما في شي بالدنيا !!او اي شي بيقدر يبعدني عن وليد !!

وبعديها حكالي حتى لو راح تخسريني ؟؟

وليد : وشو قلتيله ؟؟

روند : من بعدها هديت لهجتي معه وراضيته شوي !! وحكيتله !! حبيبي !! انت ما عندك ثه فيني ؟؟

حبيبي بدي تتاكد من شي واحد ! انك نمبر ون بحياتي بعد البابا !! فبليز ما تضغط علي وتحطني بهيك مواقف !! ومن بعدها اتبسم ومشي الحال

وليد : الحمد لله

روند : بس انا حذرته انه ما يعيد الشي اللي عمله معك وما يحكي معك باي كلام قاسي !!

وتتابع روند !! لك وليد !! ما بدنا نلتقي؟؟

وليد : ياااااااااااااااااااااااااه !! نلتقي؟؟  والله حلم حياتي !! بتمنى اشوفك وجها لوجه !! يا الله شو متمني هالشي

روند : لكان شو اللي بيمنعك ؟؟

وليد : ما بظن انه السفر للبحرين او حتى لبنان مسموح او سهل !!

روند : لكان لوين فيك تخرج؟؟

وليد : يمكن الاردن

روند : اي شو عليه ؟؟ انت بس اخرج من فلسطين وانا بنتظرك بالاردن

وليد  : بجد ؟؟؟؟؟؟؟ وبتيجي علشاني للاردن ؟؟

روند : لكان يا اجدب !! هو انت قليل؟؟ والله لو فيني اجي لفلسطين ما تاخرت

وليد : بتعرفي ؟؟ والله فكره !! خلاص بكره بعمل جواز سفر وبدي اسافر للاردن !!

روند : بس ضروري تخبرني قبل باسبوع من سفرك مشان انطرك هونيك

وليد : معلوم معلوم يا روند !! ويتابع  يااااااااااااااااااااااااااه

روند : شبيك وليد ؟؟

وليد : لك لك ! والله صابتني قشعريره ورجفه لما تخيلت حالي سافرت والتقيت فيك !!

روند : مشتاق تشوفيني يا وليد ؟؟

وليد : ولك شو مشتاق؟؟ والله حلم حياتي هاد !!

روند : واتاكد انه ذات الشي بالنسبه الي !!

 المشهد التاسع / الرحيل

وليد يحزم حقائبه وقد نوى السفر للاردن حتى يلتقي بصديقته روند لاول مره !!وكان في وداعه اصدقاؤه عميد وعبد الله وغسان

عبد الله : وليد !! ما بدنا نوصيك دير بالك على حالك

وليد : ولو يا زلمه شايفني رايح للصين !! ما هيها الاردن وراء هذا الجبل !! ساعتين زمن وبكون هناك

عبد الله : ولك يا اهبل دير بالك على حالك من البنت اللبنانيه هاي !!

غسان : اه والله !! ترى مره واحد صاحب يراح يسافر ليلتقي بوحده لبنانيه فلحستله مخه !! ورجع بلا مخ !!

عبد الله : بس صاحبنا وليد طالع ليلتقي فيها ومخه ملحوس بدون هالواسطه !!

يضحك الجميع ويقول عميد :

وليد !! اتمنالك كل خير ويا ريت تسلملنا عليها !! تروح وترجع بالسلامه

غسان كان اخرهم في وداع وليد : ااااااااه يا دنيا !! والله ولقيت اللي اعز  منا يا وليد واللي بيخلوك تطلع من هالبلد مشانهم

وليد : له يا غسان له !! والله انتوا الثلاث من اعز الاصدقاء على قلبي !! وكل واحد فيكم اله مطرح ومحجوز بقلبي وما حد بيقرب صوبه !!

المهم دعواتكم وديروا بالكم على حالكم !!

