الصداقة هي الوجه الاخر غير البراق للحب , ولكنه الوجه الذي لا يصدأ

احبتي !! اهلا وسهلا بكم من جديد

بداية اود ان اتوجه بالشكر الجزيل لكل من حرص على متابعة هذه السلسه وكذلك كل من تكرم بالرد على حلقاتها !! فلكم جزيل الشكر فانتم الشعله التي تنير لي طريقي للوصول للحلقه الاخيره 

نعود لاستكمال ما وصلنا اليه ولكن قبل ذلك وكالمعتاد من فاته متابعة الحلقات السابقه فعليه الدخول على هذا الرابط

الحلقات  السابقه

مضت روند في صداقتها الجميله مع وليد متجاهلة الرغبه لدى والدها وحبيبها بضرورة انهاء هذه الصداقه !! واعتبرت ان ذلك مستحيل وانها ستمضي في صداقتها مع وليد الى ان ينتهي عمرها!! وان لن يحول بينها وين تلك الصداقه الا الموت !!

في هذه الاثناء كان هناك مخطط شيطاني في راس فادي لكي يحبط تلك الصداقه !! لنعرف معا بماذا يفكر فادي

 " ما بين الصداقة والحب " الحلقه السابعه "

المشهد الاول / حينما يمكر الشر للخير

السيد فراس : يظهر الموضوع يا فادي اكبر من ماحكيتلي بكثير !! وهالشي ما بينسكت عليه ابدا

فادي : معناها يا عمو ما في الا حل واحد وبس !! وعن طريقه بنقدر ننهي هالمهزله هاي !!

السيد فراس : وشو هو الحل برايك يا فادي؟؟

فادي : ما فينا نبعد وليد عن روند الا بالحيله !!

السيد فراس : ما فهمت عليك !! شو هي الحيله هاي؟؟

فادي : عمو !! هلا روند ما راح تترك وليد الا اذا اجتها صدمه من طرفه او هو يتركها !! واذا صار هالشي فراح تتركه عن قناعه !! واذا كنا بدنا نضغط عليها فمع الوقت يمكن تحن ويرجعو لبعض !! مشان هيك لازم نخليهن يتركوا بعض وهن مقتنعين ومصرين على هالشي

السيد فراس : وكيف بدو يصير هالشي ! ما شايف لاي درجه متعلقين ببعض !!

فادي : اااااااااه !!سالتني كيف عمو !! ليك !

روند من مده منا قصيره عرفتني على هيدا اللي اسمه وليد وحكيت معه !! وياللي لمسته منه انو انسان حساس شوي !! وبسيط !! ومشان هيك بداية النهايه للصداقه الوهميه هاي راح تكون من عنده !! هو مفتاح الحل !!

السيد فراس : ليك فادي !! انا ما عم افهم شي !! احكيلي بالضبط شو ياللي براسك !!

فادي : راح اطلب منه يترك روند !!

السيد فراس : يا سلام شي حلو !! وفكرك بيرد عليك !!

فادي : راح انتظر اللحظه المناسبه ووقتها راح تشوف كيف بدو يوافق ويعمل كل ياللي بدنا اياه

المشهد الثاني /عهد ومواثيق

في ليلة من ليالي السمر والسهر بين الاصدقاء !! كان هذا الحوار

روند : بدي اسالك وليد !! شو هو اهم شي بحياتك؟؟

وليد : اممممم ! انتي !!

روند : لا بجد بحكي !! يعني راح كون اهم من عيلتك ورفقاتك اللي عندك؟؟

وليد : اسمعيني !! لما احكي اي اشي او افاضل بين اي شيء بالنسبه للاهميه الي فاكيد بتكون المفاضله خارج نطاق اهلي !! لانهم بكونوا التوب !! وعيب علي اعمل مقارنه بينهم وبين اي انسان ثاني !!

اما بخصوص الاصدقاء فاكيد الاصدقاء بالنسبه الي هم كل حياتي !! وانتي على راس الهرم !!

روند : يعني لو خيروك بيني وبين غسان او عميد !! يا ترى راح تختار مين؟؟

وليد : راح اجاوبك بس بسؤال !! يا ترى لو خيروك بيني وبين حبيبك فادي او  ابوك حتختاري مين ؟؟؟

اذا انتي عرفتي تجاوبي وقتها انا راح اجاوبك !!

