السلام عليكم ..

وصلنا في الحلقه السابقه عندما كان يتخيل عمر كيف  وجد الرجل الجريح في حفره وقد  كان هذا الجريح " ابو عصام " ونستكمل مع احداث الحلقه الثانيه حسب رؤيتي :

ولكن قبل ذلك .. من فاته متابعة احداث الحلقه الاولى بامكانه الدخول هنا ..

http://www.startimes2.com/f.aspx?t=19819763

الحلقه الثانيه ..

استمر عمر في خياله ونزل للحفره فيجد ابو عصام قد اصيب اصابات بالغه وهو يتاوه ، فقد كان على قيد الحياه .. حمله معه للبيت ..

الاب العجوز : شو هذا يا بي ؟؟

عمر : والله ما بعرف يا بي ... لقيته بحفره وانا بتمشى بالبساتين ..

وهنا ينتهي عمر من خياله .. فيساله ابوه :

عمر .. عمر . شو وين سرحت ؟

عمر : والله يا ابي عم افكر في ابو غريب صرله سنتين من يوم ما لقيناه متصاوب .. ومن يومها لليوم بعده على نفس الحالفه ما متذكر شي ولا بيعرف مين هو .. ولا من اي حاره وشو اللي صار معه ... وانت عارف من يومها ما بناديه الا بابو غريب .. لانا ما بنعرف عنه شي

الاب العجوز : والله يا بي هالرجال قصته غريبه .. بس الظاهر انه الفرنساوي اوصه هيك بان لما عالجناه ..

وهنا يدخل عليهم ابو عصام ..

السلام عليكم ..

الاب العجوز وعمر : اهليين ابو غريب وعليكم السلام ..

عمر : شو وين كنت لهلا يا رجال ؟

ابو غريب : والله كنت عم اتمشى بالبساتين .

عمر : بدي اسالك يا عم // ليش انت كل يوم بتطلع بتتمشى برات البيت وما بتعود الا المساء

ابو غريب : والله يا ابني ما بعرف بحاول كل يوم اتذكر مين انا وشو اللي صار معي وعم روح لنفس المكان اللي لقيتني فيه وبحاول اتذكر اللي صار معي بس ما بقدر .. ما بقدر ..

الاب العجوز : اي طول بالك الا ما ترجعلك ذاكرتك .. ومن هون لوقتها انت بعهدنا ومنا وفينا واللي بيصيبك بيصيبنا

ابو غريب : والله ما بعرف شو بدي قلكم .. بس والله تفضلتوا على راسي .. والشي اللي عملتوه معي .. كبيييير .. كبير كثير ...

مشهد اخر .. خاطر وابو العز وعبدو في الحمام

خاطر : لك ابو العز .. فكرك مين هذا ابو طاحن وليش كان بدو يقتلك ..

ابو العز : العمى والله ما بعرفه بس عصام حكالي انه كان مره عنده بيئش ذقنه وكان بدو ياخذ عصام ليعمل طهور بس رستم   الدركي في المغفر دخل عليهم وصار يحكي مع ابو طاحون والظاهر انه بيعرفه .. ومشان هيك ابو طاحون حمل حاله واجل الطهور ..

عبدو : يا لطيييف ...

خاطر وابو العز : شوبك عبدو ؟؟

عبدو : لك لا يكون كان بدو يستدرج عصام ليقتله هو كمان ...؟؟؟

ابو العز : العمى والله معك حق يا عبدو .. بس ليش ومين باعثوا علينا ..  الا ما قوصه هالواطي حتى لو كان بحضن امه مو بالمغفر ..

مشهد اخر .. ابو الجاسم ومامون بيك

ابو الجاسم : اي مامون بيك شو بدي قول ... معتز متوغوش كثير من قصة استشهاد الحكيم وحاط براسه يقوص ابو طاحون وين ما كان

مامون بيك : اي شو عليه . هذا عكيد الحاره / وما لازم يمرق هيك شي بدون حساب ...

