- تعريف بسيط لفقرة (محطات):

هي فقرة سيتم فيها رصد أهم محطات الملتقى الإجتماعي منذ التأسيس

 وحتى العدد 200 ... أربطوا الأحزمة، وهيا بنا ...

بعد تقسيم منتدى المسلسلات العربية، وإنتقالنا إلى منتدى المسلسلات السورية ... فكرنا في فتح فرع جديد للنادي،

 وبعد شد وجذب وتفكير، تم إنشاء وإفتتاح الملتقى الدرامي الإجتماعي، كنسخة مطورة عن النادي الأم،

 وهذا في منتدى المسلسلات السورية فـ كان العدد الأول التأسيسي، الذي إفتتحه مدين، بتاريخ 28/07/2011

في تمام الساعة: 00.34 بتوقيت مكة المكرمة ...

وقد أشرف إدارياً على النادي في مرحلته الأولى: عبودي ومدين، ... لتنطق رحلة الملتقى بعد ذلك ...

.

.

.

خلال العدد الأول بدأنا بالمباركات بإفتتاح الملتقى وتساؤولات حول الملتقى ودوره و ... 

مدين ماعجبه، وطلب موضع ينحكي فيه بدل المباركات، فـ الكل وقتها كان معجوق، وكل واحد بيحكي

 بموضوع شكل، مابين الكلام عن آخر الأفلام العالمية، وبقعة ضوء، وأعمال أيمن رضا وادواره

والحديث عن يوسف رزق وأعماله وعلى رأسها سفر الحجارة، العمل المفضل لدى أعضاء الملتقى:))

العدد الاول شهد إكتساح مدين لأكبر عدد من الردود، وإندهاش الكل من غياب عبودي المفاجئ 

عن العدد التأسيسي، ولعل المانع خير، يقولون :)) ... كذلك امولة غابت عن العدد الأول:)

بالأعداد الاولى بدأ أعضاء النادي الإجتماعي في معظمهم يفدون إلى الملتقى الوريث الشرعي له:) 

كان الحديث يدور بداية حول بقعة ضوء 07 ولوحاته بين مؤيد ومعارض، كما لا يخلو الحديث أبداً

حول الأفلام وهذه المرة كان الحديث حول الأفلام المصرية تحديداً كـ الجزيرة و أولاد العم وغيرها

وهاتك يا آراء وتحليلات ... ماعلينا

بالـ 05 أعداد الاولى، كانت ديمة مراسلة للنادي، بتجيب تواقيت عرض مسلسلات رمضان والقنوات العارضة ...

 شكراً ديمة النشيطة:))

وكان الحديث الغالب: شو قائمتك، وشو راح تتابع و ... حكي من هالنوع

وما ننسى التعقيب على خيارات القنوات، ونقد عدم إعلان مواعيدها و ... 

وفي ملاحظة صغيرة، كان سيف وطارق بيدردشو "في إطار درامي ها:))"

وبيحكوا عن الاجواء الرمضانية والتحضيرات المطبخية والمستلزمات والذي منو ... في إطار درامي بحت :))

 والملاحظ أن الحديث في هذه الأعداد كان لابد من أن تجد فيه مكاناً لـ دليلة والزيبق، الذي كان وقتها

لم يعرض بعد ... فما هو السر؟؟؟ ____ الي بيعرف بيتصل فينا :))

بعد العدد 05، وبما أنو رمضان ما صار باقي عليه غير أيام معدودات

صار الحديث عن إعلانات القنوات للمسلسلات، والواضح أنو إعلانات الزعيم ع الام بي سي

كانت آخذة الحيز الأكبر من الحكي، وكان معظم الاعضاء مبهورين باالإعلانات، وطاير عقلهم على مايشوفوا المسلسل

وكان في تساؤول بينطرح بإستمرار، انو ليش امل عرفة مع أنها بطلة العمل ما بتطلع بالإعلانات الي بتبثها

الام بي سي ... فبين من يقول انو دورها مفاجأة، ومين خايف بعد كل هالشي تطلع ضيفة ع العمل :))

وبالعدد 07 حل رمضان ع المنتدى والملتقى معاً

وبدأ الأعضاء بإستكشاف مواعيد القنوات والحلقات الأولى من الأعمال المنتظرة، وتزبيط القوائم 

و هاتك يا حكي ... :))

02- المحطة الثانية:  دخول شهر رمضان وإنطلاق النقاشات الحامية والسهرات الدرامية (أزهى فترات الملتقى)

حل رمضان إذاً بالعدد السابع للملتقى، ...