روند : وليد !! يا ترى راح يجي يوم وتتركني فيه؟؟

وليد : بتعرفي من مده شو حكالي غسان؟؟ 

روند : شو حكي؟؟

وليد : قللي يا وليد ما بتخاف بكره روند تتركك؟؟ قلتله عمرك شفت صديق بيقول لصاحبه بدي اتركك لازم نفترق ؟؟ !! جاوبني وقللي هذا لما يكون الصديق شب مش بنت

روند : وليد !! اسمعني منيح وحط ياللي بدي احكيه براسك !! انا ما فيني اتركك بالمرره !! ولا راح اتنازل عن الصداقه هاي ابدا ابدا !! عرفت كيف؟ وحتى لو كل العالم اجتمعوا علي مشان اتركك ما راح رد عليهن!! يعني يمكن لو يعملولي غسيل مخ بجوز وقتها تركك :)

وليد : طب اسمعيني !! انا لو يعملولي غسيل مخ كمان ما راح تركك !!

روند : يا الللللللللله !! لك شو هيدا !! عيوني دمعت من كلامك !!

وليد : بجد يا روند !! اوعك تفكري بيوم اني راح اتركك طالما عم اتنفس !! وبدي اياك تتاكدي من هالشي وتؤمني فيه ايمان كامل !! واتاكدي اذا حصل يوم وتركتك او قلتلك اني بدي اتركك فتاكدي انه في شي غلط بالموضوع

روند : مثل شو غلط !!

وليد : ما بعرف!! لكن حطي ببالك اني ما راح اتركك ابدا ابدا ابدا

المشهد الثالث / خطة التفريق

جلس فادي مع السيد فراس ليعرض عليه تفاصيل خطته لتفريق روند ووليد عن بعضهما !!

فادي : ليك عمو !! ياللي عم فكر فيه هو انو اتحايل على وليد مشان يترك روند ! وضروري تكون انت معي !!

السيد فراس : وكيف بدو يكون هالشي !!

فادي : يعني بحكيه مثلا من نقطة ضعفه!! يعني كونه متعلق بروند كثير وبيعزها كثير فراح قله انه استمرار العللاقه بينكم بيضرها !! وعامللها مشاكل بالجامعه وكمان بالبيت !! وبندق على الوتر الحساس بالشي ياللي  بيخصك بانو انت منك راضي عن العلاقه هاي وبسببها راح تخرب العلاقه بينك وبين بنتك !!

السيد فراس: ويا ترى وليد هيدا راح يوافق على هالشي او يصدق هالشي ؟؟

فادي : اذا كان بيعزها لروند بصحيح فاكيد راح يوافق !! وما في قدام منه الا يوافق

 اليوم بس التقي فيه راح تعرف كل شي !! انا بعثتله ايميل وقلتله بدي شوفه بس ضروري روند ما تعرف !!

السيد فراس : وبتعتقد انه ما راح يحكي لروند ؟؟

فادي : اكيد ما بضمن هالشي !! لكن بضمنه لليوم على الاقل لحتى نشوفه !! لانه روند بكره عليها فحوصات وما راح تدخل النت اليوم ! ولما نشوفه مباشرة راح نقنعه انه ما يحكيلها هالشي

المشهد الرابع / رساله شفويه

جلس وليد كالعاده امام الكومبيوتر وقرا رسالة فادي !!وما هي الا لحظات وتدخل هديل صديقة روند

هديل : هلا وليد،، شلونك

وليد : اهلين هديل الحمد لله !!

شكلك جايه هون كمرسال صح ولا لا؟؟

هديل : اي والله!! روند بتعتذر منك اليوم لأنها

ماراح تدخل لأنه عندها امتحان باجر!! و تقولك انها نست تقولك امس!!

وليد : اهااا!! يلا معلش !! بس ليش ما اتصلت علي وخبرتني

هديل : حاولت تتصلك بس الظاهر انه تلفونك كان مغلق او مافيه ارسال!!

وليد : يلا معلش !!! سلمي عليها ان شفتيها بالجامعه بكره

هديل : لا مابي اسلم عليها!! لا تصير طماع!!:) و انت اصلاً باجر بتشوفها و بتسلم عليها!! ولا لازم تغربلوني وياكم

يضحك وليد ويقول : شو بدنا نعمل ما النا غيرك

هديل : وانا حاضرة دايماً!! والحين اعتذر منك لأنه باروح!! يلا سلام

وليد : مع السلامه وشكرا الك !!

