حين جاء العيد !! غنت الاطيار وفاح اريج الازهار !! ابت الازهار الا ان تطل علينا بهذا العيد بلا اهتمام ان كان هذا فصلها او ميقاتها ان كان ربيع او خريف لم لا !!! فاليوم عيد حين جاء العيد !! ابى الاصدقاء الا ان يشاركونا الفرحه وابى القلب الا ان يعزف انشودة الحب المديد !! فالقلب صار مسكنا للفرح وصار بيت لكل صديق حين جاء العيد كنا هناك !! وها نحن هنا من جديد !ابينا ان لا نكون الا في الموعد !! ننشد الحب سخيا بقلوب من صفاء وحروف من وفاء !! احبتي !! اخوتي في منتديات ستار تايمز عامه وفي منتدى المسلسلات العربيه خاصه !! وعلى وجه التحديد عشاق باب الحاره !! كل عام وانتم بالف خير ! ها نحن نكمل المشوار الذي بدأناه // ونتابع معا احداث حلقات باب الحاره الجزء الخامس والتي خرجت من وحي الخيال !! نكمل احداث حلقاتنا لنبدا حلقه جديده بالتعاون مع كوكبة من الاخوه اصروا الا ان يكونوا هنا الاخ :  كتلوني للعضم مدقق اللهجة الشاميه الاخ : الوحش الاحمر2009 منسق الحلقات الاخ : MuRRaY FoR EvEr مصمم الخلفيه والصور الاخ : el nouRi ضيفا للشرف كل الشكر لكم احبتي على مجهوداتكم الوفيره كنا قد اخبرناكم بان الحلقه هذه ستكون الاخيره ولكن وخضوعا لرغبة الكثير من الاعضاء فلن تكون هذه الحلقه الاخيره وانما قبل الاخيره !!!  وكانت الحلقه الماضيه انتهت بمقتل ابو ساطور على يد مامون بيك سعيا منه لقتل الشهود !! فهل سياتي الدور على النمس ؟؟ قبل ان نعرف ذلك سويا اذكر الاخوه الذين فاتهم متابعة اي من الحلقات السابقه بالدخول هنا   here الحلقه السادسه عشره المشهد الاول /مامون بيك ينفذ جريمته في حلكة من الليل خرج مامون بيك من بيت ابو ساطور كالخفافيش بعد ان قام بقتل ابو ساطور ولم يحس عليه او يره احد وغادر لبيته بصمت تاركا جثة ابو ساطور مكانها !!وذهب للهاتف مباشرة مامون بيك : الووووو !! دومنيك !! اي !! سيدي الوضع ما بطمن بنوب !! ابو شهاب رجع للحاره ولساه عايش !! وما بعرف شلون عرف ابو حسن بامر وصولكم !! اي سيدي !! والمالكانات اشتراها واحد اسمه ابو النور !! لا ما بعرف مين هو ولا بعرف من وين !! هادا شغلكم سيدي !! وفي شي تاني!! الليله تخلصت من احد الشهود !! وكل شي مر على خير المشهد الثاني :ابو حاتم ببيت ابو شهاب ابو حاتم : والله لما وصلني خبر وصولك بالسلامه حملت حالي وجيتك لهون على الحارك ابو شهاب : والله اهلين بعمي ابو حاتم !! شو وين كاين اليوم ؟؟ قالولي اخدت الحصان وكنت ملبك !! خير شو القصه ؟ ابو حاتم يهم بالرد على ابو شهاب فتدخل شريفه !! فيقول لها ابو حاتم !! شلونك يا بنتي !! هي ابن عمك قدامك ما به شي !! تبتسم شريفه وتقول : الحمد لله يا ابي الله رجعلي اياه بالسلامه ابو شهاب : شريفه اصيله وبنت اصول ابو حاتم : الله يديم اصلك ويعزك يا عقيد !! شريفه بعدما تقدم الضيافه !! ابن عمي !! بتحب تتعشوا هلا ؟؟ ابو شهاب : اي شو عليه !! خلنا نكسر السفره سوا !! اشتقنا لجلسات عمي ابو حاتم  !! اي عمي شو وين كنت ؟؟ ابو حاتم : بالاول قللي شفته لمامون بيك ؟ ابو شهاب : اي شفته !! بس بدك الصراحه ما ارتحتله !! يبتسم ابو حاتم ويقول : صهري !! من وقت اللي اجى فيه مامون للحاره !! الحاره انقلبت فوقاني تحتاني !! ابو شهاب : اي قلي فتحي كل شي صار بغيابي !! بس شو علاقة مامون باللي صار بالحاره ؟؟ ابو حاتم :  يا عقيد !! مامون ورا كل شي عم يصير !! سرقة محل ابو خاطر !! وتلبيس عبدو التهمه !! ومحاولة قتله !! ابو شهاب : شلووووووووووووون ؟؟ عبدو كان بدو ينقتل؟؟؟ ابو حاتم : اي !! واللي كان ورا هالشي مامون !! وابو ساطور كان دراعه اللي بيضرب فيها !! وهو بشخصه كان بدو يقتل عبدو مع كم ازعر ابو شهاب : يا بااااااااطل !! ابو حاتم :بس قصة موت فريال خانوم مو لاقينلها حل بنوب !! ابو شهاب : شلون يعني؟؟ وليش لهلا سامحينله يتصرف على كيفو ؟؟ يعني اذا كان ابن اخوه للزعيم ابو صالح بتتركوه يتصرف عل كيفه ؟؟ لا ما فشر واحد متله يحمل اسم الزعيم ووراه كل هالمصايب !! ابو حاتم : يا ابو شهاب !! نحن فينا نجيب ابو ساطور ونخليه يقر بكل شي !! بس ما راح نستفيد شي !! اكتر شي راح يقوله انه مامون هو اللي دبر وخطط وهو ورا كل هالشي !! اكيد ابو ساطور ما بيعرف اكتر من هيك !! ونحنا ما بيهمنا هالشي بالدرجه الاولى !! ابو شهاب : ما فهمت عليك !! لا يكون لانه ابن اخوه للزعيم ساكتين عليه ؟؟ ابو حاتم : ابو شهاب !! مامون بيك واحد خسيس ودخيل على الحاره ولا هو ابن اخوه للزعيم ولا بيمتله بصله !! ابو شهاب : شوووووووو ؟؟ مو ابن اخوه للزعيم؟؟ لكان مين بيكون ؟ ابو حاتم : واحد داسوس من الفرنساوي !! ابو شهاب ينهض من كرسيه فزعا : الله اكبر !! شو عم تقول انت؟؟ ومن وين جبت هالكلام؟؟؟ ابو حاتم : ابو عصام كشفه !!! ابو شهاب : شلوون ؟؟ مين ابو عصام؟؟ ابو حاتم : ابو عصام صهرك !! الحكيم !! ابو شهاب: عمي ابو حاتم؟؟؟ شو عم تحكي انت ؟؟ ابو حاتم : ابو عصام لساه عايش يا ابو شهاب !! ابو عصام حي يرزق !! المشهد الثالث /الضابط الفرنسي يتكلم بالهاتف اسمعني جيدا !! هناك رجل يدعى ابو النور !! اشترى الاملاك التي تخص حارة الضبع والمعروضه بالمزاد قبل اسبوع !! يجب ان تعرف من هو واين يسكن !!وليس ذلك وحسب!! بل يجب ان تاتيني به فور العثور عليه   المشهد الرابع / ابو شهاب يبكي لاول مره تذرف عيون ابو شهاب حينما يسمع خبر ابو عصام وانه على قيد الحياه ويقول : يااااااااااااااه يا عمي ابو حاتم !! مشتاق لابو عصام خيرات الله !! والله !! والله الفرحه مو واسعتني بنوب !! من وقت ما اختلفنا وقت اللي كانت قصة طلاق ام عصام ما صحلي اتشكره ولا اقعد معه !! ما صحلي اعتذر منه على الشكل اللي عاملته فيه " ويستمر بالبكاء " ولما سمعت بخبر وفاته حزنت كتييييير كتير !! يااااااااااااااااه  يا ابو حاتم !! وهلا ما عم صدق !! معقول بعد كل هالمده شوفه ؟؟ معقول يكون عايش؟؟ هلا هو بعيد عن الحاره؟؟ يعني فيي اشوفه الليله ؟؟ ابو حاتم : لا يا ابو شهاب ؟؟ انت ما الك طلعه من الحاره بهيك وضع !! بعدين ابو عصام بدو اياك تضل بالحاره !! لانه في مخطط براسه لنكشفه على حقيقته لمامون بيك وقدام كل الحاره !! لانه كل الحاره مخدوعين فيه !! ابو شهاب : وشو هي الخطه اللي براس ابو عصام ؟ ابو حاتم : ما بعرف شو هي بالضبط !! بس هو طلب انه يشوف عصام ومعتز ويظهر راح يعتمد عليهم بهالشي !! لانه مبارح بس اتاكدنا 100% انه عميل للفرنساوي ابو شهاب : شلون ؟؟؟ ابو حاتم : عن طريق ابو حسن ورجاله ابو شهاب : كيف يعني ؟؟ ابو حاتم : راح احكيلك كل شي بس نكسر السفره سوا !! بس قللي بالاول !! شو ناوي تعمل ؟؟ انا عن نفسي ما راح اسكت !! وحياة عزك يا شام !! وحياة ترابك الغالي !! ما بكون ابو شهاب اذا تركتك تنفد بريشك يا مامون بيك !! ابو حاتم : شو في براسك صهري؟؟ ابو شهاب : بدي شوف ابو ساطور !! الا ما يكون يعرف شي نحنا مامنعرفه    المشهد الخامس / ابو شهاب في الحمام ابو جاسم : اي اخي ابو شهاب !! في شي بدي قلك اياه ابو شهاب : شو هو !! احكي ابو جاسم : بدنا تدبرلنا شي بيت لصبحي !! وبدنا رايك بهالشي !! ابو شهاب : اترك الموضوع علي !! ابو جاسم : وفي شي تاني!! المالكانات اللي بتخص الحاره واللي صادرتها البلديه من كم سنه اذا بتذكر !! انعرضت للبيع من كم اسبوع !! وما بنعرف شو صار فيها !! ابو شهاب : اطمن اخي ابو جاسم !! المالكانت رجعت للحاره واهلها ! ابو جاسم : شلون ؟؟؟ ابو شهاب : انا اشتريتها !! عن طريق ابو النور !! المشهد السادس / ابو حاتم يذهب لدكان ابو عصام ابو حاتم : مرحبا يا رجال !! عصام : اهلين عمي ابو حاتم !! شرف ! ابو حاتم : شلونك ابو العز !! ولا بتحب ناديك عقيد ؟؟ معتز : ولو عمي ابو حاتم !! عسلامتو خالي ابو شهاب !1 ما عاش اللي يكون عقيد بوجوده ابو حاتم : ابني عصام !! الله يرضى عليك اي زبون بيجيك هلا صرفو !! عصام : خير عمي ابو حاتم شو في ؟؟؟ ابو حاتم في حديث بدي احكيه معكم وما بدي حد يدخل علينا !! معتز : تفضل عمي ابو حاتم !! ابو حاتم : بتتذكروا اليوم اللي استشهد فيه ابوكم الله يرحمه ؟؟ معتز تتغير ملامحه اشارة للحزن : ومين فينا بينسى هاليوم المشؤوم يا عمي ؟؟ ابو حاتم : يا ترى حدا فيكم شاف جثته او بيعرف وين هو مدفون؟؟ عصام : عمي !! شو القصه ؟؟ ادخل بالموضوع دغري !! ابو حاتم يتبسم ويقول : ابوكم !! على سلامته لساه عايش !! معتز وعصام معا : شوووووووووووووووووووو !! عم تحكي جد ؟؟؟ ابو حاتم : لكااااااااان !! ومو بس هيك !! صرت شايفه كذا مره !! معتز يمسك بابو حاتم ويكاد يبكي !! عمي يستر على عرضك مو وقت مزحك هلا!! ابو حاتم : والله ما عم امزح !! عم قلك ابوكم عايش وشفته كذا مره وحكيت معه !! يبدا عصام ومعتز بالبكاء وبنثر الكلام ما بين كيف وايمت ووين وكثير من هذا الكلام !!! ابو حاتم : عصام ! معتز !! اتاكدوا انه كل شي حكيتلكن اياه صدق !! وما لازم حدا يدرى باللي حكيته !!!  فهمانيين ؟؟ عصام : ليش عمي !! خبر متل هاد  لازم كل الحاره تعرفه !! معتز يتلعثم في كلامه !! ويقول : مو مهم !! المهم هلا وينه بدي شوفه !! بدي كحل عيوني اللي ما نشفت دموعها من البكى عليه !! بدي كحلها بشوفته ابو حاتم : اطممنوا !! راح ابعتكم لعنده !!! لانه هو بذاته طلب يشوفكم !! معتز : ايمتى عمي ايمتى !! ابو حاتم : هلا وعلى الحارك !!! وبتتركوا الدكان  باي حجه !! المشهد السابع / ابو شهاب في البوايكيه ابو شهاب : فتحي !! بتروح هلا وعلى الحارك على بيت ابو ساطور وبتقله العقيد ابو شهاب بدو اياك ضروري !! وما بترجع الا وهو معك فتحي : امرك عقيد !! ابو شهاب يحدث نفسه : والله زمان يا ابو ساطوور !! اشتقنا لشوفتك !!   المشهد الثامن / معتز وعصام يلتقون باباهم !! يدخل عصام ومعتز البيت ويكون ابو عصام بانتظارهم !! يشاهدون اباهم واقف امامهم فيقفون امامه وتذرف دموعهم !! فيرتمي عصام باحضان ابيه ويقبل يديه وهو يبكي !! وينتهي عصام من لقاء ابيه فيقف معتز في مكانه ويبدأ بحركة راسه المعتاده وتعتصر عيونه بالدمع ويقول !! يا بي !! معقوول !! كل هالمده تتركنا !! فيتبسم ابو عصام ويفتح ذراعيه لابنه " الابضاي " معتز " فيهجم عليه معتز ويحضنه بحراره شديده ويتحسس وجهه ويقبل يديه ويقول !! اشتقتلك يا بي كثييير !! بدونك الحياه ما الها طعمه !! والحاره بدونك بتضل صغييييره!! والله رجع كبير الحاره رجع !! والله وراح تشمخي يا حارة الضبع !! راح ترفعي راسك لفوووق فوووق فووووق !!! ابو عصام : شلونها امكم وخواتكم ؟؟ معتز : امي كل يوم عم تبكي والعالم الله شو راح يصيبها لو تعرف انك بعدك عايش !! عصام : صحيح يا بي !! مين هادا الرجال " اشارة لابو عمر " ابو عصام : هادا ابو عمر !! عمر الشوال !! اللي اجاكم ليطلب الدين اللي اخذته منه !! وياللي فتح محل حمصاني بمحل ابو محمود الكندرجي !! معتز وعصام ينظرون لعبضهم ويوقولون : عمر !!!!!!!!!!!!!! المشهد التاسع / فتحي يعود للعقيد ابو شهاب فتحي : عقيد !! ضليت دق على بيته لا بو ساطور بس ما كان يرد !! يظهر انه طلع من البيت !! ابو شهاب : بسيطه !! بتروح ع البيت وبتضل واقف قدام منه لبين ما يرجع وما بتترك مكانك لحد ما يجي ابو ساطور او اجيك انا !! فتحي : امرك عقيد !! المشهد العاشر/ عصام ومعتز يستمعون لخطة ابيهم !! ابو عصام : اسمعني يا بي انت واياه !! هلا مشان نواجه مامون بالحقيقه ونخليه يقر بكل شي وقدام كل الناس بدي منكم تشحطوه لابو جودت باي شكل وباي طريقه !! لانه بيعرف شغلات كتيره عن مامون !! معتز : شلون بدنا نشحطه ؟؟ ابو حاتم : اتركوها علي !! انا بعرف شلون اخليه يجي برجليه للحاره !! عصام : يا بي !! طب ليش ما نشحط النمس؟؟ بكون اسهل من ابو جودت !! ابو عصام : النمس اتركوه لعمر !! هو بيعرف يتصرف معه معتز : وانت يا ابي ايمت بدك ترجع للحاره ؟؟ ابو عصام : ابو حاتم !! بالوقت اللي بيشحطوا الشباب ابو جودت !! لازم يكون مامون برات الحاره !! بترتب هالشي مع ابو شهاب !! وفي اللحظه هاي  انا بدخل الحاره !!بس لازم كون قريب من الحاره ابو حاتم : ولا يهمك !! بس نرتب هالشي منأمنك بحارة الماوي عند ابو صياح !! بس قللي !! عبدو ؟؟ شو مع عبدو ؟؟ ابو عصام : عبدو رح يكون معي !! معتز : عبدو ؟؟؟ عصام : ليش وينه عبدو ؟؟ وهنا يطرق الباب !! ابو عصام : ابن حلال يظهر هاد عبدو !! فووت عبدو ويدخل عبدو !! فينهض عصام ومعتز : عبدو ؟؟؟؟؟؟؟؟؟؟ المشهد الحادي عشر / ابو حاتم في البوايكيه عند ابو شهاب ابو شهاب : هيك لكان !! حلو كتيير كتتتير !! اتروك مامون علي انا بعرف كيف اصرفه برات الحاره !! بس شو مع ابو جودت ؟؟ ابو حاتم : رح شوف ابو النار !! وهو رح يدبرها !! بس بالاول بدي مر على صبحي بالحمام !! بس بمعيتك بدي ترتبلي الوضع مع ابو جاسم !! نحن بحاجة الحمام بالنهار !! يعني يا ريت تصرفوا الحريم بهداك النهار وما يجو للحمام !! ابو شهاب : ليش شو في براسك ابو حاتم : راح احكيلك ... المشهد الثاني عشر / ابو حاتم وصبحي ابن الادعشري ابو حاتم : اي ابو صبيح !! بدي اسالك !! صبحي : امر عمي ابو حاتم !! ابو حاتم : شو اخبار صهرك ابو ذراع ؟؟ صبحي يصمت !! ابو حاتم : اطمن ابو صبيح !! سرك ببير صبحي : ابو ذراع اخذ عياله وهرب لبيروت من مده ابو حاتم : يصمت ومن ثم يقول !! اي شو عليه !!  حلو  كتير المشهد الثالث عشر / ابو حاتم عند ابو النار ابو حاتم : السلام عليكم ابو النار : اهلييييييييين عمي ابو حاتم !! شرف شرف اخي ابو حاتم ابو حاتم : الله يزيدك شرف اخي ابو النار !! ابو النار : بهنيك بسلامة العقيد ابو شهاب ابو حاتم : الله يسلمك !! اي اخي ابو النار !! شو بدي قول ابو النار : تفضل عمي ابو حاتم قول !! ابو حاتم : محتاجين مساعدتك من بعد امرك !! ابو النار : يا باااطل !! لعيونكن !! امرني عمي ابو حاتم !! المشهد الرابع عشر / ابو شهاب يذهب للحاره ابو شهاب : شو فتحي !! ما بين ابو ساطور ؟؟ فتحي : الله وكيلك يا عقيد من وقت ما بعتتني لهون وانا عمبستناه !! ما بين بنوب !! ابو شهاب : العمى !! اسماع فتحي !! بتروح لعند ابو الفوارس على محرسه وبتجيبه لهون فورا !! فتحي : امرك عقيد !! وما هي الا لحظات وياتي ابو الفوارس بصحبة فتحي ابو الفوارس : امرك عقيد !! ابو شهاب : ابو الفوارس !! شفت ابو ساطور شي ؟؟ ايمتا طلع من الحاره ؟؟ رجع شي للحاره ؟؟ ابو الفوارس : والله يا عقيد من مبارح المساء ما عدت شفته لابو ساطور !! وما بظن انه طلع من البيت !! الا اذا كان طلع من الحاره بالوقت اللي ما كنت فيه هون !! فتحي : عقيد انا سالت بالقهوه عن ابو ساطور ما حدا شافه اليوم !! ابو شهاب : العمى !! لا يكون صايرله شي !! فتحي بتنده ابو جاسم والشيخ عبد العليم !! وبتجيب خاطر وبشير ومعتز ورياض !! بسرعه !! المشهد الخامس عشر / مامون بيك يحدث نفسه مامون بيك : وهلا من بعد ما خلصنا من ابو ساطور !! ما بقى الا النمس ! بس يا هل ترى منو هالرجال ياللي حكالو عن السر ؟؟ ولا هي لعبه بيلعها النمس علي؟؟؟ اي شو عليه مين ما يكون !!! النمس هو مصدر الخطر الوحيد علي هلا ولازم اخلص منه !! بس تبرد قصة ابو ساطور   المشهد السادس عشر / ابو شهاب ورجال الحاره يجتمعون حول بيت ابو ساطور الشيخ عبد العليم : شو اللي مخليك قلقان هالقد على ابو ساطور يا ابو شهاب ابو شهاب : ما بعرف يا شيخي بس قلبي حاسسني انه هالرجال صايرله شي !! او يمكن يكون ترك الحاره !! يبدا ابو جاسم وابو بشير بطرق الباب بشده !! فيشير ابو شهاب للشباب بضرورة كسر الباب !! فيقتحم اهل الحاره بيت ابو ساطور ويجدوا جثة ابو ساطور ملقاه على الارض تعلو الاصوات !! يا لطيف !! الله اكبر !! شو هااااااااااااااد ؟؟؟؟؟ ابو ساطوور !! ابو ساطور مقتول يا رجاااااااال !!! ابو شهاب بسره " العمى !! عملتها يا مامون ؟؟ وبعد ان يدخل الجميع بيت ابو ساطور يصرخ خاطر من الداخل !! عقيييييد !! فياتي الجميع عنده ويجدون المسروقات التي سرقت من محل ابو خاطر !! ابو شهاب : شو هاد؟؟ خاطر : هي بقية الغراض اللي انسرقت من محلنا ! ابو جاسم : العمى !!! يعني عبدو مو هو اللي سرق؟؟؟ فتخرج الاصوات  من هنا وهناك : يا مسكين يا عبدو !! ظلموك يا عبدو !! ويصرخ ابو شهاب : معتز !! بتجمعلي كل رجال الحاره بالمضافه اوااااام !! معتز : امرك خاااااااااااال !! المشهد السابع عشر : اجتماع في المضافه !! ويكون من بين الحاضرين مامون بيك !! ابو شهاب : اسمعوا يا رجال !! الحاره كرمالها لورا !! اللي صار اليوم واللي صار بالايام الماضيه شي كبييير كبيير كثير !! واكيد وراه شخص واحد !! هو ورا كل شي !!بس مين يا ترى ؟؟؟ مين  اله مصلحه بقتل ابو ساطور ؟؟ ابو بشير : يا عقيد اللي عمل هالعمله من جوات الحاره !! ابو جاسم : بغضب !! وقت اللي انسرق محل ابو خاطر قلتوا اللي عمل العمله من جواة الحاره !! ووقتها ابو ساطور ما كان بالحاره بالاصل ولا كان من سكانها !! واتهمتوا عبدو ظلم وطلع ابو ساطور ورا هالشي !! وهلا ابو ساطور انقتل وما بنعرف مين اللي قتلوا !! ورجعتوا تولوا من جوات الحاره الشيخ عبد العليم : طول بالك يا ابو جاسم !! ابو جاسم : شلون بدي طول بالي والرجال هلا ما بنعرف وين اراضيه !! طلع من الحاره مكسور الخاطر !! ابو حاتم : انتوا اللي اتهمتوه للمسكين من بعد ما قلكم مامون بيك عليه !! مامون بيك : انا يا جماعه ما جبت شي من عندي اللي وصلني خبرتكم اياه !! ودخلكم شو بيعرفني اذا كان ابو ساطور ورا هالشي وداسس واحد ليخبرني عن عبدو ؟؟ والانكى من هيك لاحش نص الاغراض ببيت عبدو ؟؟ الشيخ عبد العليم : يا جماعه هلا اتركونا من سرقة محل ابو خاطر وخلونا في اللي نحنا فيه !! ابو ساطور مين اللي قتلو؟؟ وكمان اللي قوس على مامون بيك وقتل حرمته مين بكون !! ابو جاسم : قللي هلا اللي عمل هالعمله كمان من جوا الحاره؟؟؟؟ ابو شهاب : طولوا بالكم يا رجااااااااال !! هيك ما راح نوصل لشي !! اسمعوا اللي بدي احكيه وبدي من كل واحد يحطه حلقه بأدنه !! الجميع : امرك عقيد !! الشي اللي صار الليله من قتل ومسروقات بيضل جوات الحاره وما بدي مخلوق يخلق برات الحاره يدرى بهالشي وبالاخص الكاركون !! هذا اول باشتان !! تاني باشتان !! بتدفنوا ابو ساطور ببيته !! وبتكتموا على الموضوع لبين ما نشوف مين ورا هالشي !!   المشهد الثامن عشر / ابو شهاب مع ابو حاتم !! ابو حاتم : اي صهري !! شو رايك؟؟ ابو شهاب : واضحة متل الشمس !! مامون بيك عملها !! ابو حاتم :  وانا رايي من رايك ما عملها غيره !! مشان هيك لازم نتحرك بسرعه !! لاني خايف يجي الدور عل النمس !! ابو شهاب : النمس ؟؟؟ !! اي والله معك حق !! ابو حاتم :لانه هو كمان من زلم مامون بيك وهو اللي دبر ابو ساطور عند مامون بيك !! واكيد  بيعرف شي كبير عن مامون !! والشي هاد خلا مامون يشتريله محل بالحاره ابو شهاب : اسماع عمي ابو حاتم !! انا الليله شفت الشيخ عبد العليم وخليته يخبر مامون بيك انه في اجتماع للوجهاء والزعامات بالحارات الثانيه !! وبكره من بعد الظهر بدهم يتيسروا التنين ويطلعو من الحاره !! ابو حاتم : ويا ترى في اجتماع ؟؟ ابو شهاب : لا اجتماع ولا شي !! بس الشيخ عبد العليم راح ياخذ ويعطي معه ويضيعه وما يرجع فيه للحاره الا على اذان العصر !! او حاتم : حلو كثييير !! وانا الليله لازم اطلع من الحاره واروح لعند ابو عصام واخبره بكل شي صار !! والدور هلا على عمر ليشوف النمس !! ابو شهاب : لا بلا تروح انت !! ابعت عصام بدل منك !! وانا رح خبر معتز يروح على بيت النمس !! بلا يصرله شي كاينه !! ابو حاتم : وهو كذلك !! اصبح انا بروح لعند ابو النار مشان بكره ينفذ اللي اتفقنا عليه !! المشهد التاسع عشر / ابو بدر في بيته ابو بدر يدور كالمجنون في بيته ويهذي ويولول ويقول !! وليييي وليييييي !!! راح ابو ساطور رااااااح !! الله يرحمك يا امي !! دايما كنتي تقوليلي انه اخرتك سوده يا ابو بدر !! ولييييييييييييييييي  !! ولييي فوزيه : لك شبك ابو بدر ؟؟ ليش عمبتولول؟؟ ابو بدر : لك ابو ساطور راح يا فوزيه رااااااااااح " ويبكي " فوزيه : ان شاء الله بتروح وراه !! ابو بدر : يبكي !! والله مي بعيده !! لانه اذا كان شافني اكيييد رح يلحقني بابو ساطور !! فوزيه : مين هاد ؟؟ ابو بدر : ياللي قتل فريال خانوم !!! فوزيه : ومين اللي قتلها !! ابو بدر : اللي قتل ابو ساطووووور !! فوزيه : ومين هو يا ابو بدر؟؟؟ يكتفي ابو بدر بالبكاء والعويل   المشهد العشرون / عمر ياتي لبيت النمس !! النمس يحدث نفسه والرعب يغطيه !! لك شو اللي عم بيصير؟؟ اجى الدور على ابو ساطور !! وابو ساطور راح !! واكييد ما حدا روحه غير مامون بيك !! يا ترى رح يجي الدور علي ؟؟ ولييييييي !! بس لا لا !! ما بيعملها !! انا ضفري برقبته لمامون بيك !! قصدي دومنيك " ويبتسم " وتقطع ابتسامته طرقات الباب وتنقلب الابتسامه الى خوف !! النمس : مين !!! عمر : انا عمر لك نمس !! افتاح الباب !! النمس : مين عمر ؟؟؟ عمر : لك يا اجدب انا عمر الشوال الحمصاني بحارة الضبع !! شبك ؟؟ النمس : عمر ؟؟؟ شو جابو هاد هلا ؟؟ "ويفتح له الباب " عمر : مساء الخير نمس!! النمس !1 والله ما بظن خيير !! لانه جيتك غرريبه وبهالوقت !! خير شو في ؟؟ عمر : اسماع نمس !! انت اكيد عرفت بمقتل ابو ساطور !! والدور راح يجي عليك النمس !! شو عمر !! شو بتحكي انت !! شو دور وما دور وشو دخلني انا عمر : لك نمس !! نحنا صحاب ما !! وبتعرف اني ما بكذذب عليك وبخاف عليك !! بس المشكله انت عمبتكذب علي النمس : بشو كذبت عليك !! عمر : حاجي نمس !! ما في وقت !! انا بعرف انك انت ياللي أخدت غراض محل ابو خاطر وحطيتها ببيت عبدو لانو مامون طلب منك هيك !! واكيد انت عرفان شو معنى هالشي؟؟ النمس : عمر!! انت اكيد بيتهيالك!! شو غراض وعبدو وما عبدو عمر : اسمعني منيح !! ابو ساطور هو اللي  سرق الاغراض وهو بيعرف اشياء كثيره عن مامون بيك !1 مشان هيك تخلص منه والدور جاي عليك !! فاحكي الل عندك واخلص احسنلك بلا ما تلحق ابو ساطور !! النمس : وليييي !! وشو بدي اعمل هلا !! عمر : اسمعني راح اخدك لبيتي اخبيك عندي !! وهناك بتحكيلي كل شي !! يلا عالحارك ما في وقت !! النمس : طب انت شو دخلك بكل هالقصص وشو عرفك ؟؟ عمر : ولو يا نمس ! مو نحنا صحاب !! واكيد بتهمني مصلحتك !! لك يلا بلا كثرة حكي !!     المشهد الحادي والعشرون / ابو جاسم وابو شهاب !! ابو جاسم : لك شو هادا اللي عم يصير يا اخي !! هيك بينضحك علينا !! ورميناه لعبدو ظلم وطردناه من الحاره !! شلون بدي خبي وشي منه !! ووين هو هلا وشو اخباره ؟؟ ابو شهاب : انتو ما الكم ذنب !! انتو انضحك عليكم !! وبخصوص عبدو !! اطمن !! عبدو بخير !! ابو جاسم : بجد بتحكي؟؟ وينه هلا ؟؟ ابو شهاب : بكره راح تعرف كل شي بس هلا بدي منك بكره تخلي الحمام بالنهار وتصرف الحريم منه ! وبتحرج على كل حريم الحاره انه ما في حمام بكره !! فهمت علي ؟؟ ابو جاسم : ولشو كل هالشي؟؟ ابو شهاب : مثل ما عم قلك !!! اعمل اللي بقلك عليه وبكره بتعرف كل شي  المشهد الثاني والعشرون / النمس مع ابو عصام وعبدو !! النمس : يا لطيف شو هادا عمر !!! لوين جايبني !! مين هاااد؟؟ الحكيم ابو عصاااااام !! ولي ! شو هاد انا عم احلم شي !! لك مو ابو عصام ميت !1 شلون طلع من القبر عبدو : هلا اخراس وسمعنا !! النمس : وليي : وشو جاب عبدو هون !!! عمر شو فيييييييييي ابو عصام : اسماع ولا نمس بدون مقدمات احكي بسرعه شو بينك وبين مامون بلا ما اخلي عبدو يخلص عليك !! عمر : نمس ! احكي كل شي عندك اسلملك !! النمس يا جماعه طولوا بالكم علي !!! عبدو : احكي ! ما بدنا نطول بالنا !! النمس راح احكيلكم كل شي !! بس جيبولي بالاول كاسة مي !! ياتي عمر بكاس الماء !! ويقول النمس : بيوم اجاني ابو هلال وطلب مني بخ البيت تبع مامون من الناموس !! ابو عصام : اي !! ولما دخلت بيته الفار لعب بعبي ونبشت درج الخزانه تبع مامون بيك ولقيت فيه بطاقه عليها اسمه الحقيقي!! ابو عصام : شلوووون ؟؟؟؟؟؟ النمس : لقيت انه اسمه دومنيك !! مو مامون !! ابو عصام : دومنيك؟؟؟؟؟؟؟؟؟؟؟ وهنا تنتهي الحلقه قبل الاخيره من باب الحاره الجزء الخامس !! انتظرونا باحدااث الحلقه الاخيره والتي ستحمل الكثير من الاحداث الناريه !! وتابعوا معنا يا هل ترى ستحمل الحلقه الاخيره نهاية ابو بدر ؟؟ وهل سيتم كشف مامون بيك وفضحه !1 ام انه سيحدث ما هوغير متوقع وينجو بفعلته؟؟ كل ذلك ستتابعونه عبر الحلقه القادمه والتي ستكون الاخيره باذن الله مع تحيات طاقم العمل !!