عمر " في سره " العمى , أزا مامون ورى هل القصه معناها في شي مو مزبوط , اي مو مزبوط بنوب !
المشهد الـخـــامــس \ عبدو خارج الحارة مذلـــول !
مشي عبدو بالحاره وهو حزين ومطأطيء الراس ويسمع كلمات اهل الحاره \ خرجك / الله لا يقيمك / اخص على الرجال / يا حيف على الرجال / كل هاد يطلع منك يا عبدو؟
فيقترب عبدو من ابو حاتم ويقول : عمي ابو حاتم .. والله مو انا اللي سرقت قسما بالله العظيم اني بريء
ابو حاتم يضع يده على اكتاف عبدوويقول له : يا ابني .. والله مصدقك وبعرف انك مستحيل تعملها بنوب / بس شو طالع في ايدي اعمل / التهمه ثابته عليك وما فيني اعمل شي
يمسح عبدو دموعه ويقول له / يعني مصدقني عمي ؟
ابو حاتم : معلوم بس ما فيني اعمل شي .. يعني شو بدي اعمل انا قدام كل الحاره !!!! بس الا ما يجي اليوم ويظهر كل شي
ويتابع عبدو سيره في حالة حزن شديد
وكل هذا حدث امام عمر " فيقترب عمر من عبدو ويقول له :
عبدو ، تعا معي للمحل " فينظر اليه عبدو نظرة المكسور ويمشي معه
عمر : عبدو . بتعرف؟؟ والله اني حاسس .. لا مو حاسس .. انا متاكد .. انك انه مالك بهالقصه بنوب واكيد في حدا وراه قاصد يورطك فيها لسبب ما بيعرفه الا انت .
عبدو : يعني انت مصدقني عمر ؟؟
عمر : اي معلوم مصدقك لكان ..
عبدو : روح الله يجبر بخاطرك مثل ما جبرت بخاطري
عمر : بدي اسالك .. الك شي مشاكل مع حد .. متخانق مع حدا شي؟؟
عبدو : لا والله ، انا بالاصل عمري ما زعلت حدا
عمر : بتشك في حد معين يكون ورطك هالورطه ؟؟؟
عبدو : لا ما بشك ، بس انا ياللي قاهرني ومطير عقلاتي انه مين اللي حط الاغراض هي بيت اهلي؟؟ مييين ؟؟
عمر : ليش ما تسال اهلك بهالخصوص
عبدو : الزعيم منعني اروح لبيت اهلي .. حتى منعني ودعهم .. بحجة انه في مسروقات ثانيه لسه ما ظهرت وقال بيخافوا اني هربها شي مطرح او وصيهم عليها ..
عمر : العمى حتى هاي منعوك منها .. منعوك تودع اهليتك؟؟ويقول عمر في سره " لك شو القصه؟؟ اكيد مامون بيك وراء هالشي ومنعه من شوفت اهله لانه براسه موال لا وكمان ما بده اياه يضل في الحاره .. معناها مامون بيك بيخطط لشي كبير "
عبدو : شبك سكتت اخي عمر .
عمر : لا ما في شي بس عم فكر احطلك شوية اكل وتاخذهم معك .. ما بتعرف شو بيصير معك ..
عبدو : يبكي ويقول .. والله ما بعرف شو بدي قلك / انا مزبوط الي اخوه كثار بس عنجد بحسك اخي
عمر : وكل الله عبدو .. وكل الله
وهنا يمر مامون بيك ويقول : شووووووووو شايفك بعدك هون شو بتعمل عندك , شو يا معلم عمر شو بيعمل عبدو عندك
عمر : لا ما في شي زعيم بس عبدو بدو شوية اكل لياخذهم معه بالطريق
مامون بيك : ايوااااا .. اسمع يا عبدو .. الشمس قربت لتغرب / ساعة زمن وبتحمل حالك وما بدي شوفك هون بنوب .. فهماااااان ؟؟
عبدو : بصوت منخفض .. مشي .. مشي يا زعيم
ويتابع عبدو كلامه مع عمر : طب انا بدي اخرج من الحاره بس وين بدي رووووووووح
عمر : بتدبر بتدبر اخي عبدو .. الا ما تلاقي شي دوباره .. ويقول عمر في سره " والله باينته مسكين هالعبدو هاد / اصبح لازم استنظره برات الحاره واخذه لبيتي .. خطي ما اله حدا // واكيد عمي ابو عصام ما راح يزعل من هالشي
المشهد الــسـادس\ مأمـون و آبـو ساطـور !