في هذا الوقت لم يكن هناك رغبه لوليد للبقاء على الكومبيوتر لكنه مضطر لذلك لان له موعد مع فادي !!

انتظر وليد لبضع دقائق ودخل فادي !!

فادي : مرحبا وليد

وليد: اهلين فادي !!

فادي : ليك !! بدون مقدمات ! حكيت شي لروند بخصوص رسالتي؟؟

وليد : لا ما حكيتلها !! بالاصل ما شفتها اليوم والظاهر ما راح تدخل !!

فادي : حلو كثير !!!اسمعني منيح !!

بظن انك رجال وعلى قد المسؤوليه ! وبظن كمان انك بتعزها لروند كثير كثير !! فهل انت بتتمتع بهالشي؟؟

وليد : اكيد يا فادي ولو !! بس طبعا مهما كنت بعزها لروند فاكيد ما راح تكون بقدر معزتك وحبك لالها !!

فادي : مشان هيك انا جيتك !! وياللي بتمناه منك انك تكون رجال وما تحكي شي من ياللي بحكيلك اياه لروند !! سواء اتفقنا او ما اتفقنا

وليد : بدك الصراحه خوفتني !! شو الموضوع ؟؟

فادي : وليد !! ما في شك بانو روند بتعزك كثير ويمكن اكثر من ما انت بتعزها !! لكن انت بتعرف شو عملت هاي الصداقه ياللي بينك وبينها ؟؟

وليد : ما فهمت عليك !! شو عملت ؟؟

فادي : يا وليد !! صداقتك بروند عامله كثيرمشاكل لالها !! صحيه ونفسيه !!

وليد : يا لطيف ليش شو صاير؟؟

فادي : روند عم تتعب كثير من السهر معك وما عم تنام منيح !! وجسمها ذبل وصحتها رجعت لورى !! بس هي عم تكابر !!

هنا يشعر وليد بالاحباط والالم !!

ويتابع فادي : وللعلم !! احيانا بتكون تعبانه كثير الا انها بتصرانها تسهر معك علشانك !! فهل انت بترضى بهالشي؟؟

وليد : اكيد لا !! انا ما بيرضيني انه يصيبها اي مكروه بسببي !! لو بدفع حياتي ثمن لهالشي !!

وليد : لو قلتلك ادفع صداقتك ثمن لهالشي شو بتعمل؟؟

وليد : ما فهمت عليك !

فادي : يعني لو قلتلك او طلبت منك تتركها !!1 كرمالها !! بتوافق على هالشي؟؟

وليد  : اتركها؟؟؟؟؟؟؟؟ بس هيك هي بتتحطم يا فادي !! وبعدين هل اني اتركها بكون حل للي بتحكي فيه؟

فادي : هي اكيد راح تزعل !! بس مع الزمن بترجع تروق !! لكن لو ضليتوا مستمرين مع بعض بهالشي راح تخسر حياتها !!

وليد : خلاص يا فادي !! مش بالضروره اتركها !! بيكفي اني اشوفها ساعه وحده بالنهار وما بدي السهر معها !!

فادي : وليد !! ما تكون اناني !! فكرك هي ما راح تحس بهالشي؟؟ اكيد راح تحس وراح تضغط عليك وتعرف !! وان عرفت راح تتعقد المسائل بيني وبينها وبينها وبين بيها !!

وليد : ليش شو جاب ابوها للموضوع؟؟

فادي : انا حكيتلك على الاضرار الصحيه بس ما حكيتلك على الاضرار النفسيه !!

وليد: شو الضرر النفسي اللي تسببت فيها صداقتي معها؟؟

فادي : انت بتعرف لاي درجه روند بتحب بيها !! ومعلومه لالك ! بيها منو راضي عن الصداقه هاي !! وكذا مره طلب منها تنهي هالعلاقه اللي بينك وبينها بس هي كانت ترفض !! وللاسف علاقتها مع بيها رجعت لورى وكانت ثمن لتعلقها فيك !!

بيرضيك انت هالشي؟؟؟

وليد يصمت !! وكله حيره وارتباك !! وكذلك حسره !! ولم يعرف ما الذي يفعله !!

فادي : وليد !! مشان ما تفكر اني بضحك عليك !! بليز افتح صوت !! راح خليك تحاكي بيها !!