الإنطباعات الاولى للأعضاء، الولادة من الخاصرة بيجنن، بداية قوية،...

مرايا بدأ بداية قوية بلوحة الرجل المناسب في الحذاء المناسب، وبدأ يُقال يبدوا ان مرايا قد عاد من بعيد،

 نفس الشيئ لبقعة ضوء الي لاقى إستسحان ...

الزعيم يلفه الغموض بالنسبة للأعضاء، وإسم أمل ع الشارة كان مثار جدل، مابين مبسوط وزعلان

وصار حكي طويل عريض حول ترتيب الأسماء ع الشارة إجمالاً، والي وصل له الأعضاء

انه الأجر ونرجسية بعض الفنانين متل الست سوسو، وامور اخرى هي الي بتتحكم بترتيب الشارة:))

بعد العدد 10 بدأت حركة أكشن تظهر بالنادي، اكشن وسوبنس كبير

طارق في مواجهات حامية، سلاف، أمل، صبا، كاريس، سلافة ههههه وياعين ياليل 

نقاشات حامية من بعد الفطور للسحور ... حول ترتيب الأسماء ع الشارة ونرجسية الفنانين

 وشروط توقيعهم العقد، وإنتقادهم و ... هههه ماعلينا

بعدها صار في هم قومي بالنادي، الولادة من الخاصرة ومشكلة عرضوا ع ميلودي دراما

الصوت بيسبق الصورة، مدري العكس ههه ... وعندما ينتحس الولادة على ميلودي

وأعضاءنا يشتكون ... وعلى سيرة العندما، ربيع أفندي فاجأ الكل بمتابعة 06 مسلسلات دفعة واحدة

بعد ان كان قد قرر سابقاً متابعة عملين أو 03 فقط، ... وكانت عناوين النادي لاتخلوا من العندما الربيعية :)) 

مابين عبود وزياد، والبقية كان في نقاشات ومقارنات بين الولادة، وغزلان رشا في غابة الذئاب:)

والمقارنة بين شخصيات العمل، وأسلوب تقديم العمل، وتم الإتفاق على أنو الغزلان كان له السبق

ان مهد لباقي الاعمال انها تكون بهالجرأة ...

رمضان وصل ع المنتصف، و وصل أعضائنا الكرام للحديث عن الغفران

مابين مرحب، و غاضب، أنو شو هالإبداع والروقان وانو شو هالعمل الممطط

قام اجا أحمد المتغير ولخص العمل في معادلة بسيطة: 

نصيبك في + تدمر+ بطني عم يمغصني+ اشتقت امسك مصاري= الغفران 

بكل بساطة :)) 

وكان لأعضاءنا أراء فنية متباينة، أساساً كانت حول الغفران مابين المعادلة السابقة ومابين

أنو بيغرد مع الولادة في بحر آخر، ...

 الجلسات ما أخذ حيز كبير بالنادي كان ...

خفنا كتير على أعضائنا

خصوصا الثلاثي أمولة وزياد وطارق، اجتهم صدمة كبيرة بالزعيم، انو شو هاد

وما كان العشم فيك هيك، والنادي شهد نقاشات حامية حول دور أمل بالعمل مابين التميز وانو دور صعب

ومابين انو زهزهان هي نمس الزعيم، وانو شو هاد يا صبا، آداء بالحضيض كان ... 

وأين هي قصة العمل يا جماعة :) 

طالع الفضة، ع أساس أنو قلب معادلة أعمال البيئة، بس أعضائنا ولأنو مش كتير منهم متابع العمل كان

فكانوا متحفظين على العمل ... 

الـ مرايا، انقلب عليها الأعضاء بعد لوحة الحذاء، انو فينا نقول مقبولة لكن أبدا مو جيدة

على عكس بقعة ضوء الي نال مساحة كبيرة من النقاش وتبادل الآراء، والثناء عليه ...

