ظهر عادل : متابعكم بصمت ومأيدكم بأفكاركم .. بس لما توصل لحاتم أحسنلكم وزنو كلامكم
قلتلو : عادل يا عادل .. انت غالي عليي وماعم جامل
وعبالي شي رقابة ناخدها سوا .. بعد ما نفش خلقنا بشي حديث متل الدوا
وياسلام اذا بيكون عصي الدمع عبدالله .. ساعتها الفرحة الكبيرة ومنشكر الله
أحمد سيف الأندلس : اي بس التجسيد رح يعطي العمل قيمة أكبر .. وهذا ما أتمناه لحتى استمتع بالعمل أكتر وأكتر
قلتلو : من جهتي بحبذ ما يصير تجسيد .. خلينا ننبسط بالعمل لبينما يجي العيد
وفجأة ظهر عزوز : ههههههه ذكرتوني بمرايا ياسر العظمة انتو التنين .. أتاري المنتدى معبى مبدعين
قلتلو : لك ميت اهلين بعزوز نورت .. اتفضل شاركنا لأنك من البداية أبدعت
عزوز : من جهتي هاد اكتر نوع كنت حبو بـمرايا .. بس ماعاد يفرق معي طالما طلع عنا بالمنتدى هالمواهب وهالـمزايا
قلتلو : شكلو عبودي انسحب .. أمر متوقع بس مو بهيك سرعة يا للعجب!
دخلت امال : بصراحة فاجأتوني .. ومن جد أبهرتوني
انا ماعندي مواهبكم .. فأحسنلي ارجع نام وما نافسكم
قلتلها : دايما يا امال ظالمة حالك .. وانتي بيطلع معك أحلى شي عالحارك
كلامك كلو قافية .. الله يعطيكي ألف عافية
دخلت روز : صحيح دايما امال تظلم نفسها .. على قولتها تضرب بكسمها
وطلت ديما : شو القاعدة هون انو نحكي عالقافية؟ ولا بيصير نحكي بدون ضوابط راسية؟
قلتلن: الموسوعة الدرامية الأولى حضرت عالمراقبة .. ناطرين كنزة تطل بركي منعمل مسابقة
عبدالله فؤاد : لا أحد ينافس ديما بهالنوع من المسابقات .. خصوصي اذا تعلق السؤال بأمل بالـذات
نصار : اسقالله بنادي أمل كنا نقضي ساعات .. ونحنا عم نلعب ونعمل مسابقات
حمزة : ماحكيتو عن أيام الدراسة .. بكرا بتشوفو شلون رح ينجح عالشاشة
طارق : قرأت نقاشكم بخصوص الأعمال .. وتوقعاتي قريبة وعلى نفس المنوال
خصوصا فيما يتعلق بالتجسيد في مسلسل عمر .. مع اني متفائل من خلال البرومو والصور
ورجع عبودي : الحكي اللي انقال عني بااااااااااااطل .. لأن الانسحاب أصلا أمر عاطل
ومو انا اللي بنسحب يا حلوين .. بس انشغلت شوي بنادي المشاهدين
قلتلو : وبتعملي حالك مو متأثر بباب الحارة؟ .. وانت على طريقة ابو شهاب بتحكي يمكن حتى مع الجارة
قلي : معتبر الجزء التاني احسن من الاول والك عين تحكي .. لو مطرحك بخبي وشي وبستح
طيب حارة الطنابر .. مابيذكركم الاسم بشي ولو حتى بشكل عابر؟
قلتلو : كالعادة بتغير الموضوع .. بس انت اصلا القلم عنك مرفوع
وكلمة طنبر ما بتطلع غير من أحمد اللي غايب .. فأحلى سلام وتحية لالو ومن الشوق انا دايب
وكمان عسيرة الغايبين .. ايمتى يرجع المنتدى ينور بوجود الغالي مدين
ابراهيم : لستُ ممن يهوى المديح والتطبيلْ .. إلا أن ماجادت به قرائحكم مالهُ مثيلْ
فقد قرأت نقاشا ًهنا ما أجملهْ .. بينكم يا أصحاب المسألهْ
ولم أكن أنوي إلا المواصلة مستمتعَا .. بمتابعة ردودكم تباعا ًتباعَا
إلا أن تحولكم من الحديث عن الفاروقْ .. إلى جنبات ترهات مسلسلات قاووقْ
أجبرني على الدخول للقول بصوت عالْ .. كيف هكذا ببساطة استسغتم الانتقالْ ؟!
لقد بدأتم الحديث عن أسماء مهيبهْ .. فلا تختموه بحديثكم عن أسماء سقيمهْ
قلتلو : يا سلام يا ابراهيم .. افحمتنا بهالكلام الكريم
بعد كلامك مافي كلام .. رح اضطر هالمرة قول سلام
عبودي : وانا داق خلقي من هالقصة .. وصارت عاملتلي غصة
وهيك متل ما شفتو .. وبتمنى من اللي قريتوه تكونو فرحتو
اجتمعت انا وعبودي وقعدنا نخترع اشعار .. بخصوص شي صار وشي ما صار
ونتذكر أعضاء حلوين غايبين .. ونحنا الهم كتييير مشتاقين
وطلو بقية الأعضاء بمشاركات لذيذة .. مو غريبة عن ناس متلن بقلوب طيبة عفيفة
واللي مشاركاتن كلها من عندي افتراضية .. الا مشاركة ابراهيم تعتبر استثنائية
لأنو لما توصل القصة للغة العربية .. مابيعود في مجال للعب والمحاولات العادية
كانت فرصة بهالحديث كمان ينحكى عن المسلسلات الجاية .. شي نمدحو وشي نكسر مقاديفو وهي هية كل الحكاية
وليكون الفقرة ختامها مسك وريحتها عنبر .. بهالساعة اللي املنا تكون ترويج عن النفس وبسط وسكر
بظل احداث صعبة ومريرة ودمـوية .. تحية كبيرة لكل شهداء سـورية