وفعلا تم الامر وبدا الحديث

السيد فراس وبدون مقدمات قال لوليد : ليك اسمعني !! روند عندي بالدنيا كلياتها !! ما بدي شي بالدنيا يبعدها عني او يتسب باذيتها !!

وليد : بس انا !! ويقاطعه السيد فراس ويقول : لحظه !!انا ما كفيت كلامي : انا ما بيهمني لاي درجه انت متعلق فيها بس الواضح انها هي متعلقه فيك كثير وهالشي راح يجرها للدمار !! مشان هيك اذا كنت جد بتعزها بليييز بعد عنها !!! واضح؟؟؟

وليد يتكلم وكله الم : حاضر !! كرمالها وكرمال سعادتها راح عمل اي شي !! اي شي بالدنيا حتى لو بخسرها
!! المهم ما يصيبها مكروه او تعاسه بسببي او بسبب غيري !!

وهنا يستلم فادي الحديث :

هيك انت اثبتت انك بجد بتعزها !! واتاكد بيوم من الايام راح احكيلها هالشي لما تيجي اللحظه المناسبه !! بس اسمعني !! ما بينفع تختفي من حياتها هيك !!

وليد : ولا شو بدك اياني اعمل

فادي : علشان يكون هالشي مقنع وما تضل ناطرتك وعايشه على امل رجعتك بدي منك انت تتركها فيس تو فيس " وجها لوجه "

وليد : كيف يعني ما فهمت

فادي : يعني بدي منك تحاكيها وتوهمها انك كنت تضحك عليها وانها  كانت لعبه بايدك وهيك شي!! مشان ما تفكر ترجعلك !!وكله اكيد بالنهايه لمصلحتها

وليد يصعق لسماع ذلك : اعووووووووووووووووووذ بالله ! مجنون انت !! شو بدك اياني اذبحها؟؟

فادي : لا يا وليد !! افهمني !! ياللي بدو يعمل عمليه لازم يعمل جرح بالاول مشان تنجح العمليه ومن بعدها بيشفى الجرح !! وانت لازم تعمل هالشي

وليد : مستحيييييييييييييييييييييييييل !! انت انت .. انت مش متخيل الموقف !! لا يمكن اعمل هالشي

فادي : الظاهر انك بتحكي شعارات وبس وما بطبقها !! لكان وينو هالشي ياللي مستعد تعمله كرمالها ! ما انت حكيت انك مستعد تعمل اي شي !! وياللي عم اطلبه منك شي بسيط !!

وهنا ينزل وليد المياك عن اذنه ويبدا بالبكاء حسرة والم !! ويلح عليه فادي بالسؤال :

وليد وينك !! وين رحت !! شو قلت !!

وليد : حااضر !! كرمالك يا روند بس راح اعمل هالشي ويا ريت تسامحيني !!

فادي : عااااال العال !!اكيد هي راح تسامحك لما تعرف انك عملت هالشي كرمالها !! بس بدي منك طلب اخير !!

وليد : يعني شو بدي اقلك !! بعد الطلب الاولاني بطلت تفرق!! احكي شو بدك

فادي : بدي منك توعدني انك ما تحكيلها باللي صار بينا !! وخلي هالشي سر بيناتنا !! ويا ريت ما تعود تدخل للماسنجر !! او على الاقل تحذفها من عندك !!وتاكد ان حكيتلها باللي صار بينا راح تدمر العلاقه بينها وبين بيها بالدرجه الاولى وبعدين بيني وبينها واكيد هالشي ما بيرضيك

وليد : اطمن !! بس اتاكد اني بقطع ايدي ولا اني اعملها بلوك او احذفها من عندي !! لكن ما راح ادخل النت كلياته !!

وهنا تنتهي المحادثه بينهما !!

المشهد الخامس / ماذا بعد

جلس السيد فراس وفادي يتنقاشون في الامر

السيد فراس : فكرك بتنجح هالخطه ؟؟

فادي : انا وثقان من النجاح !! بس اتاكد يا عمو انه روند راح يكون وضعها صعب شوي  بالبدايه !! لكن مع الايام بتوعد لطبيعتها !!

السيد فراس : بعرف هالشي !! انا ما بيهون علي زعل بنتي !! لكن ما في اليد حيله !! لازم نكفي هالشي كرمالها !! ما بدي هالمشهد ياللي بدو يصير بكره يصير بعد زمن وتكون المسائل متعقده اكثر من هيك !!