الملاحظة الهامة أنو أعضائنا الكرام كانوا بيلتهموا أعداد الملتقى إلتهام، كالنار في الهشيم

يبدو كانو متأثير بالجوع وهنن صايمين، فعوضوا هالشي بأعداد ملتقانا المسكين هههه 

شهد الملتقى برمضان سهرات ممتعة وشيقة مع زياد ومحمد انجل وعزوز وعبود و وفا 

إختلفت فيها المواضيع حول المسلسلات والطقوس الرمضانية ومتابعات شهر رمضان في سنوات سابقة

آآآآآآخ على هديك الأيام شقدها حلوة ومالها سقلة:))

ولأن الشيئ بالشيئ يذكر، أعضائنا كتير مدحوا بآداء أم الزين، شكورة مرتجى

ولكن الحلبيين منهم أجمعوا على انها كانت كارثة من حيث اللهجة وصاروا مايطيقوا يسمعوها

وأمولة كانت تتبرع وتتفنن باللهجة الحلبية على طريقة عمتو أم الزين، لــ أاحمد وعمار خص نص

وأبوس روحكم:)) ____ بصوت أم الزين ___ كيفكم فيا:)) 

امووووولة، وعلى سيرة أمولة، لوحظ في الملتقى نقاشات جانبية بين أمولة وطارق حول عمل كوميدي

جزائري اممممم شو اسمو يمكن جمعي فاميلي03، خيب أمل امولة، وطارق كمان مكان راضي عنو

بس من القلة مافي علة، والملاحظة المهمة انو امولة ظلت طول رمضان بتعاني من صداع وراسها ضرها:))

سلامتك أململ :))

يمكن هاي دعوات ام الزين:)) 

وساااااام، ودون سابق إنذار كان بيدخل وقلبو تعبان ياحرام:)، من ميريام عطا الله وسوزان سكاف وزميلاتها 

في يوميات أيمن زيدان02، قلبو التعى منهم، وقال اذا هنن نجمات المستقبل فيا دراما الله يرحمك

وكتير مبسوط أنو شكران اعتذرت عن العمل ...

كشف الأقنعة نال صدى منيح عنا بالنادي خصوصا حلقات سلوم وكاريس وأمل، ...

وبقعة ضوء والولادة، سيدا الحديث على الدوام ... وقرب العيد، وطلت عمتوا ملاااااااااك

ووجهت تحية لأعضاء الملتقى :))

وشهد العدد 53 عجقة كبيرة بالنادي وإحتفال أعضاءه بزيارة مفاجئة وسريعة لموني وعبود

وكان الحديث حول الأعمال الي متابيعنها ولوين موقفين وسوق الورق ومكسيم و ... :))

عزوز، كان مرابط بالملتقى 24/24، وهالشي كان مخلي الملتقى شعلة نشاط ... بس للأسف

عزوز كان زعلان، ليش؟؟؟

لأانو مسافر أسبوعين ... والأعضاء قال راح يفتقدوه بالعيد خصوصاً أنو بالعيد

مافي فوتات كتير للمنتدى عموماً ...

وأجا العيد واااااااااااو يا فرحتنا

وحل على ملتقانا بالعدد 56

ولكم ان تحكموا بشهر واحد قفزنا من العدد 07 للعدد 56

وعلى رأي المتغير: الأعداد بالملتقى صارت شوربة :))) 

وصار الحديث عن نهاية المسلسلات، الغفران كان المتصدر الأكبر بالنهاية الي طار عقل أعضائنا فيها

أما الجلسات فربما كان هو الخاسر الأكبر بنهايته الخرندعية على قولة سيفو،

أما الولادة فكانت النهاية مابين مؤيد ومعارض، وعلى رأس المعارضين أمولة خانوم:))

كما أن عبودي كان داخل خارج، بيطلب من الأعضاء يحطوا إختياراتهم لأفضل الممثلين والأعمال والمؤلفين والمخرجين 

مشان إستفتاءات المنتدى، الي بتنعمل بعد كل رمضان ... وجننوه لعبودي:))

وتم رصد ملاحظة مهمة، هي أن المتغير احمد كان خايف كتير انو يبقى لحالو بالمتلقى مع ربيع، ليش يا حزركم؟

لانو ربيع بيبلش "يستغفرن" 

وحلوها إذا بتحلوها هههههههههههههه

منذ العيد، بدأت ظاهرة جديدة، او بالأاحرى محور جديد يخيم على نقاشات واحدايث الملتقى وسهراته

عندما يبدأ عرض تعب مشوار ربيع، على أبو ظبي الأولى

وهاتك يا مجاكرات بين ربوعة أفندي وأعضاء ملتقانا ... 

ربيع يجزم: عندما يكون تعب المشوار قنبلة الأعمال الإجتماعية 

والأعضاء يشككون ... 

وصار ربوعة يعد الأيام لبدأ عرض التعب ... 