المشهد العاشر / هل هي الخيانه؟؟

في هذا الوقت شدت روند رحالها الى الاردن بانتظار وليد حسب ميعاد ومكان متفق عليه بينهما !! وقد تركت البحرين وسط عدم رضا من حبيبها فادي !! ولكن فادي استهوته الفتاه التي تدعى هديل والتي كانت صديقه حميمه لروند !! وكان له لقاء معها !!

فادي : مرحبا هديل

هديل : هلا سيد فادي!!

فادي : بليز ما تناديني سيد فادي ! ناديني فادي وبس

هديل : بس !!

فادي : بليز لا بس ولا شي !! ما بدي يكون في تكليف بيني وبينك

هديل : انت تامر !! فادي

فادي : هديل !! من وقت اللي شفتك فيها اول مره طار عقلي !! وبصراحه انا حبيتك !!

هديل تتفاجا : حبيتني !! وروند ؟؟؟؟

فادي : شبها روند ؟؟

هديل :  على اساس روند حبيبتك !!

فادي : لا يا هديل !! هي بتظن اني بحبها !! انا بستلطفها وكرمال علاقتي ببيها انا معها !! المهم انتي

هديل : انه؟؟ وانه شيخصني؟؟

فادي : بتمنى تكوني بتبادليني  نفس اللشعور ؟؟

هديل : وشلون عن روند؟؟

فادي : روند ما راح تعرف بهالشي !! الا اذا انتي راح تحكيلها !!

هديل : طيب انت شو تبي بالضبط؟؟؟

فادي : بدي منك تقنعيها انها تبعد عن هيدا اللي اسمه ليد !! ليكي هيها راحت للاردن مشان تشوفه !!

هديل : دامك ما تحبها ليش منزعج ؟؟

فادي : هديل !! انتي بتعرفي انه بيها موصيني عليها !! وما بدي هيدا اللياسمه وليد يضحك عليها وياخذ مصرياتها !!

هديل تقول في نفسها : الحين فهمت!! انت طمعان في فلوسها و  فلوس ابوها!! بس بنشوف

فادي: شبك هديل ليش سكتتي ؟؟

هديل : لا ولاشي!! بس كنت افكر في روند و بعلاقتها بوليد

فادي : انا بعرف انه انتي مرسال بينهم !! بدي منك تحكيلي كل شي بيحكولك اياه !!

هديل : و انت شنو راح تستفيد؟؟

فادي : بكره راح تعرفي !! بس بتمنى  كل شي صار بيناتنا ما يخرج لبره !!

هديل : وانا بعد ما ابي روند تعرف اني شفتك

المشهد الحادي عشر / على الحدود

انتظر وليد التصريح من الجيش الاسرائيلي ليعبر الاردن !! ولكنهم طلبوا منه الانتظار بعد ان احتفظوا بجواز سفره !!

وبعد ساعات من الانتظار التقاه ضابط المخابرات الاسرائيلي

الضابط : وليد ليش بدك تروح للاردن ؟؟

وليد : بدي اروح سياحه ؟؟

الضابط : سياحه ولا بدك تشوف البنت اللي اسمها روند؟؟

وليد يصعق لسماع ذلك فيقول له الضابط : شو يا حبيبي !! كل اشي عملته من وقت ما ولدتك امك احنا بنعرفه !!

وليد : وشو يعني ! ممنوع اشوفها؟؟

الضابط : لا حبيبي !! انت ممنوع من السفر

وليد : ليش ممنوع انا شو عملت ؟؟

الضابط : انا بحاكيك عربي وعلى رايكم يا اهل فلسطين " انت ممنوع تخرج بتاتا !!

وليد : انا بدي اقابل الضابط المسؤول !!

الضابط : حبيبي لا تضيع وقتك ووقتنا : روح ارجع بلاش احجزك وبالاخير ترجع !! يعني ما تحلم تخرج !!

عاد وليد لبلده يجر اذيال الخيبة والالم !! في الوقت الذي طال فيه انظار روند لوليد فما كان منها الا ان تعود هي ايضا

المشهد الثاني عشر / وتتسارع الاحداث

عادت روند للبحرين وكذلك عاد وليد لفسطين ولم يحققا حلمها بالالتقاء وجها لوجه !! ومع ذلك استمرت العلاقه بينهما وكانت كل يوم تزيد قوة عن اليوم الذي يسبقه!!