فادي : انا اكيد راح تابع الموضوع مع وليد على الايميل مشان نتفادى اي غلطه

السيد فراس : ليش انت بتتوقع يدخل الايميل ؟؟ ما هو حكى انه ما راح يدخل النت !!

فادي : حتى لو يا عمو !! هو ما راح يدخل ماسنجر بس اكيد راح يدخل الايميل لانه  راح يكون عندو فضول يشوف ردة فعل روند عالشي ياللي بدو يصير !! واكيد طبعا ما راح يرد عليها !! مشان هيك لازم تابعه مشان ما يرد !!

المشهد السادس / حلكة من الظلام في وسط النهار

التقى وليد باصدقائه عميد وعبد الله وكان بحالة ميئوس منها

 عبد الله : شو مالك يا وليد !! شكله حدا باصق في وجهك على ساعة هالصبح !!

وليد : عبد الله .. الله يخليك دشرني بحالي !!

عميد : وليد مالك !! مش طبيعي اليوم

عبد الله : اكيد الانتر خسر مبارح !!

عميد : ما كان في مباريات مبارح !! ابصر شو صايرله

وليد ينظر اليهما بحالة من الحزن ولا يقول شيئا

عميد : صاير اشي بينك وبين روند ؟؟

وليد : لا ما صار اشي !! اصلا مبارح ما دخلت لانه عليها امتحانات !!

عميد : طيب شو اللي صايرلك ؟؟

عبد الله : خلاص بينت !! اتاريه مش متحمل فراق يوم !! من شان هيك زعلان !!

وليد : عبد الله!!  الله يخليك بلا نق وحكي فاضي !! مش جاي على بالي اسمع اي شي !! اقلكم !! بخاطركم انا مروح !! ما بدي انكد عليكم !! سلام

عبد الله : ولك استنى وين رايح !! وليد وليد

عميد : دشره يا عبد الله !! يظهر انه الموضوع بيتعلق بروند !! بكره بروق وبيحكي !! ما تضغط عليه

عبد الله : اااااااااااااااااخ على البنات !! ما في وجع راس الا بسببهن ! ولك شايف !!! هذا هو اللي كان ماخذ زاويه 180 درجه عن البنات وما بدو يقرب ناحيتهم !! شوف شو صرله !!

عميد : يظهر انه اخذ دائره كامله مش زايه ورجع لنفس الطريق !! طريق البنات

المشهد السابع/ صدمه وجراح ما بعدها جراح

دخلت روند للماسنجر وكلها لهفه وشوق للقاء وليد !! وكانت فرحه ومفعمه بالسعاده

روند : هااااااااااااااااااي وليد !! كيفك ؟؟

يستجمع وليد قواه ويقرر ان يخوض المعركه فيتكلم معها بكلام بارد : اهلين

روند : سوووووري كثير كثير لاني نسيت احكيلك اني ما بدي ادخل مبارح !! بس اكيد هديل خبرتك ما ؟؟

وليد : عادي !! سواء دخلتي او ما دخلتي ما راح تفرق !!

روند : شبك يا اجدب !! منك بطبيعتك اليوم

وليد : اسمعي يا بنت الناس ما تحكي اجدب !!احترمي حالك !! اوكي ؟؟

وهنا تدمع عين وليد !!

روند : ماشي !! بلا منها اجدب !!شبك يا دب !! منيح هيك ؟؟

تزيد دموع وليد ويكتب لها بعصبيه مصطنعه : اسمعي وله !! بقلك احترمي حالك بلاش اشرشحك !! اما عالم ما عندها ذوق

تصمت روند قليلا ومن ثم تقول : ههههههههههههههههههههههههههه لك على مين يا وليد !! مو على روند !! عم تحاول تعمل فيي مقلب !! ما حزرت ! يلا اطلع !!اطلع منها والعب غيرها

يضرب وليد على خديه بحسره مع بكاء متواصل : اسمعيني !انتي كلك على بعضك مقلب !! المقلب اللي عامله حالك عارفتيه انتي شربتيه من زمان !! بس هلا بحكي بجد

روند تحتار في امرها وتشعر بان الامر جدي : وليد !! شبك !! اي مقلب !! عنجد انت بتحكي ؟؟

وليد : ان شاء الله مفكره اني بيوم انسجنت او حتى تعلقت فيك !

لا لا لا !! اصحي ! بصراحه انا كنت عم اتسلى !! وقضيت فتره حلوه معك !! فرفشت فيها وضحكت وانبسطت !! بس هلا ملييت !!