وباقي 03 أيام، يومين، يوم 

وبلش تعب ربيع ... :))

وقبل لايبلش تعبو لربوعة، طل علينا محمد الراوي بالعدد59، على حين غرة:)

بدو عمل يوازي مستوى لوست، لانو راح يخلص لوست عن قريب وبدو شي بديل، حاكم انو صار مدمن لوست

وطبعاً الحكي راح يصير كلوا عن لوست ... 

طبعاً ومع إنتشار أخبار عن نية لإنتاج جزء02 من الولادة من الخاصرة، بدأت النقاشات الحامية

والصدمة هي المشهد الغالب على أعضائنا، انو كيف بدهم يعملوا ج02 لهالعمل الناجح، ولماذا إستغلال النجاح 

وياخوفنا تتكرر مأساة باب الحارة وهكذا ... 

 وبدأ عرض التعب، وكانت التعليقات الاولية حول إختيارات الممثلين، والترحيب بإختيار سيف سبيعي لباسم ياخور

وطبعا أعضائنا متاكدين مما لايدع مجالا للشك انو جيني مفروضة على سيفو، ومو طايقين كيف انو سيف راح يمثل بهالعمل ... 

وبعد مرور 04 حلقات،  تأكد رأي معظم أعضائنا أنو التعب ماهو الا نسخة قوشقجية محدثة،

الجديد فيها فقط أسامي الشخصيات والباقي "نسخ لصق" عن أعماله السابقة، ...

 بس ربوعة مو موافق منوب، وزعلان من أعداء النجاح

وتقبروا ديمة قندلفت وتطلع على ...

(مابكملها أحسن هههه)

ربوعة، ولانو مهووس دراما سورية، كان طاير عقلو بالسراب، وحكى لزياد انو في مشهد رائع بيطلع بالحلقة 29 

زياد قالو انو العمل خارط مشطو كتير، وانو هو حمسو لمتابعة ماتبقى له من حلقات، وهالشي أثار إستغراب مدين :))

ربوعة، كان مقرر يتابع الجلسات، وفعلاً فعلها،

وصار الكل بالنادي خصوصا سيف، بيتابعوا الآراء الربوعية بالعمل أول بأول

ولنشوف ... 

ملاحظة هامة كانت مسجلة بالملتقى، وهي إنتشار ظاهرة الدعوات، والمسبات على طريقة فريال بباب الحارة

وعلى رأي عبودي: هاي آخرت الي بيلحق باب الحارة وفريال خانوم:)))) 

وقبل ما نوصل للعدد 67، الي شكل النقلة الاولى للملتقى، ... شهد الملتقى غزو عضويات بديلة،

وخنايق وحركشات، ...

 فأصدر المتغير أحمد قرار بانو صاحب أي عضوية بديلة يعرف عن حالو ويلي جديد يعرف عن حالو

مشان ما نغلط بحق حدا...  هذا كان قرار المتغير بإمتياز:))

ولم يكد عدد يخلو من الحديث عن الولادة من الخاصرة، مابين الحديث عن مبالغة موجودة بالعمل،

 وترتيب الشارة والآداء المميز لمعظم المشاركين فيه، وجراة الموضوع، ونكدية العمل وسوداويته،

وتألق العمل، نهايته كذلك، ...

 كذلك كان للحديث عن دور سلاف بالعمل حيز كبير من النقاش، جر إلى الحديث عن معظم أعمالها

وهل الموهبة ام الجمال هو الي وصلها و ... 

03- المحطة الثالثة: تشكيل مجلس إدارة وإطلاق جلسات درامية للملتقى

العدد 67، محطة مهمة للنادي

ففي يوم 12/09/2011، يفتتح مدين العدد رقم67، من الملتقى، ويلعن مجموعة من القرارات الهامة: 

- الملتقى يبقى تحت إشراف عبودي ومدين، ولكن سيقوده فريق إداري للملتقى، مكون من:

زياد، أمال، سيف، محمد أنجل ... وبعد حوالي عددين أو 03

ينظم طارق إلى الطاقم الإداري للنادي

- أيضاً، أعلن مدين عن قرب إنطلاق: الجلسات الدرامية للملتقى للبحث بقضايا الدراما السورية ...

ويبدأ الملتقى مع هذا العدد، محطة جديدة وهامة في تاريخه 

ردود الأعضاء كانت مابين مستغرب من موضوع الجلسات، وعدم فهم له، ومابين مشكك في مدى نجاعة ونجاح الجلسات

أو حكم مسبق بالفشل ... وقلة موؤيدة

مدين و زياد، كانا الأكثر حماساً لفكرة الجلسات الدرامية، وراهنا عليها ... 