وكان كل من فادي وهديل يمضون في خيانتهم دون ان تشعر روند او تحس بذلك .

هديل تحدث نفسها : والله طلعت مو سهل يا فادي!! طلعت ترسم لبعيد!!! عينك على فلوس روند!! شعليه!! بس انا ما راح اقبل اني اطلع من المولد بدون حمص !! لازم اجرب من فادي اكثر و اكثر

روند تصاب بوعكه صحيه فتتصل بهديل وتقول لها بان تخبر وليد بانها مريضه ولن تدخل الانترنت وكان هذا على مسمع فادي !!

تنشب بعض الخلافات بين روند وفادي ولا يجد فادي غير وليد حتى يكون الوسيط !! فينجح وليد في ذلك الامر الذي يعده فادي حدثا خطيرا بان يكون وليد هو مفتاح روند وهو الذي يمون عليها بكل شيء ..

كل هذه الاحداث لخصت مدى قوة الصداقة بين الطرفين ومدى انزعاج فادي لتطورها ووصولها لهذا المستوى

المشهد الثالث عشر / عيد الحب " الفالنتاين " 

دخل وليد لبريده الالكتروني كالعاده في كل يوم ووجد رساله من روند !! وقد تعود على ذلك على الرغم من لقاءاتهم اليوميه الا انهم كانوا يتبادلون الرسائل في غالب الايام

وحين فتح وليد الرساله وجد محتواها ما يلي :

"

عندما يفتح الإنسان دفتره ويحمل قلمه ...ليكتب ما تطويه صفحات قلبه ... يعجز هذا القلم أن يلبي للإنسان ما يريد أن يصفه من محبة ومشاعر ... ولو بقي هذا القلم سائلا مدى الدهر ... واستمرت صفحات الدفتر بالتوالي واحدة تلو الأخرى ... فقد يفنى عمر الإنسان وهو لم يوفي هذا الإنسان حقه بعد ...

لقد اكتشفت أن هذا العيد ليس للعشاق فحسب ...بل هو عيد للمحبة لا تستطيع من خلاله أن تحصر مشاعرك للحبيب فقط ... واكتشفت أن هناك من يستطيع أن يشاطر الحبيب داخل القلب ...وأن يتغلغل بداخله دون طلب أو استئذان ...

ذلك هو أنت ... من وصفتني بأجمل الكلمات ... ومن صورتني بأبهى حلة قد لا أكون أستحقها بهذا القدر ... منحتني صداقة لم أتصور يوما أن تدخل قلبي إلى هذه الدرجة ... وزينت أيامي بوشاح من عبق زهور الصداقة المخلصة ... في كل يوم أجد أن اكتشافي تزداد قيمته يوما بعد آخر ...ويشتد تعلقي بهذا الاكتشاف الذي لا يمكن أن أبيعه مهمى وصل سعره إلى أعلى قمم بورصات الدنيا ...اشتريت قلبي بأبخس الأثمان ...وأنا الذي لم أهتم لأحد في مثل حالتك قط ...لازلت أفكر وأرجع ذاكرتي إلى الماضي ...لأعلم فقط ما هو السلاح الذي كنت تحمله بين يديك ... والذي فعل بي هكذا ... لأجد أن السلاح لم يكن في يدك ... بل كنت تحمله داخل قلبك ... بهذا السلاح استسلم قلبي ورفع العلم الأبيض ... فصرت أنت بئر أسراري ... ورحت أسرد لك ما كان يختلج داخل جوفي ...ليصبح من بعدها قلبي باباً مشرعا تستطيع أن تدخله وقتما تشاء ...