مامون بيك : شو يا ابو ساطور .. جهزت حالك؟؟ ترى ما عاد في وقت شوي وعبدو بيطلع برات الحاره
ابو ساطور : معلوم يا بيك .. وجبت معي اثنين ابضايات وبيعجبوك " ابو حديد ورجال ثاني مستعد يخدم "
مامون بيك : بري عليك ابو ساطور وطبعا ما جبتلهم سيرتي ما ؟؟
ابو ساطور : لكان هو انا مجنون لاحطك بالنص . انت مالك دخل " ابو حديد متحمس ليخلص على عبدو لانه كمشو والرجال الثاني بدو خدمه بس
مامون بيك : حلو كثير .. لكان هلا بتحمل درب طريقك وبتنتظروه برات الحاره ... وبس يبعد عن الحاره ويكون لوحده بتسناولوه . وحسك عينك حد يشتلا عليكم او تغلطوا شي غلطه
ابو ساطور : اطمن زعيم .. حط ايديك ورجليك بمي بارده .. وعلى بكرة الصبح بجبلك خبره
المشهد الــسـابــع \ عضــوات الحـــارة !
ابو بشير : حد كان يصدق انه عبدو يعمل هيك ؟؟
ابو جاسم : اااااااااااااااخ والله عقلاي حيطيرو مني .. ما كان هيك صرله من هو صغير عندي بالحمام ما شفت منه شي .. لك كنت مامنو على الحمام وعمره ما مد ايده على الغله ..
ابو حاتـم : ومو بس الحمام / وكمان البوايكيه ... يعني من هالشي انا مو مصدق عبدو يعملها .. يعني كل هالعمر معقول يطلع حرامي ؟؟ .. لا لا لا ما دخلت راسي هالقصه
ابو بشير : لك ابو جاسم؟؟ لا يكون عمل هالشي لانه جوازتو اتاخرت كثييير ؟
ابو جاسم : لك والله عرضت عليه اجوزه بس ما عاد يقبل .. شو اعمله/ اغصبه يعني ؟؟
ابو حاتـم : الله يجيرنا " من وقت ما مامون بيك ظهر الحاره مقلوبه فوقاني تحتاني
المشهد الثـــامــن \ عبدو خارج الحــارة !
خرج عبدو من حارة الضبع حزينا ذليلا لا يعرف اين يتجه ..وفي الطريق خرج عليه ابو ساطور وابو حديد ومعهم رجل اخر وكانوا " متلتمين"
عبدو : مين انتوا؟؟ وشو بدكم مني ؟؟
ابو ساطور : ما بدنا منك شي / بدنا روحك
ولم يكن عبدو يحمل معه اي شيء سوى الطعام الذي اعطاه اياه عمر / وكان عمر قريب منه في هذه اللحظه فغطى وجهه وخرج عليهم
وقبل ظهور عمر سحب الرجال الثلاثه سلاحهم وقبل ان يظفروا بعبدوا ظهر عمر
ابو ساطور : مين انت // ؟؟
عمر : اللي بدو يقرب ناح عبدو بدو يكون اخر ليله بحياتو
ابو حديد : ارجاع لحضن امك احسن ما تسبقه
عمر : الزلمي منكم يقرب
عبدو : حائر ولا يعرف ما يجري ولا يعرف هؤلاء الثلاثه حتى لا يعرف من يسانده , وبدا العراك ولم يكن من عبدو الا ان حمل عصى وبدا يقاتل مع عمر ...