بعد العدد67، جاء العدد 68، ولم تنطلق الجلسات بعد، هذا العدد شهد نقاش ساخن بين احمد سيف الأندلس

ومدين، وموضوع النقاش ... سامر المصري، لماذا ينجح في الأدوار الثانوية ويفشل في ادوار البطولة المطلقة ؟؟؟ (يقول مدين)

فيرد أحمد ضارباً الامثلة ومفنداً ما سبق ... 

وطبعاً فجأة بتدخل ميمي، مثل ما تطلع فجأة ... وبتلوم محمد الراوي على أحد الأفلام الي نصحها بيها

لأنو مليان شتائم، ولو انو الشتائم صايرة جزء من ثقافتنا ... تقول ميمي:))

هالعدد (68) كان عدد تاريخي بخصوص إستذكار أعضاء الملتقى والنادي سابقاً والي كانوا قد تركوا المنتدى

والملتقى لسبب أو لآخر كـ: عبود، المتغير، موني، إبراهيم، محمد انجل ...إلخ

وهالعدد شهد تفجيرات كبيرة، اهما تفجير ذكريات طارق، لما حكى مع كنزة وأمال عن الأعمال الجزائرية القديمة

فعلى قولتوا فجرتم ذكرياتي:))

وفي طريقه كمان عزوز تفجر الحنين عنده، لأيام النقاش الحامي وتغطية ملوك الطوائف بالنادي التاريخي :))

المهم مع إفتتاح العدد69، إنطلقت اولى جلسات الملتقى الدرامية

وشهد العدد الي إفتتحته أمال ... اول نيو لووك للنادي

(اول تصميم يلبسه النادي، لأانه قبل ماكان فيه أي تصميم) 

كانت البداية جدية كتير، والفكرة ماكانت واضحة للأعضاء، فصار الدخول للنادي شوي قليل

لانو الكل فهم انو لازم يكون النقاش والحكي حصراً حول القضية، وكانت القضية الأولى قضية لعنة الـ 30 حلقة

(ما راح أحكي عن الجلسات ومضمونها لأنو لها فقرة خاصة بها) 

المهم:

مرت أعداد الملتقى مابين حوالي 05 قضايا، كانت القضية بتمر عبر أكثر من عدد

مثل ما قلنا ... البداية كانت جدية، فكان تقريباً معظم النقاش حول القضية، وشوي شوي

صار النقاش موسع يعني  نقاشات عادية ومختلفة بين الأعضاء، مع إثراء لقضية العدد

وحدث أن إنزعج زياد في إحدى المرات من ربيع، لانو ربوعة ماعم يقدر الجهود المبذولة

 في إحياء النقاش وإقامة الجلسات ... وربوعة موعاجبتو الفكرة من الأساس

ومصر أنو تعب المشوار عمل جيد، رغم الإعترافات المختلفة، انو عمل (لـ ....) :))

خلال هالفترة وبأحد الأعداد، دخلت ديمة وحطت رد وطلعت ... واتفجر النادي ... 

سيارات الإسعاف، وضجة كبيرة

شو صاير ؟؟؟

نقاش حامي حامي حامي (على قد مابتتصور)

بين مين؟

طارق v زياد 

وتدخلت عدة أطراف لإعادة المياه لمجاريها

(لما الواحد بيراجع شو صار بيضحك على حالو، انو مو مستاهل الموضوع كل هالتعصيب:))

بس يلا عملنالنا شوية أكشن بالنادي ههههههه 

وعادت الحياة السعيدة للنادي، ورجعت المياة لمجاريها بين طروقة و زيااادو :))

 .

 .

.

إلى جانب جلسات الملتقى، شهدت هالفترة ظاهرة خطيرة بالنادي

"ظاهرة السلق"

هالظاهرة تنسب لمؤسسها السيد ربيع أفندي

ربيع بوقتها كان سالق معظم أعمال الدراما السورية لموسم 2011، وكان بيشجع الأعضاء على هالظاهرة

وعيني عينك :))

طارق كان سالق جلسات نسائية وعم بيسلق الولادة، واحمد سيف الأندلس كان بيسلق طالع الفضة ومحلق معو،

وربيع كان على مشارف نهاية سلق الدبور 02 ، وصار عم يشجع هيا أنو تتعلم السلق ... 