قد أكون أملك من الصداقات الكثير ... وقد يكون لكل أصدقائي مكانة كبيرة في قلبي ...لكنك اكتسحت الجميع بطريقة لازلت أجهل تفسيرها ...فعلى الرغم من كل الحواجز التي تفصل بيننا ...وعلى الرغم من المسافة التي تبعدنا ... إلا أن قوة هذه الصداقة أبت إلا أن تحطم أي حاجز يعترض طريقها ... وتخطت من خلال أسلاك ممدودة آلاف الكيلومترات ومئات الأميال ... لتصبح أقوى من أن تهزها الجبال ... أو تزحزحها الرياح ...

قد يتساءل الجميع أي كلام لصديق هذا ؟؟؟ هذا لا يصح أن يقال إلا للحبيب فقط ؟؟؟!!!وسأجيبهم أنا بابتسامة لأن الجميع لن يستطيع أن يفهم قصدي ...لأنهم لم يعيشوا صداقة من هذا النوع ...والذي أعده من الأنواع النادرة والتي لا تقدر بالدرر ...

في كل مناسبة تمر علينا ...تكتب لي أمنياتك في أن تقدم لي شيئا ملموسا ... أو هدية قيمة ...لكنك لا تدرك أن قيمة الهدية التي تقدمها لي أكبر قدرا وأعلى مكانة من أي هدية ملموسة قد أتلقاها ...فخزانتي قد امتلأت بالهدايا الملموسة ...لكن القليل منها من يستطيع أن يدخل البهجة إلى قلبي ...وما أحلى الهدية حين تكون معنوية ومن أغلى الناس على قلبي ... فالهدية الملموسة لابد من أن يأتي يوم وتفنى فيه هذه الهدية ... لكن المعنوية تبقى محفورة في القلب مهما طال الزمن ...فإن السنين لا تمحيها ... وتبقى في الذاكرة مدى العمر ...

فشكرا جزيلا لك يا أجمل أصدقاء الدنيا الذين عرفتهم ... ولا أعتقد أنني قد أصدف إنسانا يمتلك مثل إخلاصك ثانية ... ولن تستطيع رسالتي هذه أن توفيك حقك ... على الأقل من ناحية منزلتك عندي ...

كل عام وأنت بخير ... وعيد محبة سعيد لك ولكل من تحبهم ويحبونك ... وأتمنى أن تبقى جميع أيام حياتك أعياد وفرحة ومحبة.

"

حينما قرا وليد هذه الكلمات سالت دموعه !! فبادلها برسالة اخرى !!

                                          المشهد الثالث عشر / امنية العمر

التقت روند بوليد وقد تبادلا كلمات الود والالفه بينهما واثناءالحديث !!

وليد : روند نا بعتذر منك بدي روح عم يندهوني للعشاء !! بتعشى وبرجع !!

روند : عم تاكلوا كلكم مع بعض عيله وحده؟؟

وليد : اكيد كلنا بنلتم على مائده وحده !!

روند : بتعرف يا وليد !!انا بحسدك كثير !!

وليد : على شو

روند :ما يغرك انه معي مصاري كثير بس المصاري هاي ما بتحققلي السعاده !! وحلم حياتي من زمان كثير !! اني التم انا وعيلتي ونقعد سوا على سفره وحده !! لك مستعده اتخلا عن كل المصاري بس يصير هالشي لمره وحده

وليد : يااااااااااااااااااااه !! للهدرجه ؟؟ طب ما في امل يرجعو ابوك وامك لبعض !!

روند : صعب كثير !! صعب كثير يا وليد

وليد : صعب لكن مش مستحيل !!

روند : خلاص وليد !! بليز فل ما بدي اخرك اكثر من هيك !!

خرج وليد للعشاء وكان وضع روند الاسري قد شغل كل تفكيره !!

                              المشهد الرابع عشر / روند في حالة حزن

ارسل فادي رساله لوليد يساله ان كان حدث شيء ما بينه وبين روند لان روند حزينه وتخبيءامرا ما عليه !! وقال له بانه يعرف بان روند تبوح له بكل شيء فطلب منه ان يعرف حقيقة الامر !!

ودخلت روند بالمساء !!