اسفرت المناوشه عن كشف وجه ابو حديد فقال عبدو : هذا انت يا واطي ! , وكذلك جرح ابو ساطور في يده ففر ثلاثتهم هاربين
عبدو : لك يسلم البطن اللي حملك يا ابضاي / مين انت ؟
فيكشف عمر عن وجهه
عبدو : هادا انت ؟؟؟ ويحضنه ويقبله من راسه // لك لولاك كان ما بعرف شو بدو يصير فيني , بس انت شو اللي جابك لهون وكيف عرفت بالقصه
عمر : يعني فيك تقول صدفه / وقلت لحالي هالمسكين عبدو وين بدو يروح / فقلت بجي ببات عندي كم ليله لحد ما تفرج عليه وكنت عم استنظرك بالطريق / ومن محبة الله فيك اني كنت قريب منك
عبدو : لك روح الله يخليك / والله انك اصيل وشهم وابضاي " ما في كلام"
عمر : اي هلا امشي تيسر معي على بيتي لانه الجماعه ما راح يتركوك بحالك
عبدو : فوق كل هذا وبدك تضيفني عندك ؟؟ يعني والله بخاف يكون فيها ازعاج ولا شي
عمر : اي لا اطمن : اي اصلا ما في حدا بالبيت غير ابي و...
عبدو : ومين ؟؟
عمر : وانا كمان" ويضحك "
المشهد التــاســع \ ابو حاتم بـ البيـت !
ام حاتم : شبك ابو حاتم لهلا صاحي / فيك شي
ابو حاتم : ايييه يا ام حاتم / بالي مشغول على عبدو !!! المسكين وين بدو يروح بنصاص الليالي ؟؟
ام حاتم : خرجه يا ابو حاتم / لكان هاي عمله بيعملها ؟؟
ابو حاتم : لا يا ام حاتم عبدو ما بيعملها / هذا ملعوب التعب عليه / والا ما يبان الفاعل والمجرم الحقيقي
وفي هذه اللحظات يطرق الباب
ابو حاتم : مين بدو يجينا بهالوقت ؟؟ لاقوم افتح واشوف مين ويفتح ابو حاتم الباب
ابو حاتم : اهليين مين انت ؟؟ ويكشف الرجل عن راسه
ابو حاتم : معقووول // ابو النور ولا انا غلطان؟؟
ابو النور : اي ابو النور اخي ابو حاتم
ابو حاتم : تفضل تفضل حلت البركه علينا .. يا اهلا وسهلا
ابو النور : يالله يالله
ابو حاتم : شرف شرف سيدي
المشهد الــعاشــر \ ابـو عصــام !
الاب العجوز : لك شبك يا رجال / ليش عم تحوس والله وغوشتني
ابو عصام : لك يا عمي لهلأ عمر ما رجع / ماله بالعاده يتاخر
الاب العجوز : اي لا تخاف !! مو اول مره بيتاخر هلا ما بتلاقيه الا اجى
ابو عصام : شو ما اخاف / بخاف يكون صايرله شي بالطريق
الاب العجوز : لا تحاف عليه / عمر ابضاي وبيعجبك وما بينخاف عليه
ابو عصام : مهما يكن يا عمي .. الموضوع وما فيه ... وهنا يدخل عمر
ابو عصام : لك وينك يا رجال شغلتنا عليك ؟
عمر : لا ما في شي بس مشكله صغيره صادفتني بالطريق
ابو عصام : وان شاء ما صابك شي ؟؟
عمر : لا ناكته .. ابي معي ضيف بدو يبات عندي كم ليله
ابو عصام : ومنو هذا الضيف .
عمر : عبدو !!
ابو عصام : عبدو مين؟؟
عمر : اجير الحمام عند ابو جاسم
ابو عصام : عبدوووووووو ؟؟؟ معقوول؟؟؟ وشو جابه معك
عمر : هاي قصه طويله بحكيلك اياها بعدين / وهلا خليني فوت الرجال حرام صرله مده بيستنى على الباب
ابو عصام : اي فوته فوته عمي .. وانا بفوت اتخبى في الاوضه جوا
المشهد الـحادي عشــر \ ابو حاتـــم ابو النــور !
ابو حاتم : ابو شهااااااااااااااااب ؟؟
ابو النور : اي ابو شهاب
ابو حاتم : بالله بتحكي جد // الله يبشرك على هالخبريه ويفرحك مثل ما فرحتني , وكيفو هلا؟؟
ابو النور : اصابته كانت صعبه .. بس الحمد لله هلا خف كثير يعني كم اسبوع وبيعود يمشي ويتحرك مثل اول واحسن
ابو حاتم : وهلا هو عندك بحلب ؟؟
البو النور : اي هلأ بالحفظ والصون مع اخونا ابو طوني
ابو حاتم : والله احلا خبريه بسمعها من يوم ما طلع من الحاره , بس ما قلتلي / ما قلك ايمت بدو يرجع؟؟
ابو النور : والله يا خيي ابو حاتم هو هلا بعثني لاطمنك عن حاله وكمان يطمن عليكم .. لانه باله كان مشغول كثير وقت اللي ترك الحاره محاصره .