مشهد اخر .. مامون بيك يتجه للكاركون

يطرق الباب على ابو جودت .. ويدخل نوري ..

ابو جودت : شو في يا نوري ؟؟

نوري : سيدي هذا مامون بيك بدو يشوفك ..

ابو جودت : لك .. لك يا بغل ومتركه بره .. فوته دغري ..

ابو جودت : اهلييين . اهلييين بالبيك .. نور الكاركون والله

مامون بيك : اهلين ابو جودت ..

ابو جودت : سيدي شو بتحبوا تشربوا ..

مامون بيك : لا ما في داعي بس انا جاييك بخصوص ابو طاحون ..

ابو جودت يتلبك .. ويتمتم : ايه ابو طاحون مالو

مامون بيك : مين هذا ابو طاحون

ابو جودت : هذا واحد ازعر وقوص الحكيم حمزه ولازم يوخذ جزاه ..

مامون بيك ينهض من على الكرسي ويقترب من ابو جودت .. : بس يا ابو جودت ابو طاحون كان بدو يقوص معتز ..

ابو جودت : هاااااااااااااااااااه .. ويحمر وجهه ..

مامون بيك : شوف يا ابوجودت لا تلف وتدور علي .. انا بعرف انك بعثت ابو طاحون ليقوص معتز ..

ابو جودت يتلبك اكثر ويرمي الكلام هنا وهناك فيقطع عليه مامون بيك ويقول :

ابو جودت .. لا تجدبها .. انت ليش بدك تخلص من معتز

ابو جودت : بس انا ...

مامون بيك : انت بدك تنتقم منو على الشي اللي عملوا معك .. ويتابع .. انا ما راح احكي لحد انه الك ايد بالموضوع // " ويخرج بعض النقود من جيبه ويعرضها على ابو جودت " ويتابع .. بس اهم شي تعمل اللي بقلك عليه والك الا تكون راضي ومتريش وتاخذ بثارك من معتز بس مو بالطريقه هاي ..

ياخذ ابو جودت المال وهو يبتسم وينظر لماون بيك باعجاب ويقول له ..

وهلا شو بتريدني اعمل

مامون بيك : كل اللي بدي اياه منك هلا انك تحرص على ابو طاحون ولا تخلي حد من الدرك يحقق معه .. وان سالك رجال حارة الضبع عنه قلهم انه تحت التحقيق ..

مشهد اخر .. ابو الحكم وابو النار في محل ابو النار ..

ابو الحكم : سمعت باللي عم يصير بحارة الضبع يا عقيد

ابو النار : خير شو في كمان

ابو الحكم : الحاله مكركبه من يوم استشهاد الحكيم حمزه / وعم يقولوا اللي قوصو كان قاصد معتز // وكمان سمعت انه حد باعثه ليقتله هو وعصام ..

وبعدين سمعت انه معتز صار عقيد الحاره بغياب ابو شهاب

ابو النار : شووووووووو ؟؟

ابو الحكم : وسمعت كمان انه ابو حاتم وبعض كبارية الحاره مو راضيين عن الموضوع ..

ابو النار : وانت من وين عرفت كل هالشي

ابو الحكم : مريت على حارة الضبع لاطمن على النمس لانه صرلي مده مو شايفه . وهو حكالي

ابو النار : اهااا يعني النمس اللي حكالك

ابو الحكم : مو بس النمس كمان بقهوة ابو حاتم بيحكوا بهالموضوع ....   ويتابع ..

صحيح عقيد لك ابو ساطور ما بين من وقت ما اخذه النمس وشغله عند مامون بيك .. وين راح هالرجال ؟

مشهد اخر .... عمر في بيته ومعه ابو غريب " ابو عصام " وكذلك اباه "

ابو غريب : صحيح لك ابني عمر .. بدك تضلك هيك كل يوم تشتغل شغله هون ولا هون .. لك الزقلك بشغله وتعلم كار يفيدك   ..