ونصار انتقد ربوعة علناً، قال له: روح اسلقلك الزير سالم واحد من بين 05 روائع بالدراما السورية

بدال مانك قاعد عم تشوف الدبور:))

ربوعة رد: انه مابيحبو للتاريخي

لكن:

تشارط مع طارق انه ربيع يشوف الزير اذا طارق شاف قاع المدينة

مابعرف اذا نفذوا التشارط ولا لسا بعد

الي عندو خبر: يتصل فينا:)))

بهالفترة، ربيع صار مصر أكتر من أي وقت انو التعب عمل ناجح وجيد

قام اجا عبودي وأعن قراره الحازم:  انه راح يتصدي للمدافعين عن العمل لوش شو ماصار

واستدرج ربيع، حتى اعترف ربيعو بسر خطير

وانو معجب بــ 95/100 من نجوم الدراما السورية:)) 

عبودي قال انو الي لازال معجب وطاير بالتعب بيكون يا إما مجنون أو متخلف

ربيع استغرب، شو هالجرأة يا عبودي؟؟؟

فعبودي رد ببساطة، مين عرف الداء، سهل عليه صنع الدواء

أنو لازم أصدمك لحتى تفيق من غفلتك:)) 

رد عليه ربيع: صدمة شو يا بعدي

عبودي فكر وفكر وفكر، وقال: صدمة نقدية، صدمة سيارة، المهم تفيق :))

ولكن مع مين؟ 

ربيع قال انه ما بيتأثر بالصدمات

فـ طلع انو دواء عبودي ما جاب نتيجة تذكر:)

خيرها بغيرها عبودي باشا:)) 

وخلال هالفترة من عمر الملتقى، كانت عناوين النادي، يا إما معنونة بـ العندما، يا إما فيها شي

ألو علاقة بعاج او تعب المشوار ولما تلاقي عنوان بهالمواصفات، معناه أنو ربوعي بإمتياز ...

ربيع كان بطل حلقات وأعداد الملتقى بهالفترة، لأانو كان عطلة، وكان شغال مع السلق

وهالعناوين أثارت حفيظة كثار من أعضاء النادي، وعبروا صراحة عن غضبهم الممزوج بردود مهضومة

و ربيع ولا على بالوا، محلق مع موسيقى الغفران وسلق المسلسلات

الدراما السورية آه يا نيالي:)) (يقول ربيع)

ربيع كانت الردود عندو جاهزة، للكل:

دعاوي فريال: (ياشرنة ويا شاضومة ويا سنكوحة ويا شرشوحة و يا ...)

و كذلك إبتكر ظاهرة جديدة وهي الرد بمشهد من عمل ما،

على سبيل المثال، رد على عبودي بأحد المرات: 

(أنت مابتنسى، مابتسنى، لك مابتنسى ... "مشهد من الغفران")

:))

زياد، كان في كثير من المرات، لما بيشوف أعداد الملتقى مالت شوي للدردشة، والاعضاء نسيو خلاص

انو في موضوع للنقاش، بيحاول يرجعهم لجو الجلسات والنقاش بأسلوب ظريف وحباب، وخلال أحد الأعداد

الي كان النقاش فيه عن الأعمال الخاصة بذوي الإحتياجات الخاصة، حط عنوان الملتقى من مسلسل وراء الشمس

من وحي المناسبة، فقام ربيع دخل ع الملتقى وهو مفكر حالو غلطان بالعنوان، انو معقول الأعضاء بالملتقى على حين غفلة

حبوا وراء الشمس بعد ما ربيع كرهم فيه بحملتوا العاجية أيام النادي الام بمنتدى المسلسلات العربية،

بعدين فهم المغزى من وضع العنوان ... وصرح للصحافة:

انو الحالة هو خايف من عودة  الشمسية له ...

زياد خلال بعض الأعداد الموالية، طرح مسابقة "صعبة شوي"، انو تصميم الملتقى كان في وجوه

 لمؤلفين ومخرجين سوريين ... فهو طلب تحديد اسماء "يمكن" أربعة ممثلين موجودين بالصورة،

الكل قال امل عرفة وعباس النوري بحكم وجودهم لكن مين التانيين،؟؟؟

 "خصوصا انو سؤال زياد كان فيه تفاصيل أكثر"

وحلوها اذا بتحلوها ...

كم عدد والكل بيحاول

وفي الأخير الي حل اللغز هو ...

(ولا قلكم، راح خليها مفتوحة النهاية، حاكم اعضاءنا مابيحبو النهايات التقليدية:))