اما رجعته للحاره لسه بكير عليها شوي .. لبين ما يصح ويصير عال العال
ابو حاتم : اصبح سلملنا عليه كثير واحكيله الحاره كله مشتاقيتلك ومنتظره رجوعك على احر من الجمر .. وبخصوص الحاره احكيلوا انه خلصنا من الفرنساوي وصدر حكم بالعفو العام عن كل رجال الحاره بما فيهم هو وكمان احكيلوا في شوية مشاكل داخليه .. ما بدنا نزعجه فيها لبين ما نشوفه بالسلامه بنحكيله اياها
ابو النور : عال العال !!! صحيح قلبل ما انسى / ابو شهاب حكالي اني اسال عن واحد اسمه ابو غالب من حارة ابو النار !! وبيقول قدر يهرب من السجن ولا لا ؟؟
ابو حاتم يتبسم " : اي طمنه واحكيله انه هرب ووصل بالسلامه واجاه اعفاء كمان من الفرنساوي
ابو النور : اصبح بدي توصلوا هالرساله عل لسان ابو شهاب
المشهد الثـــانــي عشــر \ عبـدو يتعشـى بـ بيت عمـر !
عبدو : والله عم عذبكم معي / يعني ما بعرف شو بدي قلم
عمر : لا تعذب حالك ولا شي / اعتبر البيت بيتك / هلا كفي اكل ولا تعتل هم شي
عبدو : لك الله يسلمك شو انك اصيل .. بالمناسبه انا عرفت واحد من الثلاثه اللي كانوا بدهم يقتلوني
عمر : ومنو هو ؟؟
عبدو : ياللي انكشف وجهه // ابو حديد
عمر : اي اي عرفته ابو حديد اللي كان بدو يسرق محل ابو مرزوق
عبدو : اي مزبوط هو بعينه / الرجال هذا انا شفته ببوايكية الحج عبد الرازق / ولما سالته شو طالعك من الحبس انكر
عمر : هلا معقول يكون هو وراء القصه تبعت دكان ابو خاطر وكمان معه مامون بيك
عبدو : الزعيم ؟ ليش شو دخل الزعيم بهالقصه هاي ..
عمر : بعدين بعدين بحكيلك ؟؟ هلا قوم ارتاح لاسويلك كاسة شاي اكرك عجم على كيف كيفك
المشهد الــثــالــث عشــر \ مأمــون آبـو ساطــور !
يطرق باب مامون بيك فيقول
مين .. مين جاينا بهالوقت " ويفتح الباب "
مامون بيك : ابو ساطور ..! لك شو جابك بهالوقت؟ ما صار الحكي تيجيني الصبح ؟؟ وبعدين ليش منظرك هيك ؟؟ وشبها ايدك؟؟
ابو ساطور : والله ما بعرف شو بدي قلك يا زعيم ..بس
مامون بيك : بس شو ؟؟ اوعى تحكي انه هرب من بين ايديكم !!!!!!!
ابو ساطور " يتلبك ويتردد" : اي زعيم قدر يهرب
مامون بيك : لك الله لا يعطيك العافيه فوق تعبك .. كيف !! كيف قدر يهرب منكم ... ثلاث بغال ما قدرتوا عليه؟؟
ابو ساطور : سيدي ما كان لوحده .. ظهرلنا رجال مغطي وشه فجأه وقدر يهربه
مامون بيك : رجال ... ومنو هذا ؟؟ ومن وين طلعلكم
ابو ساطور : والله ما بنعرف ..
مامون بيك : هالرجال مو بس هربه .. وكمان علم عليكم , روح .. روح من وشي هلا بلاش حد يشتلأ علينا .. وبكره الصبح بتيجي وبتحكيلي كل شي
يذهب ابو ساطور ويقول مامون بيك بنفسه " العمى ! منوهذا الرجال ؟؟ ومن وين طلع ؟ مصييبه والله مصيبه
المشهد الــرابــع عشــر \ عبدو يـلتقـي آبو عصـام !
