اخر حلقتين من براندو الشرق حلوين
اجمالا المسلسل كان فيه ذبذبة بالمستوى .. اوقات يطلع المستوى واوقات ينزل
بلحظات ذكرني بدولار وسايكو لما عم يركد يدور من مكان للتاني على شي معين هههه.. بس هون طبعا اعمق خصوصي اللحظة اللي بيكون بينو وبين براندو الشرق باب واحد.. عنجد المشهد كان عميق ومدروس وحلو
جورج خباز مبدع وأمين درة عنجد مبدع
بس أمل عرفة.. انظلمت بهالمشروع قولكم
إحقاقا للحق تم امل وقت تصوير هالمسلسل كان بوضع سيئ.. هية نفسها انتقدت هالوضع وقال انو عملت فيلر وشالتو وكان شاللها تمها او مبينو مقدم كتير لقدام.. فعليا تمها بمشاهدها ماكان عم يعطي الانطباع الصح.. بس وشها كان مرتاح بمشاهد اكتر من مشاهد تانية
ومع ذلك، الكيميا بينها وبين جورج كانت عالية، مشاهدن كانت قريبة للقلب وحلوة..
المشهد الاخير الها عنجد كان مشهد مميز جدا.. حبيت المشهد كتير
بس برجع بقول.. أمل عرفة؟ هية قالت انو لو انعرض عليها مشهد واحد كضيفة بمشروع لجورج خباز كانت بتوافق، فعليا الدور صغير، وواضح انو شرط شاهد لما عرضو المشروع عليها انو البطلة تكون امل
ولهيك تصدرت امل البوسترات والحملة الاعلامية والاعلانية وبكل مراحل التسويق للمسلسل منشوف جورج وامل سوا
خلونا نتخيل انها فعلا ثنائية وأنهم ند للند.. بس واضح انو جورج لما كتب المسلسل كان بالنسبة الو البطل المطلق، وسلوى متلها متل اي شخصية تانية الها حضور بس مو محوري
طبعا عقل امل كبير، لو حدا غيرها بيشترط يتكبر دورو.. خصوصي انو فعلا كان فيها تستغل انها شاهد طالبينها بالاسم
قريت تصريح لامين درة انو رغبة جمع امل عرفة مع جورج جايي من منصة شاهد
بالنتيجة برأيي امل ما خسرت، المشروع مهم وحلو يكون موجود بأرشيفها.. وعمل ضجة وحضور قيم.. وان شالله يكون فاتحة خير لعودتها لاعمال الها قيمة