عمر : والله يا ريت يا عمي .. الحال مو ميسره .. وكل شغله بشتغلها / اما بتكون طياره شي يوم او يومين . واذا لزقت بشي شغل عند احد الصنايعيه بتخانق انا وهو .. يعني مو زابطه ..

ابو غريب :  لك يا ابني انت بعدك باول العمر ما تعلمت شي كار او هيك حبيت شي شغله ؟؟

عمر : والله يا عمي اشتغلت فتره طويله صبي عند واحد حمصاني بسوق ساروجه .. بس الرجال توفاه الله واعطاك عمره ، وحرمته وعيالها سكروا المحل وتركوا الحاره وسافرروا عند اهليتهم ..

ابو غريب : طب افتحلك شي محل واشتغل حمصاني ..

عمر : والله يا ريت يا عم / من وين وانت شايف الحال ..

ابو غريب : بيسر الله .. الا ما تفرج ..

عمر : صحيح عمي .. انت ما فيك تتذكر شو كنت تشتغل ؟؟ وشو الكار تبعك ..

ابو غريب .. يصمت .. ومن ثم يقول .. والله ما بعرف .. يا ريت بس اتذكر ..

المشهد الاخير في الحلقه .. مامون بيك وزوجته فريال خانوم ..

فريال : اي ابن عمي .. هلا صحيح ابن سعاد بدو يصير عقيد الحاره ؟؟

مامون بيك : هذا مو ابن سعاد .. هذا ابن ابو عصام كبير الحاره " الله يرحمه " ، وابن اخته لعقيد الحاره ابو شهاب   الله يرجعه بالسلامه "  .. بعدين ليش يصير عقيد   مهو صار وخلااص .

فريال خانوم : " في سرها " يا حبيبي كملت والله .. كان اخوها عقيد وهلا بدو يصير ابنها ..

مامون بيك : شوبك يا حرمه ليش سكتتي ..

فريال : لا ابن عمي . بس اتذكرت عمي ابو صالح الله يرحمه ..

مامون بيك: اييييييييييه الله يرحمه .. كان ماسك الحاره والكل يحلف بحياته .. بس شو بدي قلك

فريال : اامر ابن عمي

مامون بيك : معتز صار عقيد لانه الاحق بغياب خالو ابو شهاب وكمان هو زكرت وابضاي ..

وعم قول .. انه الحاره كمان لازم يكون فيها كبير يمسك الحاره ويمشي كل امورها .. ومعتز لحالو ما بيكفي .. هو صحيح زكرت وابضاي لكنه متسرع وعصبي وكمان باول عمره .. يعني لازمه واحد كبير يوجهه .. ما هيك

فريال : شو قصدك ابن عمي .

مامون بيك : يعني عم قول لحالي .. معتز هلا عم يسد الفراغ اللي تركه خالو ابو شهاب .. ولازم واحد ثاني يسد غياب الزعيم " ابو صالح " الله يرحمه

فريال : " باعتراض "  بس الفراغ اللي تركه عمي ابو صالح ما حد بيسده مين من كان

مامون بيك : شو يا حرمه / وانا ما بنفع ؟؟؟؟

فريال : انت ؟؟؟؟؟؟؟؟

مامون بيك : اي انا .. ليش في حد احق مني ليحل محل عمي الزعيم ابو صالح؟؟ ... بس هالشي بدو ترتيب وبدو وقت .. ويتابع .. وبعدين اسمعي يا حرمه.. اذا الكلام هذا طلع لاي مخلوق بالدنيا مو بس بالحاره   بقصلك لسانك ..

فريال : " بحاله من الخوف والتلبك .. امرك ابن عمي ..

وتنتهي الحلقه الثانيه ...

والى اللقاء غدا باذن الله في الحلقه الثالثه

وكما قلنا لكم في الحلقه الاولى بان القصه تتركز على احداث جوهريه ولست بصدد ادخال اللت والعجن والكلام الذي لا يفيد .

مع تحيات اخوكم شمس الانتر