عبدو يشرب الشاي ويقول : لك يسلموا ايديك على كاسة الشاي .. ولا شايات او الفوارس " ما في كلام "
عمر : صحتين .. صحتين عبدو
وهنا وفي هذه اللحظه يخرج ابو عصام عليهم ويقف امام عبدو ينظر عبدو للرجل الواقف امامه فيذهل ويسقط كاس الشاي من يده ولا يعرف ما يقول
وفي حالة من الهلع والتردد يقول : اب اب اب ابو عصاااااااااام , لك لك لك لك ممو هذا عمي ابو عصام عمر ؟؟
سلام قول من رب رحيم ...شووووووو لك انا عم احلم شي
ابو عصام : الحمد لله على سلامتك عبدو " ويبتسم ابتسامته المعهوده "
فيرتمي عبدو باحضان ابو عصام صارخا وهو يبكي : عمي ابو عصاااااااااااااااااااااام ويبكي ويبكي ويبكي
ابو عصام : وكل الله عبدو شبك .. لك روق
فيضع عبدو يده على ابو عصام ويتحسس جسمه وراسه ويديه .. ويقول : اي والله هو عمي ابو عصام ما في كلام .. ويستمر في البكاء
عمر ينظر االيهم وتنزل الدمعة من عينه فيقترب ويقول : وكلوا الله يا جماعه .. وكل الله عبدو . خلصنا شبك
عبدو : لك لك . لك شو خلصنا .. يعني معقول شوف قدامي عمي ابو عصام بشحمه ولحمه وما في شي وبتقلي خلصنا
عبدو : والله والله والله هالليله احلا ليله بحياتي كلها بعد ما كان اليوم اصعب يوم وصار يصرخ باعلا صوته .. لك ويينكم يا حارة الضبع , وينك يا عصام , وينك يا معتز , كبييير الحاره بعده عاييش اي عايش
ابو عصام : روق روق عبدو واقعود احكيلي كل شي صار معك
عبدو : ولو قبل ما تحكيلي شو اللي صار معك انت ؟؟ وشلون انت عايش اسم الله حولك وحواليك وكل الحاره بتعرف انك ميت .. شلون يعني شلون ؟؟
ابو عصام : راح احكيلك كل شي
المشهد الـخامــس عشــر \ ابو غالـب و ابو النــار!
ابو النار : اي ابو غالب , هلا بدك تحكيلي كل شي , الجثه وشو اللي شفته وشو اللي صار ؟
ابو غالب : هاد يا عقيد لما كنت بدي سافر ولقيت الدرك معبي الطرقات والحارات رجعت وانتظرت لبين ما يروق الجو ,ولما رجعت لقيت ابو ذراع مع رجال ..كانوا عم يجادلوا , شوي والثنين راحوا لبيت ابو ذراع .. قلت لاشوف وين رايحين ,اطلعت عليهم من طرف الباب تبع بيت ابو ذراع .. لقيهم عم يحفروا ويحفروا .. بعدين صارت خناقه بينهم .. قام ابو ذراع دفش الرجال والا هو بيوقع على الفاس ياللي كان مغروس بالارض ,الرجال مات / وابو ذراع اتلبك شوي وبعدين محل ما حفر دفنه ,انا شفت هالشوفه ارتعبت وقلت بدي سافر لو كل الدنيا فيها فرنساوي , بعد اللي شفته ما عاد فيي ضل بالحاره بنوب ولا تاخر اي لحظه
ابو النار: اي .. بس ما حكيتلي مين هو الرجال اللي قتلوا ابو ذراع ..
ابو غالب : الرجال .. هو .. هو
ابو النار : لك احكي
ابو غالب : اللي قتلو ابو ذراع هو ابو الطماير !
ابو النار : شووووووووووووووو ؟ ابو الطماير ؟
وتنتهي الحلقـة الى آن نلتقي معكم في حلقات قادمـة مـن باب الحارة 5
كتابـة وسيناريست : شمس الانتر
اعداد وتنسيق : على السـالـم