روند : هااااااااااااااااي وليد

وليد : روند شو مالك ؟؟

روند : شو بني !! ما في شي

وليد : فادي حكالي انه في شي زاعجك شو هو يا روند !1 وارجوك ما تخبي عني !!

وبعد اخذ وعطاء استسلمت روند لوليد وباحت له بكل شيء !!

وليد : معقول؟؟؟؟ هيك امك بتعاملك؟؟

روند تبكي وتكتب لوليد : لك انا بسىاتصلت عليها لاطمن عليها !! حكيت معي بوش ناشف وقال اني مو بنتها !! وجيتي على الدنيا كانت اكبر غلطه عملتها بحياتها !!

وليد : طولي بالك روند طولي بالك !!

روند : لك يا ريتني متت ولا اني سمع هالحكي من امي !! شو عملت انا لتكرهني هيك ؟؟

انتهت  المحادثه بينهما وكان بال وليد مشغولا بامر روند وعائلتها واصر في نفسه الا ان بقوم بشيء ما

                           المشهد الخامس عشر / الاستعانه بهديل

ارسل وليد بطلب هديل لامر هام وجاءت هديل

هديل : خير وليد شهست وشصاير؟؟

وليد : اسمعني يا هديل ! انتي بتعرفي لاي درجه انا بعز روند !! وبتعرفي اني مستعد اعمل اي شي كرمالها

هديل : اكيد يا وليد انا الي اعرف هالشي

وليد : روند عم تعيش وقت عصيب والظاهر مشاكل عائليه فهل فيك تساعديني وتساعديها؟؟

هديل : و بشنو اقدر اساعدكم؟؟

وليد : بدي تربطيني مع اهلها

هديل : نعم!! اهلها؟؟ وشنو تبي من اهلها!

وليد : بدي احكي مع  امها او ابوها !! بتقدري تساعديني بهالشي ؟؟

هديل : والله مادري شاقولك!! راح اشوف شنو اقدر اسوي وإن شاءالله خير

                           المشهد السادس عشر / هديل تخبر فادي بالامر

فاد ي : معقول؟؟ هيك وليد حكي ؟؟

يخرب بيته هيدا ناوي يضيعنا؟

هديل : وشدخلنا احنه؟

فادي : لك عارفه شو يعني انه بيها لروند وامها يرجعوا لبعض؟؟

هديل : شنو يعني ؟

يعني راح يلتم شمل العيله !! يعني راح نطلع من المولد بلا حمص !!

واذا كانت ورثة السيد مروان راح تروح لروند لوحدها ! فوقتها راح تقسم عل كل العيله ! هيدا اذا حطيتي ببالك انه امها لروند ما بطيقني !!!

هديل: ورثة السيد فراس؟؟ ليش هو راح يموت؟؟ او ؟؟؟؟

فادي : لالالا ما يروح فكرك بعيد !! انا عم احكي بالمستقبل !!

بس هيدا وليد زودها كثيييييييييير كثييييييييير ولازم لاقيله حل

هديل : معقول يقدر يعمل شي؟!!

فادي : وليد منه سهل / واذا صمم على شي بيعمله !! وبعدين هو عنده اسلوب  فظيع للاقناع وبيقدر ياثرعلى اي انسان بيقابله

                                    المشهد السابع عشر / اختفاء روند

كانت روند قد اخبرت وليد بانها ستغيب يومين للانتهاء من اخر فحص لها بالفصل الدراسي

ولكن مر اسبوع ولم تظهر روند ! ولم تجب على اي بريد الكتروني من وليد ! حتى بالهاتف النقال لم تجب !

ازادد قلق وليد وخوفه من غياب روند الفجائي واللامبرر فما كان منه الا ان استعان بهديل وطلب ان يراها على فور السرعه

                                                   وهنا تنتهي الحلقه

تابعونا في الحلقه القادمه مع التشويق الحقيقي للمسلسل واكبر واهم بل واكثر االاحداث تعقيدا في الحلقات القادمه

                                    فاين روند ولماذا اختفت

                                            تابعونا

                      والسلام عليكم ورحمة الله وبركاته