روند : وليد بلييز !! انا ما فيني اتحمل !! احكيلي انك بتمزح !!

وليد : شوف هالغباء شوف !! يعني بدك استمر !! حاااضر كيفك يا روند اشتتقتلك !!انا بموت فيكي !! ما بتحمل تبعدي عني !! مليح هيك !! بتكوني مبسوطه ؟؟؟؟؟؟؟؟

روند : وليد !! مشان الله تحكي الصدق !! عنجد بتحكي انت!! يعني ما انحبست ولا كنت بالسجن؟؟

وليد : يوووووووووووووه !! راح اقلك شي !! انا دبرت الموضوع مع الدلع واتفقت معه واللي حكيتي معه على انه اخوي وحيد ما كان وحيد !! كان انا !! وحتى لما اتصلتي كان واحد من صحابي ورتبت مه كل شي !! للاسف انتي طلعتي هدف سهل كثييييييييييييييييييييييييييير وما في اسهل من انه ينضحك عليك

روند : معقول ؟؟؟ كنت عم تلعب بمشاعري ؟؟ عم تضحك علي ؟؟

وليد يزداد حسره وبكاء والم ويتابع : لالالا لا مشاعر ولا شي !!كل ما في الامر اني كنت اتسلى !! والتسليه خلصت !! وهلا يلا طيري !! طيري خلي غيرك يهدي

روند : خساره !! خساره يا وليد !! شوهت اجمل شي بالدنيا !! دمرتني يا وليد دمرتني !! ويكون بعلمك لو تيجي تحكيلي انه هيدا كله مقلب ما راح اسامحك لانه هالشي منو قليل !!

وليد : لا حول ولا قوة الا بالله !! بالفعل الغباء ما اله حدود !! لك هو انا فاضيلك ! حلي عني خليني اشوف حالي !! خلني ادورلي على حد ثاني !!

روند : طيب ليش انا !! ليش انا بالذات تختارني لتعملني لعبه بايدك ؟؟

وليد : والله انتي اللي جيتي براسك لعندي !! وبعدين شي جديد علي !! بنت لبنانيه  اول مره بالنسبه الي " جربت كذا جنسيه وكذا لون !! بس انتي؟؟ اسهل من هيك ما في !! شكرا الك !! ويلا ادحلي !!

وهنا يخاطب وليد نفسه باكيا ويقول : سامحيني !! سامحيني يا اعز الاصدقاء !! سامحيني يا احلا شي بالدنيا صار بحياتي !! اسف يا صديقتي الغاليه

و يغلق وليد الماسنجر ومن ثم يغمى عليه !!

المشهد الثامن / هيستريا الجنون والحزن

بعد ان اغلق وليد الماسنجر اسودت الدنيا في وجه روند واحست انها تعيش في كابوس مريع !! اصابتها الهيستريا والالم !! ولم تتمالك نفسها من الصدمه فاغمي عليها هي الاخرى !!

المشهد التاسع / مواساه

التف كل من السيد فراس وفادي حول روند وقد كانت مستقليه في السرير وتبكي بحسرة وحزن شديدين

فادي : حبيبتي !! سبق وحذرناك من هالشي !! بس ما كنتي تردي علينا !!

روند : بلييز بلييز ما حد يحكي بالموضوع

السيد فراس : لا يا حبيبتي!! لازم نحكي مشان ما توقعي بالحفره هاي مره ثانيه !! يا حبيبتي !!1 الانترنت مفيد وحلو بس التشات والصداقات ياللي فيه وحتى الحب كله وهم !! ما في شي حقيقي !! سهل انه الانسان يضحك على اي واحد فيه !! لانه ما فيه على رقيب !! ما في حد يكذبه !! حتى ما تستبعدي انه يكون هيدا الشخص اسمو منو وليد !! يعني كله على بعضه مزيف !!

روند تبكي وتقول : بس يا بابا انا حكيت مع عيلته !! مع خيتو !! ما كان يضحك علي !1!

فادي : وبتضمني انه ياللي كانت تحكي معك خيتو ؟؟  ممكن تكون شريكته او حبيبته مثلا وحب يشاركها باللعبه هاي !!

روند : سووري يا بابا !! سوري يا فادي !! انا الحق علي اللي ما سمعت كلامكم بالاول !!

فادي : معلش حبيبتي !! المهم بان على حقيقتو على بكير !!

على فكره انا حكيته اليوم وكان غليز كثير ويضحك ولا كانه عامل شي !! عصبت عليه وبهدلته بس لسانه كان وسخ متله وصار يشتم فيي !! فما كان مني الا بصقت عليه وسكرت الماسنجر بوشه

روند : لك يخرب بيت النت وياللي عرفني على النت !! انا شو جابنا للعالم هاد !! ما انا كنت مرتاحه !! وتجهش بالبكاء

السيد فراس : خلاص حبيبتي !! انسي اللي صار !! والله ما بيستاهل زعلك !!

روند : بلييز !! تركوني لحالي !! بليز بابا !! بليز فادي

فادي : اوكي حبيبتي اوكي !! راح نتركك هلا !! وان شاء الله ترتاحي !!

ويخرج الاثنان من غرفتها ! وبدت علامات السعاده ونشوة الانتصار باديه عليهما !!

السيد فراس : مبروك عمو فادي !! الخطه نجحت !!

فادي : لكان عمو !! وهلا خلصنا من هالمهزله هاي !!

السيد فراس : المهم روند تخرج من الحاله هاي بسرعه

فادي : اطمن عمو !! دام انها مقتنعه انها غلطت بانها عرفته وما صدقتنا فاكيد راح تنساه بسرعه !! لا تخاف عليها

المشهد العاشر / وليد يبوح لصديقه بكل شيء

التقى وليد بصديقه عميد " بئر اسراره "

عميد : شو قصتك يا وليد !! صرلك يومين مش على بعضك

وليد : ااااااااااااااااااااه يا عميد اااااااااه !! انا تعبااااااااااااااان !! تعبان كثير كثير !!

عميد : سلامتك !! شو متعبك !!

وليد : والله ما بعرف شو بدي احكيلك !!

عميد : بدون ما تحكي !! روند صح؟؟؟

وليد ينظر لعميد بنظرة حزن !!

عميد : شو صاير بينكم ؟؟

وليد : بايدي هدول !! بايدي هدول ذبحتها يا عميد !! ذبحت اعز انسانه عرفتها بحياتي !! جرحتها !! صدمتها !! قتلتها بايدي !! بايدي يا عميد

عميد : اوف اوف اوف !! شو صاير !! الظاهر انه الموضوع كبير كبير !!

المشهد الحادي عشر / روند تلتقي بهديل بالجامعه

هديل : من صجك الكلام الي تقولينه؟؟؟ كل ذي يطلع جذب ووهم؟؟

روند : لك انا بدي جن !! سنتين وهو عم يضحك علي ! للهدرجه انا رخيصه؟؟ للهدرجه العالم ما عاد فيه صدق !! ما عاد في احساس !! لك والله بتمنى موت اليوم قبل بكره " وترتمي باحضان هديل وتبكي "

هديل : هدي يا روند هدي !! والله سالفتج تزعل وايد!! وماعمري تخيلت انه وليد يطلع من هالنوعية!! يعني كل ما اكلمه كنت احسه صادق بحجيه و ماعمري شكيت ولا لحظة انه يمثل او يخدعك

روند : انا عمري بحياتي ما تخيلت اني كون لعبه بايد واحد !! ليش!! ليش يا ربي ليش!!

هديل : تدرين يا روند!! في شي محيرني في القصة!! و مو محصله له اي جواب

روند : شو هو !! احكي يا هديل

هديل : دام انه كان يمثل عليج ويخدعج !! شلون عطاج الباسوورد مال إيميله؟؟ يعني شلون امنج عليه؟؟؟؟

روند تصمت !! ومن ثم تقول : ما بعرف !! هو شي محير !! بس واحد مثل هاد دام انه قرر يلعب لعبه فاكيد لعبها صح !! ومشان اصدقه واوثق فيه عمل هالحركه !!

هديل :  كل شي جايز بالهزمن! !!

روند بلحظه وكانها كانت بغيبوبه تقول : العمى !! معقووول !! معقول وليد عمل هيك !! لك والله بحس حالي بحلم !! وبتمنى كون عم احلم !! كل ما بتذكر حكياته معي بجن !! بجن يا هديل بجن !! وتعاود البكاء مره اخرى مع مواساه مستمره من هديل

المشهد الثاني عشر /نقاش مستمر بين وليد وعميد

عميد : يااااااااااااااه !! والله وضعك صعب يا وليد !! معقول قدرت تحكي معها هيك ؟

وليد : اااااااااخ يا وليد !! ولك لما كنت احكي معها واشتمها كنت مع كل حرف بكتبه انا او هي بتكتبه كانه مليون خنجر انغرس بصدري !! بس ما بايدي اي شي اعمله !!كرمالها !! كرمالها يا عميد

عميد : طب ما بتخاف انه ابوها وحبيبها يكونوا بيكذبوا وعملوا هذا الاشي مشان يبعدوك عنها !!

وليد : فكرت بهذا الشي !! بس قلت شو في ايدي اعمل ؟؟ اذا بدي احكي لروند كل شي راح اسبب مشكله بينها وبين حبيبها !! وكمان راح تسوء العلاقه مع ابوها !! وانا ما بيهونلي يصير هذا الشي !! وقلت جايز انه يكون حكيهم في منه !! بكلا الحالتين ما كان في ايدي اعمل شي غير اللي عملته

عميد : وهلا شو ناوي تعمل

وليد : شو ناوي اعمل؟؟ انا صار فيي زي اللي بلع المنجل !! لا قادر ابلعه على الاخر ولا قادر اخرجه من ثمي !!

بس اكيد ما راح افوت الماسنجر اطلاقا !! حتى النت كله يمكن اعتزله !!

عميد : ياااااااااااااااااااااااه !! للهدرجه !! معقول تنتهي صداقتك معها بالطريقه هاي؟؟

وليد : ااخ يا عميد !! والله ما عمري حسيت بالالم مثل اليوم !!

عميد : طب هي ما كان الها ردات فعل بعد اللي صار ؟؟

وليد : اكيد كان!! وبعثتلي كم ايميل قطعتني فيهم مليون قطعه !! كل حرف كان مليون عتاب وعتاب فيه !! كل كلمه كانت توخزني بقلبي !!بس شو في ايدي اعمل !! وعدت فادي اني ما احكيلها الحقيقه !! والله وكيلك فادي هلكني ايميلات وهو بيشكر فيي وبياكد علي اني ما احكي لروند الحقيقه !!وقللي انها زعلت كثير بس يومين بتروق

عميد : والله على اللي بعرفه منك ومنها !! ما بظن انها تروق من هون لشهرين

المشهد الثالث عشر / اجتياح للذكريات

بعد مرور اسبوع من الحزن الذي اجتاح وليد وروند كانت روند حزينه مستلقيه على فراشها وسط ضوء خافت في اول الليل !! وكانت تجوب بذاكرتها كل اركان صداقتها السابقه مع وليد !! وفي هذه الاثناء نامت روند !!

وبعد مضي ساعات استيقظت روند فزعه من نومها وقد اشار الوقت الى منتصف الليل !! كانت روند تلهث وكانها كانت تحلم بوليد فتذكرت كلمة قالها وليد لها

============================================================

وليد : طب اسمعيني !! انا لو يعملولي غسيل مخ كمان ما راح تركك !!

روند : يا الللللللللله !! لك شو هيدا !! عيوني دمعت من كلامك !!

وليد : بجد يا روند !! اوعك تفكري بيوم اني راح اتركك طالما عم اتنفس !! وبدي اياك تتاكدي من هالشي وتؤمني فيه ايمان كامل !! واتاكدي اذا حصل يوم وتركتك او قلتلك اني بدي اتركك فتاكدي انه في شي غلط بالموضوع ...  فتاكدي انه في شي غلط بالموضوع ...  فتاكدي انه في شي غلط بالموضوع ...

 فتاكدي انه في شي غلط بالموضوع ...   فتاكدي انه في شي غلط بالموضوع ...

===============================================================

وعادت روند من تلك الذكرى وتلك الكلمات فقالت : معقول؟؟؟ شو بدو يكون صاير يعني ؟؟

هل بالفعل وليد تركني ولا صرله شي واجبره ليعمل هيك ؟؟؟ بس شو هو يا ترى ؟؟

وبعد لحظات من الحيره قالت روند: بهالوقت هاد بالعاده بكون وليد موجود بالنت !! يا ترى راح يكون متصل ولا عملي بلوك وحذفني ؟؟بدي فوت واتاكد

وهنا نتنتهي احداث هذه الحلقه

تابعونا في الحلقه القاده وسنرى ! هل ستكتشف روند السر ام لا !!